Ki te kau Loma 11:1-36

  • Ne seki ‵teke atu ki tino Isalaelu katoa (1-16)

  • Tala fakatusa ki te lakau ko te olive (17-32)

  • Te ‵poko o te poto o te Atua (33-36)

11  Tenā ne fesili atu ei au, e a, ne ‵teke ne te Atua ana tino?+ Ikai! Me i a au foki se tino Isalaelu mai i tama* a Apelaamo, mai i te matakāiga o Peniamina.  Ne seki ‵teke ne te Atua ana tino kolā ne talia muamua ne ia.+ E a, e se iloa ne koutou a pati i tusitusiga tapu e uiga ki a Elia, i te taimi ne fai ei tena fakatagi ki te Atua e uiga ki tino Isalaelu?  “Ieova,* ko oti ne tamate ne latou au pelofeta, ko oti ne ofa ne latou au fatafaitaulaga, kae ko au fua tenei e ‵toe, kae nei, ko taumafai latou o tamate au.”+  Kae se a te folafolaga a te Atua ki a ia? “Ko oti ne faka‵toe ne au mō oku a tāgata e toko 7,000 kolā e seki ifo eiloa ki a Paala.”+  E penā foki i te taimi nei, e isi se ‵toega+ telā ko oti ne filifiligina e auala i te alofa tauanoa.  Kafai e fai te mea tenei e auala i te alofa tauanoa,+ ko se toe fai a te mea tenei e auala i galuega;+ me kafai e se fai penā, ko se fai ei a te alofa tauanoa mo fai se alofa tauanoa.  E a la? A te mea telā e ‵sala malosi ki ei a Isalaelu ne seki maua ne ia, kae ne maua ne tino filifilia.+ Kae ko te ‵toega ne seki fia ‵saga ki ei,+  e pelā eiloa mo pati i te tusi: “Ko oti ne tuku atu ne te Atua ki a latou te agaga o te moe palapala,+ ko mata kolā e se ‵kite mo taliga kolā e se ‵logo, ke oko mai eiloa ki te aso nei.”+  E penā foki a pati a Tavita: “Ke fai te lotou taipola e pelā me se malei mo se matasele mo se fatu faka‵siga tino mo se fakasalaga ki a latou. 10  Ke fakapouli atu olotou mata ke se lavea ne latou se mea, kae fai ke ‵piko faeloa olotou tua.”+ 11  Tenā ne fesili atu ei au, E mata, ne ‵siga kae pa‵kū katoatoa latou ki lalo? Ikai! Kae ona ko te ‵se o te lotou auala ne maua ei ne tino o fenua fakaa‵tea a te fakaolataga, ke fai ei latou ke loto ma‵sei.+ 12  Kae kafai ko te ‵se o te lotou auala ne fai ei ke maumea te lalolagi, kae ko te lotou gasolo ifo o mu‵tana ne fai ei ke mau‵mea a tino o fenua fakaa‵tea,+ ka sili atu la te lasi o te maumea māfai ko kātoa ‵lei te lotou aofaki! 13  Nei la, ko faipati atu au ki a koutou kolā ko tino o fenua fakaa‵tea. Ona ko au ko te apositolo mō fenua fakaa‵tea,+ e faka‵malu* ne au taku galuega+ 14  ko te mea ke mafai o fakaloto masei ne au oku tino i so se auala kae faka‵sao a nisi tino mai i a latou. 15  Me kafai ko te ‵peiga o latou kea‵tea+ ne faka‵lei aka ei a te va o te lalolagi mo te Atua, ka pefea la māfai e talia a latou ke fai pelā me ne tino kolā ne toe faka‵tu mai te mate? 16  E se gata i ei, kafai e tapu a te vaega o te paluga telā ne ofo atu e pelā me ko fuataga muamua, a te paluga kātoa foki e tapu; kae kafai e tapu a te aka o te lakau, ka penā foki a kaula. 17  Kafai ne ‵fati a nisi kaula kae faka‵piki atu koe ki ei, e tiga eiloa a koe se olive vao, kae ka maua fakatasi ne koutou te maumea o te olive mai i ana aka, 18  ke mo a ma fia sili* koe i kaula konā. Kafai e fia sili* koe i a latou,+ ke masaua me e se fakaola ne koe a aka kae ko aka e fakaola ne latou a koe. 19  Tenā ka fai mai ei koe: “Ne ‵fati kea‵tea a kaula ko te mea ke faka‵piki atu au ki ei.”