Ki te kau Loma 7:1-25
7 E mata, e mafai o sē iloa ne koutou, e oku taina, (au e faipati atu ki a latou kolā e iloa ne latou te tulafono) i te Tulafono ko te matai o te tagata i tena olaga kātoa?
2 E pelā mo te mea tenei, a te fafine avaga e ligina ne te tulafono ki tena avaga i te taimi e ola ei a ia; kae kafai ko mate tena avaga, ko saoloto ei a ia mai te tulafono a tena avaga.+
3 Tela la, kafai koi ola tena avaga kae toe avaga a ia ki se isi tagata, ko taku ei a ia se fafine mulilua.+ Kae kafai ko mate tena avaga, ko saoloto ei a ia mai tena tulafono kae ko se fai foki a ia mo fai se fafine mulilua māfai e toe avaga a ia ki se isi tagata.+
4 Tela la, e oku taina, a koutou ko oti foki ne fai ke ‵mate ki te Tulafono e auala i te foitino o te Keliso, ko te mea ke fai koutou mō ia,+ ko te tino telā ne toe fakatu aka mai te mate,+ ko te mea ke tuku atu ne tatou ne fuataga ‵lei ki te Atua.+
5 Me i te taimi koi ola ei tatou faka-te-foitino, ne ga‵lue i loto i ‵tou foitino a manakoga agasala kolā ne fakamalosi aka ne te Tulafono ko te mea ke ‵fua mai i ei a fuataga o te mate.+
6 Kae nei la ko oti ne fakasaoloto tatou mai te Tulafono,+ me ko oti ne ‵mate tatou ki mea kolā ne ‵sai ne ia tatou, ko te mea ke fai tatou mo pologa i se auala fou e auala i te agaga+ kae e se i te auala mua e auala i te tulafono tusia.+
7 Ne a la ‵tou pati e ‵tau o fai atu? E mata, a te Tulafono ko te agasala? Ikai! Me moi ne seai se Tulafono penei e se iloa ne au a te agasala.+ E pelā mo te mea tenei, moi ne se fai mai te tulafono “E se ‵tau mo koe o kaimanako,” penei e se iloa ne au te kaimanako.+
8 Kae e auala i te fakatonuga tenā ko maua ei ne te agasala a te avanoaga ke fakagalue i loto i a au a vaega kese‵kese katoa o te kaimanako, me e mate te agasala māfai e seai se tulafono.+
9 E tonu, au ne ola muamua e aunoa mo te tulafono. Kae i te taimi ne oko mai ei a te fakatonuga, ne toe ola mai ei te agasala, kae ko au ko mate.+
10 Kae ko te fakatonuga telā e ‵tau o iku atu ki te ola,+ ne iloa aka ne au me iku atu ki te mate.
11 Me e auala i te fakatonuga ko maua ei ne te agasala a te avanoaga ke malei kae tamate ne ia au.
12 Tela la, a te Tulafono i a ia eiloa e tapu, kae ko te fakatonuga e tapu kae amiotonu kae ‵lei.+
13 Tela la, e mata, ne iku atu a te mea ‵lei ki toku mate? Ikai! Kae ko te agasala, ko te mea ke fakaasi atu i ei me ko te agasala ne fakatupu ne ia te mate i loto i a au e auala i te mea ‵lei,+ kae e auala i te fakatonuga ko fakalasi aka ei te masei o te agasala.+
14 Me e iloa ne tatou i te Tulafono se mea faka-te-agaga, kae ko au se tagata faka-te-foitino, telā ne fakatau atu mo fai te pologa a te agasala.+
15 Me e se malamalama au i aku mea e fai. Me e se fai ne au a te mea telā e manako au o fai, kae e fai ne au a te mea telā e takalialia au ki ei.
16 Kae kafai e fai ne au a te mea telā e se manako au o fai, e lotomalie au i te Tulafono e ‵lei faeloa.
17 Kae nei la, ko se toe fai ne au a te mea tenā, kae ko te agasala telā e nofo i loto i a au.+
18 E iloa ne au me e seai se mea ‵lei e nofo i loto i toku foitino; me e isi se manakoga i a au ke fai a te mea ‵lei kae e se mafai ne au o fai.+
19 Me e se fai ne au a te mea ‵lei telā e manako au ki ei, kae ko te mea masei telā e se manako au ki ei e fai ne au.
20 Kafai la e fai ne au a te mea telā e se manako au o fai, e se ko au e fai ne au te mea tenā, kae ko te agasala telā e nofo i loto i a au.
21 E iloa ne au a te tulafono tenei i loto i a au: Kafai e manako au o fai a te mea ‵lei, kae e nofo i a au a te mea masei.+
22 Kae ko toku ‵kano loto tonu eiloa e fiafia ki te tulafono a te Atua,+
23 kae e lagona ne au i toku foitino a te suā tulafono telā e taua atu ki te tulafono i toku mafaufau+ kae e takitaki ne ia au ke pologa ki te tulafono o te agasala+ telā e nofo i toku foitino.
24 Ko oko eiloa i toku fakaalofa! Ko oi ka fakasao ne ia au mai te foitino telā e takitaki ne ia au ki te mate tenei?
25 Ke fakafetai ki te Atua e auala i a Iesu Keliso te ‵tou Aliki! Tela la, i toku mafaufau au se pologa ki te tulafono a te Atua, kae i toku foitino e pologa au ki te tulafono o te agasala.+
