Ki te kau Loma 13:1-14

  • Fakalogo ki pule ma‵luga (1-7)

    • ‵Togiga o lafoga foitino (6, 7)

  • A te alofa ko te fakataunuga o te Tulafono (8-10)

  • Sa‵sale e pelā me sa‵sale i te ao (11-14)

13  E ‵tau mo tino katoa o faka‵logo ki pule ma‵luga,+ me e seai se pulega e fai seiloga ke talia ne te Atua;+ me ne fakasaoloto ne te Atua a pulega katoa konei ke ‵tu mai i olotou tulaga kese‵kese.+  Tela la, so se tino e ‵teke ki pulega ko ‵teke foki ki te fakatokaga a te Atua; a latou kolā e ‵teke ki ei ka fakamasinogina.  Me i tino pule konā e ma‵taku ki ei a tino ma‵sei kae e se ko tino fai mea ‵lei.+ E a, e manako koe ke saoloto mai te mataku ki pulega konei? Tumau i te fai mea ‵lei+ kae ka maua ne koe a tavaega mai i ei;  me i a ia ko te tavini a te Atua mō te ‵lei o koe. Kae kafai e fai ne koe a mea ma‵sei, e ‵tau mo koe o mataku me tenā te pogai e fakaaoga ei ne ia te pelu. A ia ko te tavini a te Atua, ko ia telā e tuku atu ne ia te taui ma sui ke fakaasi atu ei te kaitaua o te Atua* ki te tino telā e fai mea ma‵sei.  Tela la, e ‵tau eiloa mo koutou o faka‵logo, e se ona fua ko tena kaitaua kae ona foki ko otou loto lagona.+  Me tenā foki loa te pogai e ‵togi ei otou lafoga; me i a latou ko tavini a te Atua mō tino katoa, e tavini atu faeloa mō te pogai eiloa tenei.  Tuku atu ki tino katoa a mea kolā e ‵tau o maua ne latou, ‵togi atu te lafoga ki te tino telā e ‵tau o ‵togi ki ei;+ ‵togi atu te tiute ki te tino telā e ‵tau o ‵togi ki ei; mataku ki te tino telā e ‵tau o mataku ki ei;+ fakaasi atu te āva ki te tino telā e ‵tau o āva ki ei.+  Ke mo a ma ‵nofo kaitalafu koutou i se mea e tasi mai so se tino kae ke fakatau a‵lofa koutou;+ me ko so se tino e alofa ki tena tuakoi ko fakataunu ne ia te tulafono.+  Me e fai mai penei te tulafono, “E se ‵tau mo koe o mulilua,+ e se ‵tau mo koe o tatino,+ e se ‵tau mo koe o kaisoa,+ e se ‵tau mo koe o kaimanako,”+ mo nisi tulafono aka katoa, e aofia katoa i pati konei, “E ‵tau mo koe o alofa ki tou tuakoi e pelā mo koe ki a koe eiloa.”+ 10  E se fai ne te alofa a mea ma‵sei ki te tuakoi o se tino;+ tela la, a te alofa ko te fakataunuga o te tulafono.+ 11  Kae ke fai te mea tenei me e iloa ne koutou a te taimi, me ko leva ne oko mai a te itula e ‵tau ei o ala aka koutou mai te moe,+ i te mea ko pili mai nei te ‵tou fakaolataga i lō te taimi ne fai ei tatou e pelā me ne tino tali‵tonu. 12  Ko leva te po kae ko pili o ao. Tela la, ke na ‵pei kea‵tea ne tatou a galuega o te pouliga+ kae ke na ‵pei tatou ki meatau o te mainaga.+ 13  Ke na sa‵sale faka‵lei tatou+ e pelā eiloa mo tatou e sa‵sale i te ao, e se i te faiga o fakafiafiaga fai valevale mo te ko‵nā, e se i te faiga o amioga fakatauavaga sē ‵tau mo te amio matafatu mo te sē āva,+ e se i te fai taua mo te loto masei.+ 14  Kae fakapei ki luga i a koutou a uiga o te Aliki ko Iesu Keliso,+ kae ke mo a ma fai muamua otou fuafuaga mō te faiga o manakoga o te foitino.+

Fakamatalaga mai lalo

Io me “aumai te fakasalaga.”