Ki te kau Loma 14:1-23

  • Sa fakatau fakamasino atu (1-12)

  • Sa fakavāivāi atu ki nisi tino (13-18)

  • Tausi te filemu mo te ‵kau fakatasi (19-23)

14  Ke talia ne koutou a te tagata telā ko vāivāi tena fakatuanaki,+ kae sa fakamasino a ia ona ko ana kilokiloga.  E fakatuanaki te tagata e tokotasi ke kai ki so se mea, kae ko te tagata telā e vāivāi e kai fua ki laulakau.  Ke mo a ma kilo fatauva a te tino telā e kai ki te tino telā e se kai, kae ke mo a ma fakamasino atu a te tino telā e se kai ki te tino telā e kai,+ me ko oti ne talia ne te Atua a te tino tenā.  Ko oi la koe ke fakamasino ne koe te tavini a te suā tino?+ E sao io me e se sao a ia i te fakamasinoga a tena matai.+ E tonu, e tu a ia me e mafai ne Ieova o fakatu a ia ki luga.  E fai mai se tagata e tokotasi me e sili atu a te aso e tasi i lō te suā aso;+ kae e fai mai te suā tino me i te aso e tasi e ‵pau mo nisi aso katoa;+ ke na fakamautinoa aka ne tino taki tokotasi olotou manatu.  A te tino telā e fakatāua ne ia te aso e tasi ke fakatāua ne ia mō Ieova. E penā foki a te tino telā e kai, ke kai mō Ieova, me e fakafetai atu a ia ki te Atua;+ kae ko te tino telā e se kai, ke se kai mō Ieova, kae e fakafetai atu eiloa a ia ki te Atua.+  E seai se tino i a tatou e ola mō ia aka eiloa,+ kae e seai foki se tino e mate mō ia eiloa.  Me kafai e ola tatou, e ola tatou mō Ieova,+ kae kafai e ‵mate tatou, e ‵mate foki tatou mō Ieova. Tela la, faitalia me e ola io me ‵mate tatou, a tatou ko tino o Ieova.+  Me tenā te pogai ne mate ei a Keliso kae toe fakaola mai, ko te mea ke fai a ia mo fai te Aliki o tino ‵mate mo tino ola katoa.+ 10  Kae kaia e fakamasino ei ne koe tou taina?+ Io me kaia foki e fakatauemu ei ne koe tou taina? Me i a tatou ka ‵tu katoa i mua o te nofoga fakamasino o te Atua.+ 11  Me e penei a pati i te tusi: “‘E pelā eiloa mo au e ola,’+ ko muna a Ieova, ‘a tulivae katoa ka to‵tuli ifo ki a au, kae ko gutu katoa ka fakaasi atu ne latou i mua o tino katoa i a au ko te Atua.’”+ 12  Tela la, ka tuku atu ne tatou taki tokotasi ki te Atua se tala e uiga ki ‵tou mea ne fai.+ 13  Tela la, ke se toe fakamasino ne tatou te suā tino ki te suā tino,+ kae ke na fakaiku aka ke se tuku atu i mua o se taina se fatu faka‵siga tino io me se mea ke ‵lave ei tou taina.+ 14  E iloa kae talitonu foki au i te Aliki ko Iesu me e seai se mea e lailai i a ia eiloa,+ kae ko mea fua kolā e mafaufau te tagata me e lai‵lai, e lai‵lai eiloa a mea konā ki a ia. 15  Me kafai ko meakai e ita i ei tou taina, ko se sasale koe i te auala o te alofa.+ Ke mo a ma fakamasei ne koe e auala i meakai a te tino telā ko oti ne mate a Keliso mō ia.+ 16  Tela la, ke se fai ne koutou se mea ke taku fakamaseigina ei a mea ‵lei e fai ne koutou. 17  Me e se fakauiga te Malo o te Atua ki te kai mo te inu,+ kae e fakauiga ki te amiotonu mo te filemu mo te fiafia i te agaga tapu. 18  Me i so se tino e pologa ki te Keliso i te auala tenei e talia ne te Atua kae e talia foki ne tāgata. 19  Tela la, ke na kausaki atu tatou ki mea kolā e maua ei a te filemu+ mo mea kolā e fakatau fakamalosi aka ei te suā tino ki te suā tino.+ 20  Fakagata te ofa ki lalo a galuega a te Atua ona fua ko meakai.+ E tonu, a mea katoa e ‵ma, kae e fakamataku māfai e kai se tino kae e ‵siga i ei a nisi tino. + 21  E ‵lei atu ke se kai ki ‵kano o manu io me e inu ki uaina io me e fai so se mea telā e fakavāivāi ei tou taina.+ 22  A te fakatuanaki tenā i a koe, ke tausi ne koe mō koe eiloa i mua o te Atua. Ka fiafia te tagata telā e se fakamasino ne ia a ia eiloa e auala i mea kolā e talia ne ia. 23  Kae kafai e fakalotolotolua a ia, ko leva a ia ne agasala māfai e kai, me e se kai a ia ona ko tena fakatuanaki. E tonu, so se mea telā e se fakavae ki luga i te fakatuanaki se agasala te mea tenā.

Fakamatalaga mai lalo