+ 20  E tonu te mea tenā! Ne ‵fati latou kea‵tea ona ko te sē lava o te lotou fakatuanaki,+ kae e tu mai koe ona ko te fakatuanaki.+ Sa fakamaualuga kae fai ke mataku koe. 21  Me kafai ne seki faka‵sao ne te Atua a kaula ‵tonu o te olive, ka se faka‵sao foki koutou ne ia. 22  Tela la, mafaufau ki te atafai o te Atua+ mo te fakamataku o tena kaitaua. Ne kaitaua a ia ki a latou kolā ne ‵siga,+ kae ne atafai a te Atua ki a koe, māfai e tumau koe i loto i tena atafai; me kafai e se fai penā, ka ‵kati foki koe kea‵tea. 23  E penā foki latou, kafai e se tumau te sē lava o te lotou fakatuanaki, ka toe faka‵piki+ atu foki latou, me e faigofie ke toe faka‵piki latou ne te Atua. 24  Me kafai ne ‵kati kea‵tea koe mai te lakau ko te olive telā e tu i te vao kae faka‵piki atu ki te lakau ko te olive telā e tu i loto i te fatoaga, e pefea la te faigofie ke toe faka‵piki atu a kaula ‵tonu konei ki te lotou lakau ko te olive! 25  Me e se manako au ke se iloa ne koutou a te mea funa+ kae tapu tenei, e oku taina, ko te mea ke mo a koutou ma sona fia ‵poto: Ko oti ne fai ke tai vāivāi a mafaufau o nisi tino Isalaelu ke oko ki te taimi e kātoa ei a te aofaki o tino mai fenua fakaa‵tea, 26  kae ka faka‵sao a Isalaelu+ kātoa i te auala tenei. E pelā eiloa mo pati i te tusi: “A te fakaola ka vau mai Siona+ kae ka ave ne ia kea‵tea a amioga ma‵sei mai i a Iakopo. 27  Kae tenei eiloa taku feagaiga ne fai mo latou,+ i te taimi e ave ei ne au kea‵tea olotou agasala.”+ 28  E tonu, ona ko te tala ‵lei ko fai ei latou mo fili mō te ‵lei o koutou; kae e uiga ki te filifiliga a te Atua ne alofagina latou ona ko olotou tupuga.+ 29  Me e se mafai o salamō te Atua i ana meaalofa mō tino kolā e kalagagina ne ia. 30  Me e pelā eiloa mo koutou ne seki faka‵logo ki te Atua+ kae nei ko maua ne koutou te alofa fakamagalo+ ona ko te lotou sē faka‵logo,+ 31  ka penā foki a latou kolā ko se faka‵logo nei ne iku atu ei ki te mauaga ne koutou a te alofa fakamagalo, ko te mea ke fakaasi atu foki ki a latou te alofa fakamagalo. 32  Me ko oti ne ‵loka ne te Atua a latou katoa i te sē faka‵logo+ ko te mea ke fakaasi atu ne ia ki a latou katoa a te alofa fakamagalo.+ 33  Ko tafaga la te ‵poko o te maumea mo te poto mo te iloa o te Atua! Ko oko eiloa te faigata ke malamalama i ana fakamasinoga kae e se mafai o iloa ana auala! 34  Me “ko oi e iloa ne ia a te mafaufau o Ieova,* io me e fai mo fai tena tino fakatonutonu?”+ 35  Io me “ko oi ne tuku muamua atu ne ia se mea ki a ia, ko te mea ke toe ‵togi mai ki a ia?”+ 36  Me e maua mai i a ia kae e auala i a ia kae mō ia foki a mea katoa. Ke i a ia te ‵malu mo vikiga ki te se-gata-mai. Amene.

Fakamatalaga mai lalo

Eleni, “fanau.”
Onoono ki te MF A5.
Io me “fakamaluga.”
Io me “faipati fakamatamata ki.”
Io me “faipati fakamatamata ki.”
Onoono ki te MF A5.