Ki te kau Loma 16:1-27

  • Fakailoa mai ne Paulo a Fipe, se tavini (1, 2)

  • Alofaaga ki Kelisiano i Loma (3-16)

  • Fakaeteete i mavae‵vaega (17-20)

  • Alofaaga mai taina ga‵lue o Paulo (21-24)

  • Ko fakaasi atu nei te mea ‵funa kae tapu (25-27)

16  E fakailoa atu ne au ki a koutou e uiga ki te ‵tou tuagane ko Fipe, telā se tavini e tokotasi i te fakapotopotoga i Kenikelea,+  ko te mea ke talia ne koutou a ia i te Aliki i se auala telā e fetaui mo tino tapu kae tuku atu ki a ia so se fesoasoani e manako a ia ki ei,+ me e puipui foki ne ia a tino e tokouke, e aofia i ei au.  Ke ‵moli atu oku alofaaga ki a Piseka* mo Akuila,+ ko oku taina ga‵lue i a Keliso Iesu,  kolā ne toka o ‵mate mō oku,+ e se gata fua taku fakafetai ki a lāua kae e pelā foki mo fakapotopotoga katoa o fenua fakaa‵tea.  Ke fakatalofa atu foki ki te fakapotopotoga telā e maopoopo sāle i te lā fale.+ Ke fakatalofa atu ki taku fagasele ko Epaineto, telā se tokotasi o fuataga muamua mai i Asia mō Keliso.  Fakatalofa atu ki a Malia telā ne galue malosi mō koutou.  Fakatalofa atu ki a Aneloniko mo Iunia, ko oku kāiga+ kolā ne falepuipui fakatasi matou, ne tāgata kolā e iloa ‵lei ne te kau apositolo kae ko leva ne ‵kau fakatasi mo Keliso i lō au.  Ke ‵moli atu oku alofaaga ki a Amepelia taku fagasele i te Aliki.  Fakatalofa atu ki a Upano te ‵tou taina galue i a Keliso, mo taku fagasele ko Sataku. 10  Fakatalofa atu ki a Apele, telā se tino toaga i a Keliso. Fakatalofa atu ki a latou kolā i te kaufale o Alisopulo. 11  Fakatalofa atu ki a Helotiona toku kāiga. Fakatalofa atu ki a latou kolā i te kaufale o Nakiso kae kolā e tau‵tali i te Aliki. 12  Fakatalofa atu ki a Tufaina mo Tufosa, ko fāfine kolā e ga‵lue malosi i te Aliki. Fakatalofa atu ki a Peseti te ‵tou fagasele, me ne fai ne ia a galuega e uke i te Aliki. 13  Fakatalofa atu ki a Lufo te tino filifilia i te Aliki, mo tena mātua telā ko toku mātua foki. 14  Fakatalofa atu ki a Asugelito, Fegona, Heleme, Patelopa, Helemea mo taina kolā e fakatasi mo latou. 15  Fakatalofa atu ki a Filoloko mo Iulia, Neleu mo tena tuagane, mo Olumepa, mo tino tapu katoa kolā e fakatasi mo latou. 16  Ke fakatau fakatalofa atu koutou te suā tino ki te suā tino i te sogi tapu. Ko fakatalofa atu ki a koutou a fakapotopotoga katoa a Keliso. 17  Nei la, ko fakamalosi atu au ki a koutou, e oku taina, ke fakaeteete koutou i a latou kolā e faka‵tupu ne latou a mavae‵vaega mo mea e vāi‵vai ei a tino kolā e ‵teke atu ki akoakoga ko oti ne tauloto ne koutou, kae ‵kalo kea‵tea mai i a latou.+ 18  Me i tāgata penā e pologa ki olotou manakoga,* kae e se ki te ‵tou Aliki ko Keliso, kae e auala i olotou pati takolekole mo pati tavae fakaloi‵loi e faka‵segofie ne latou a loto o tino e seai ne olotou mea e iloa. 19  Ko oti ne iloa ne tino katoa te otou faka‵logo, tela la, ko fiafia au ona ko koutou. Kae e manako au ke ‵poto koutou e uiga ki te mea telā e ‵lei, kae ke va‵lea koutou e uiga ki te mea masei.+ 20  Me ko pili o tuki pala ne te Atua o te filemu a Satani+ mai lalo i otou vae. Ke i luga i a koutou a te alofa tauanoa o te ‵tou Aliki ko Iesu. 21  E fakatalofa atu foki ki a koutou a toku taina galue ko Timoteo penā foki mo Lukio, Iasona mo Sosepatelo, ko oku kāiga.+ 22  E fakatalofa atu foki a Tesio, telā ne tusi ne ia te tusi tenei ki a koutou i te Aliki. 23  A Kaio+ telā e nofo au i ei kae maopoopo te fakapotopotoga kātoa i tena fale, ko fakatalofa atu ki a koutou. E fakatalofa atu a Elasita te teutupe* o te fakai, e pelā foki mo tena taina ko Kuata. 24 * —— 25  Ke i luga i te Tino telā e faka‵mautakitaki ne ia koutou i te tala ‵lei telā e folafola atu ne au mo te talaiga e uiga ki a Iesu Keliso, e ‵tusa mo te fakaasimaiga o te mea ‵funa kae tapu+ telā ne ‵funa aka i taimi e uke ko ‵teka 26  kae tenei ko oti ne fakaasi mai; kae ko oti ne fakailoa atu ki atufenua katoa e auala i valoaga i Tusitusiga Tapu e ‵tusa mo te fakatonuga a te Atua telā e seai sena gataga, ke fakamalosi aka ei te fakalogo e auala i te fakatuanaki; 27  ki te Atua, telā ko ia fua tokotasi e poto,+ a te ‵malu e auala i a Iesu Keliso ki te se-gata-mai. Amene.

Fakamatalaga mai lalo

Io me “Pisila.”
Io me “tinae.”
Io me “situati.”
Onoono ki te MF A3.