Ki te kau Loma 4:1-25

  • Ne taku amiotonugina Apelaamo ona ko te fakatuanaki (1-12)

    • Apelaamo, te tamana o tino fakatuanaki katoa (11)

  • Folafolaga ne maua e auala i te fakatuanaki (13-25)

4  Ona ko te mea tenā, se a la te mea ka fai atu ne tatou me ne maua ne Apelaamo, te ‵tou tupuga?  E pelā mo te mea tenei, kafai ne taku amiotonugina Apelaamo ona ko ana galuega, ne maua ne ia se pogai ‵lei ke faipati fakamatamata a ia ki ei, kae e se i mua o te Atua.  Ne a pati e fai mai i tusitusiga tapu? “Ne fakatuanaki a Apelaamo ki a Ieova* kae ne fai a te mea tenā ki a ia e pelā me se faifaiga amiotonu.”+  A te ‵togi o te tino galue e se fai pelā me ne maua ona ko te alofa tauanoa kae e pelā me se mea telā e ‵tau eiloa o ‵togi ki a ia.  I te suā feitu, a te tino telā e se galue kae e fakatuanaki ki te Atua telā e taku amiotonu ne ia a te tino sē amioatua, ko fai ei me e amiotonu a tena fakatuanaki.+  E pelā eiloa mo Tavita telā e faipati foki ki te fiafia o te tagata telā e kilo atu te Atua ki ei me e amiotonu e aunoa mo ne galuega:  “E fia‵fia eiloa a latou kolā ko oti ne fakamagalo olotou faifaiga solitulafono kae e pulou* atu olotou agasala;  e fiafia a te tagata telā ka se mafai eiloa o saga atu a Ieova* ki ana agasala.”+  E mata, e maua fua a te fiafia tenei ne tino pilitome io me ko tino foki e seki pilitome?+ Me e fai atu tatou: “Ne fai a te fakatuanaki o Apelaamo ki a ia e pelā me se faifaiga amiotonu.”+ 10  Mai lalo i fakanofonofoga fea ne fai ei a te mea tenā e pelā me se faifaiga amiotonu? I te taimi ko oti ei ne pilitome io me ko te taimi ne seki pilitome ei? I te taimi ne seki pilitome ei a ia, kae e se ko te taimi ne pilitome ei. 11  Kae ne maua ne ia se fakailoga+—telā ko te pilitome—e pelā me se fakamailoga* o te amiotonu e auala i te fakatuanaki telā ne maua ne ia kae koi tuai a ia o pilitome, ko te mea ke fai a ia mo tamana o tino katoa kolā e fakatuanaki+ kae seki pilitome, ko te mea ke fai latou e pelā me e amio‵tonu; 12  kae ke fai a ia mo tamana o tama‵liki ko oti ne pilitome, e se gata fua ki a latou kolā e tausi ki te pilitome kae ki a latou foki kolā e sa‵sale tonu i kalafaga o te fakatuanaki telā ne maua ne ‵tou tamana ko Apelaamo+ i te taimi ne seki pilitome ei a ia. 13  E se ona ko te tulafono ne maua ei ne Apelaamo io me ko tena tama* a te folafolaga ke fai a ia mo sui tupu o se lalolagi,+ kae ona ko te amiotonu e auala i te fakatuanaki.+ 14  Kafai e fai a latou kolā e tausi ki te tulafono mo fai a sui tupu, ko seai ei se aoga o te fakatuanaki kae ko fakaseai foki i ei te folafolaga. 15  A te ‵tonuga loa, e aumai fua ne te Tulafono a te kaitaua o te Atua,+ kae kafai e seai se tulafono e seai foki se solitulafono.+ 16  Tenā te pogai e auala atu ei a te mea tenei i te fakatuanaki, ko te mea ke maua fua i te alofa tauanoa+ o te Atua, ke fakamautinoa aka i ei te folafolaga e maua ne ana tama* katoa,+ e se gata fua i a latou kolā e tausi ki te Tulafono kae ki a latou foki kolā e ‵piki ‵mau ki te fakatuanaki o Apelaamo, telā ko te tamana o tatou katoa.+ 17  (E pelā eiloa mo muna i te tusi: “Ko oti ne filifili ne au a koe mo fai te tamana o atufenua e uke.”)+ Ne fai a te mea tenei i mua o te Atua, telā ne fakatuanaki a ia ki ei, ne toe fakaola aka ne ia a tino ‵mate kae faipati atu ne ia a mea kolā e seki ‵tupu e pelā me ne mea ko ‵tupu. 18  E tiga eiloa ko seai sena fakamoemoega, kae ne fakavae eiloa tena fakamoemoega ki tena fakatuanaki me ka fai a ia mo fai te tamana o atufenua e uke e ‵tusa mo pati kolā ko oti ne fai atu: “Ka penā eiloa te tokouke o au tama.”+ 19  E tiga eiloa ne seki vāivāi tena fakatuanaki, ne kilo atu a ia ki tena foitino e pelā eiloa me ko mate, (ona ko ia ko nofo ki te 100 tausaga tena matua),+ e pelā foki mo te sē fanafanau o Sala.+ 20  Kae ona ko te folafolaga a te Atua, ne seki vāivāi tena fakatuanaki; kae ne malosi a ia ona ko tena fakatuanaki, tuku atu i ei a vikiga ki te Atua 21  mo te talitonu katoatoa me ka fai eiloa ne Ia a te mea telā ne folafola atu ne Ia.+ 22  Tela la, “ne fai a te mea tenā ki a ia e pelā me se faifaiga amiotonu.”+ 23  Kae ko pati konei, “fai a te mea tenā ki a ia” ne seki tusi fua mō ia eiloa,+ 24  kae mō tatou foki kolā ka fai pelā me e amio‵tonu, me e tali‵tonu tatou ki a Ia telā ne fakatu aka ne ia a Iesu te ‵tou Aliki mai te mate.+ 25  Ne tuku atu a ia mō ‵tou agasala+ kae ne toe fakatu aka ko te mea ke mafai o taku amiotonugina tatou.+

Fakamatalaga mai lalo

Onoono ki te MF A5.
Io me “fakamagalo.”
Onoono ki te MF A5.
Io me “fakamaoniga.”
Eleni, “fanau.”
Eleni, “fanau.”