Ki te kau Loma 5:1-21

  • Toe faka‵lei mo te Atua e auala i a Keliso (1-11)

  • Ne ‵mate e auala i a Atamu, kae ola e auala i a Keliso (12-21)

    • Ko oko atu te agasala mo te mate ki tino katoa (12)

    • Te galuega amiotonu e tasi (18)

5  Tela la, me ko oti ne taku amiotonugina tatou ona ko te fakatuanaki,+ ke na fakatumau ne tatou te ‵tou va filemu mo te Atua e auala i te ‵tou Aliki ko Iesu Keliso,+  telā e maua foki ne tatou i a ia a te fakatuanaki e auala i te alofa tauanoa telā ko ‵mautakitaki i ei tatou;+ kae ke na fakavae te ‵tou fia‵fia ki luga i te ‵tou fakamoemoega mai te ‵malu o te Atua.  E se tenā fua kae ke na fia‵fia tatou i ‵tou puapuaga+ me e iloa ne tatou me i puapuaga e tupu mai i ei a te kufaki;+  a te kufaki e maua i ei te taliaga a te Atua,+ a te taliaga a te Atua e maua mai i ei a te fakamoemoega,+  kae e se iku atu a te fakamoemoega tenā ki te fanoanoa;+ me ko oti ne ‵ligi mai te alofa o te Atua ki ‵tou loto e auala i te agaga tapu telā ne tuku mai ki a tatou.+  E tonu, i te taimi koi vāi‵vai ei tatou,+ ne mate a Keliso mō tino sē amioatua i te taimi tonu.  Me e faigata o mate se tino mō se tino amiotonu; kae kāti e mafai fua o mafaufau se tino ke mate a ia mō se tagata ‵lei.  Kae ne fakaasi mai ne te Atua tena alofa ki a tatou i te taimi koi agasala ei tatou, me ne mate a Keliso mō tatou.+  Kae e sili atu i ei, ona ko te mea ko oti ne taku amiotonugina tatou i tena toto,+ ka ‵sao eiloa tatou mai te kaitaua o te Atua e auala i a ia.+ 10  Me i te taimi koi fai ei tatou mo ana fili ne faka‵lei tatou mo te Atua e auala i te mate o tena Tama,+ kae e sili atu i ei, ka faka‵sao tatou e auala i tena ola, me ko oti nei ne faka‵lei tatou mo ia. 11  E se gata i ei, e fia‵fia foki tatou ki te Atua e auala i te ‵tou Aliki ko Iesu Keliso telā ne maua ei ne tatou a te faka‵leiga.+ 12  E auala i te tagata fua e tokotasi ne oko mai ei te agasala ki te lalolagi, mo te mate e auala i te agasala+ tenā, i te auala tenā ne maua ei ne tino katoa te mate i te mea ko agasala a latou katoa+—. 13  Ko leva ne nofo te agasala i te lalolagi mai mua o te Tulafono, kae e seai se tino e fakasala māfai e seai se tulafono.+ 14  E tiga te feitu tenā, ne pule mai te mate e pelā me se tupu mai i a Atamu ke oko ki a Mose, ke oko foki eiloa ki a latou kolā ne seki agasala i te auala ne agasala i ei a Atamu, telā ne foliga mai e pelā mo te tino telā ka vau fakamuli.+ 15  Kae ko te meaalofa e ‵kese mo te solitulafono. Me kafai ne ‵mate a tino e tokouke i te solitulafono o te tagata e tokotasi, e sili atu la a te alofa tauanoa o te Atua mo tena meaalofa faivasaga e auala i te alofa tauanoa o te tagata e tokotasi,+ ko Iesu Keliso ki tino e tokouke.+ 16  Kae ko mea aoga kolā e maua mai i te meaalofa faivasaga e se ‵pau foki mo mea kolā ne iku mai i te agasala a te tino e tokotasi.+ Me i te fakamasinoga i te otiga ne solitulafono te tino e tokotasi ko te fakasalaga,+ kae ko te meaalofa i te otiga ne solitulafono a tino e tokouke ko te taku amiotonugina o latou.+ 17  Me kafai ne pule mai te mate e pelā me se tupu ona ko te solitulafono o te tagata e tokotasi,+ e sili atu la a latou kolā ne maua ne latou te lasi o te alofa tauanoa mo te meaalofa faivasaga o te amiotonu+ me ka pule latou e pelā me ne tupu+ i te ola e auala i te tagata e tokotasi, ko Iesu Keliso!+ 18  Tela la, e auala i te agasala e tasi ne iku atu i ei ki te fakasalaga o tino katoa,+ e auala foki i te galuega amiotonu e tasi ne iku atu i ei ki te taku amiotonugina o tino katoa+ mō te ola.+ 19  Me e pelā eiloa mo tino e tokouke ko fai mo tino agasala e auala i te sē fakalogo o te tagata e tokotasi,+ e penā foki te fai o tino e tokouke mo fai ne tino amio‵tonu e auala i te fakalogo o te tagata e tokotasi.+ 20  Ne oko mai a te Tulafono ko te mea ke mafai o fakauke aka ei a agasala.+ Kae kafai e uke a agasala kae ka silia atu te lasi o te alofa tauanoa o te Atua. 21  Se a te pogai? Me e pelā eiloa mo te pule mai o te agasala e pelā me se tupu fakatasi mo te mate,+ e penā foki a te alofa tauanoa e mafai o pule mai e pelā me se tupu e auala i te amiotonu telā ka iku atu ki te ola se-gata-mai e auala i a Iesu Keliso te ‵tou Aliki.+

Fakamatalaga mai lalo