Te Tusi ki te Kau i Kolose 4:1-18

  • Manatu fesoasoani mō matai (1)

  • “Tumau i te ‵talo malosi” (2-4)

  • Tumau i te sasale mo te poto e uiga ki tino i tua (5, 6)

  • Alofaaga fakaoti (7-18)

4  A koutou e matai, ke fai ne koutou a te mea tonu kae ‵tau ki otou pologa, me e iloa ne koutou me e isi foki se otou Matai i te lagi.+  Tumau i te ‵talo malosi+ kae ke ala faeloa koutou mo te loto fakafetai.+  Ke ‵talo foki koutou mō matou,+ ko te mea ke ‵tala mai ne te Atua se mataloa mō te muna ke mafai ne matou o folafola atu a te mea ‵funa kae tapu e uiga ki te Keliso, telā ko ala ei au o ‵pei ki te falepuipui,+  kae ke mafai ne au o talai faka‵lei atu te mea tenā e pelā eiloa mo te mea e ‵tau o fai ne au.  Tumau i te sa‵sale mo te poto e uiga ki tino i tua, mai i te fakaaogaga otou taimi* ki toe mea aoga.+  Ke fai faeloa otou pati ke ‵tagi ‵lei, ke faka‵kona ki te masima+ ko te mea ke iloa ne koutou te auala e ‵tau ei o tali atu ki tino taki tokotasi.+  A Tukasi,+ toku taina pele kae se tavini fakamaoni mo se pologa i te Aliki, ka fai atu ne ia ki a koutou a tala katoa e uiga ki a au.  Ko uga atu ne au a ia ki a koutou ko te mea ke iloa ne koutou a mea katoa e uiga ki a matou, kae ke fakamafanafana atu foki ki otou loto.  Ka olo atu lāua mo Onosemu,+ toku taina fakamaoni kae pele, telā se tino foki mai i a koutou; ka fai atu ne lāua ki a koutou a mea katoa kolā e ‵tupu i konei. 10  Ko ‵moli atu alofaaga o Alitako,+ toku taugasoa telā e ‵loka fakatasi māua i te falepuipui, e pelā foki mo Maleko+ te fakataina o Panapa (telā ne fakatonu atu ke talia ne koutou a ia+ māfai e fanatu ki a koutou), 11  mo Iesu telā e fakaigoa foki ki a Tiasitasi, mai tino pilitome. Ko latou fua konei e ga‵lue fakatasi matou mō te Malo o te Atua kae ne fai latou mo fai se fakamafanafanaga lasi ‵ki ki a au. 12  Ko ‵moli atu a alofaaga o Epafala,+ se pologa a Keliso Iesu telā se tino foki mai i a koutou. E ‵talo malosi faeloa a ia mō koutou, ko te mea ke tumau koutou ke oko eiloa ki te fakaotiga i te tali‵tonu fakamaoni ki mea katoa kolā e loto ki ei te Atua. 13  E molimau atu eiloa au e uiga ki a ia me e uke ana taumafaiga e fai mō koutou e pelā foki mo latou kolā i Laotikaia mo Hialapoli. 14  Ko ‵moli atu alofaaga o Luka+ te tokita fagasele ki a koutou, e pelā foki mo Tema.+ 15  ‵Moli atu oku alofaaga ki taina i Laotikaia e penā foki loa mo Numefa mo te fakapotopotoga i tena fale.+ 16  Kae kafai ko oti ne faitau te tusi tenei i a koutou, fai ke faitau+ atu foki ki te fakapotopotoga i Laotikaia kae ke faitau atu foki te tusi mai Laotikaia ki a koutou. 17  Fai atu foki ki a Akepasi+ penei: “Saga tonu atu ki te galuega ne talia ne koe mai te Aliki, ko te mea ke fakataunu te mea tenā.” 18  Konei oku alofaaga, ko alofaaga o Paulo ne tusi ki toku lima eiloa.+ Ke masaua faeloa ne koutou oku pikifao i te falepuipui.+ Ke i luga i a koutou a te alofa tauanoa o te Atua.

Fakamatalaga mai lalo

Eleni, “‵togi te taimi tonu.”