Ki te kau Loma 6:1-23

  • Olaga fou e auala i te papatisoga ki te Keliso (1-11)

  • Sa talia ke pule atu te agasala ki otou foitino (12-14)

  • Mai te pologa ki te agasala ki te pologa a te Atua (15-23)

    • ‵Togi o te agasala​—mate; meaalofa a te Atua​—ola (23)

6  Ne a la ‵tou pati ka fai atu? E mata, e ‵tau o tumau tatou i te agasala ko te mea ke fakalasi aka te alofa tauanoa?  Ikai! Kafai ko oti ne ‵mate tatou e uiga ki te agasala,+ e mafai pefea o tumau tatou i te ola i loto i ei?+  Io me e a, e se iloa ne koutou i a tatou katoa kolā ne papatiso ke ‵kau fakatasi mo Keliso Iesu+ ne papatiso foki ki tena mate?+  Tela la, ne tanu fakatasi tatou mo ia e auala i te ‵tou papatisoga ki tena mate,+ me e pelā eiloa mo te ‵toe fakatuakaga o Keliso mai te mate e auala i te ‵mana o te Tamana, e ‵tau foki mo tatou o sa‵sale i se olaga fou.+  Kafai ko ‵kau fakatasi tatou mo ia i te mate e pelā mo tena mate,+ ka ‵kau fakatasi foki tatou mo ia i te toetu e pelā mo tena toetu.+  Me e iloa ne tatou me ko oti ne ‵tuki a ‵tou uiga mua ki luga i te pou fakatasi mo ia+ ko te mea ke fai ei ‵tou foitino agasala ke ‵mate,+ ko te mea ke se toe fai tatou mo pologa ki te agasala.+  Me ko te tino telā ko oti ne mate ko fakasaoloto mai i tena agasala.  E se gata i ei, kafai tatou ko oti ne ‵mate fakatasi mo Keliso, e tali‵tonu tatou me ka ola fakatasi foki tatou mo ia.  Me e iloa ne tatou i a Keliso ko oti ne toetu aka mai te mate,+ ko se toe mafai o mate a ia;+ ko se toe fai te mate e pelā me se matai ki luga i a ia. 10  Me i te mate telā ne mate ei a ia, ko te mate mō agasala, kae fakatasi eiloa mō taimi katoa,+ kae ko te ola telā e ola ei a ia, e ola a ia mō te Atua. 11  E penā foki koutou, mafaufau pelā i a koutou ko oti ne ‵mate ki te agasala kae ko ola koutou mō te Atua e auala i a Keliso Iesu.+ 12  Tela la, ke se talia ne koutou a te agasala ke pule atu faeloa e pelā me se tupu ki otou foitino+ ko te mea ke faka‵logo koutou ki olotou manakoga. 13  Ke mo a foki ma tuku atu faeloa otou foitino ki te agasala e pelā me ne meatau o te sē amiotonu, kae tuku atu koutou ki te Atua e pelā me ne tino ne toe ola mai te mate, kae ke tuku atu foki otou foitino ki te Atua e pelā me ne meatau o te amiotonu.+ 14  Me e se ‵tau o fai te agasala mo fai te matai ki luga i a koutou, me i a koutou ko se ‵nofo mai lalo i te tulafono+ kae mai lalo i te alofa tauanoa o te Atua.+ 15  Se a la te uiga o te mea tenei? E mata, e tau o fai ne tatou se agasala i a tatou ko se ‵nofo mai lalo i te tulafono kae mai lalo i tena alofa tauanoa?+ Ikai! 16  E a, e se iloa ne koutou me kafai e tuku atu ne koutou a koutou eiloa ki se tino e pelā me ne pologa mai te faka‵logo ki a ia, a koutou ne pologa a te tino e faka‵logo koutou ki ei,+ faitalia me ko te agasala+ telā e iku atu ki te mate,+ io me ko te fakalogo telā e iku atu ki te amiotonu? 17  Kae ke fakafetai atu ki te Atua i a koutou ne fai muamua mo pologa a te agasala, ne faka‵logo koutou mo te loto kātoa ki akoakoga kolā ne tuku atu ki a koutou. 18  E tonu, ona ko koutou ko oti ne fakasaoloto mai te agasala,+ ko fai nei koutou mo pologa a te amiotonu.+ 19  Ona ko vāivāiga o otou foitino, ko faipati atu au i pati e masani ki ei a tino; me e pelā eiloa mo te tuku atu otou foitino mo fai a pologa ki amioga lai‵lai mo amioga solitulafono kolā e iku atu ki te solitulafono, nei la, ke tuku atu otou foitino e pelā me ne pologa a te amiotonu telā e iku atu ki te mauaga o se tulaga tapu.+ 20  I te taimi ne fai ei koutou mo pologa a te agasala, a koutou ne saoloto mai te amiotonu. 21  Ne a la fuataga ne tau sāle ne koutou i te taimi tenā? Ko mea kolā ko fakamasiasi atu ki a koutou i te taimi nei. Me i te ikuga o mea konā ko te mate.+ 22  Kae ona ko koutou ko saoloto mai te agasala kae ko pologa nei koutou ki te Atua, ko tau eiloa ne koutou te fuataga ‵ma i se auala tapu,+ kae i te fakaotiga ko te ola se-gata-mai.+ 23  Me i te ‵togi o te agasala ko te mate,+ kae ko te meaalofa telā e tuku mai ne te Atua ko te ola se-gata-mai+ i a Keliso Iesu te ‵tou Aliki.+

Fakamatalaga mai lalo