Ki te kau Loma 2:1-29

  • Fakamasinoga a te Atua ki tino Iutaia mo tino Eleni (1-16)

    • Auala e galue ei te loto lagona (14, 15)

  • Tino Iutaia mo te Tulafono (17-24)

  • Pilitome i te loto (25-29)

2  Tela la, e seai eiloa sau fakamasakoga, e toku tagata, faitalia me ko oi koe+ māfai e fai koe mo famasino; me kafai e fakamasino ne koe te suā tino, e fakamasei ne koe a koe eiloa, me i a koe telā e fai te fakamasinoga e fai foki ne koe a mea konā.+  Ko iloa nei ne tatou i te fakamasinoga a te Atua, e fetaui eiloa mo te munatonu, e ‵teke atu ki a latou kolā e fai ne latou a mea penā.  Kae e mata, e isi sou manatu, e toku tagata, me i te taimi e fakamasino ei ne koe a tino penā kae e fai foki ne koe a mea konā, e a, ka sao koe i te fakamasinoga a te Atua?  Io me e takalialia koe ki te lasi o tena atafai+ mo tena fa‵ki+ mo tena kufaki+ me e se iloa ne koe i te Atua e taumafai o takitaki koe ke salamō+ ona ko tena atafai?  Kae ona ko tou loto makeke kae e se salamō, e fakaputu fua ne koe te kaitaua mō koe eiloa i te aso o tena kaitaua mo te taimi e fakaasi mai ei te fakamasinoga amiotonu a te Atua.+  Kae ka tuku atu ne ia te taui ki tino taki tokotasi e ‵tusa mo olotou galuega ne fai:+  ko te ola se-gata-mai ki a latou kolā e ‵sala atu ki te ‵malu mo te fakaaloalo mo mea e se mafai o ‵pala,+ mai te kufaki i te faiga o galuega ‵lei;  kae ko latou kolā e fakatau kinau kae e se faka‵logo ki te munatonu kae e faka‵logo ki mea ma‵sei, ka fe‵paki eiloa latou mo te kaitaua mo te ita o te Atua.+  Ka oko atu eiloa a puapuaga mo te loto mafatia ki luga i so se tino telā e fai ne ia a galuega fakapa‵kia tino, e muamua ki tino Iutaia, e pelā foki mo tino Eleni; 10  kae ko te ‵malu mo te fakaaloalo mo te filemu mō tino katoa kolā e ga‵lue ke maua a mea ‵lei, e muamua ki tino Iutaia,+ e pelā foki mo tino Eleni.+ 11  Me i te Atua e se fakailoga tino.+ 12  A tino katoa kolā ne agasala e aunoa mo te tulafono ka fakaseai atu foki e aunoa mo te tulafono;+ kae ko tino katoa kolā ne agasala mai lalo i te tulafono ka fakamasinogina e auala i te tulafono.+ 13  Me e se ko tino kolā e fakalogo‵logo ki te tulafono e amio‵tonu i mua o te Atua, kae ko tino kolā e fakagalue ne latou te tulafono ka taku amiotonugina.+ 14  Me kafai e fai ne tino o fenua fakaa‵tea kolā e se ‵nofo mo te tulafono+ a galuega o te tulafono ona ko lagonaga masani, a te mea tenā se tulafono eiloa ki a latou e tiga eiloa e seai se lotou tulafono. 15  Konā eiloa a tino kolā e fakaasi mai me i akoakoga e uiga ki te tulafono e tusi i olotou loto, kae e molimau mai olotou loto lagona e uiga ki ei, kae i olotou mafaufau, e faka‵se io me e faka‵sao ne latou a latou eiloa. 16  Ka fai eiloa te mea tenei i te aso e fakamasino ei ne te Atua a mea ‵funa a tāgata e auala i a Keliso Iesu,+ e ‵tusa mo te tala ‵lei telā e folafola atu ne au. 17  Kafai koe e taku se tino Iutaia,+ kae e fakalagolago ki te tulafono kae e fakamatamata i tou fesokotakiga mo te Atua, 18  kae e iloa ne koe tena loto kae e talia ne koe a mea e sili atu i te ‵lei ona ko koe ne akoakogina* ne te Tulafono,+ 19  kae e talitonu koe i a koe ko fai mo takitaki ki tino ‵kivi, se mainaga mō tino kolā e ‵nofo i te pouliga, 20  e fakatonutonu ne koe a tino va‵lea, e fai koe mo faiakoga o tama‵liki fo‵liki, kae ko maua foki ne koe te fakavae o te poto mo te munatonu i te Tulafono— 21  kae ko koe telā e akoako ne koe te suā tino, e a, e se akoako ne koe a koe eiloa?+ A koe telā e talai atu “Sa kaisoa,”+ e a, a koe e kaisoa? 22  A koe telā e fai atu “Sa mulilua,”+ e a, e mulilua koe? A koe telā e takalialia ki tupua, e a, e kaisoa ne koe a mea i loto i faletapu? 23  A koe telā e fakamatamata ki te tulafono, e mata, e se āva koe ki te Atua mai te soli ne koe o te Tulafono? 24  Me “i te igoa o te Atua ko taku fakamaseigina i fenua fakaa‵tea ona ko koutou,” e pelā eiloa mo muna i te tusi.+ 25  E tonu, e mafai fua o aoga te pilitome+ māfai e fakalogo koe ki te tulafono;+ kae kafai e soli ne koe a te tulafono ko fai ei koe e pelā me se tino e seki pilitome. 26  Kae kafai e tausi ne se tino seki pilitome+ a manakoga amio‵tonu o te Tulafono, e a, ka se fai a ia mo fai se tino telā ko oti ne pilitome?+ 27  Kae ka fakamasino ne te tino seki pilitome i te foitino, telā e fakalogo ki te Tulafono, a koe telā ne soli ne koe te tulafono faitalia me nofo mo te tulafono tusia kae ko oti ne pilitome. 28  Me i a ia e sē se tino Iutaia i ana foliga i tua+ io me ko te pilitome o te pa‵kili i tua.+ 29  Kae ko ia se tino Iutaia i ana foliga i loto,+ kae ko tena pilitome ko te pilitome i te loto+ e auala i te agaga, kae e se auala i te tulafono tusia.+ A tavaega o te tino tenā e maua mai i te Atua, kae e se mai i tino.+

Fakamatalaga mai lalo

Io me “akoakoga fai gutu.”