Te Tusi ki te Kau i Kolose 2:1-23

  • Te mea ‵funa kae tapu a te Atua, ko Keliso (1-5)

  • Fakaeteete i tino fakaloiloi tino (6-15)

  • Te mea tonu eiloa ko te Keliso (16-23)

2  Me e manako au ke iloa ne koutou a te uke o aku taumafaiga e fai mō koutou e pelā foki mo latou kolā i Laotikaia+ mo latou kolā e seki lavea aka eiloa ne latou au.  E fai ne au te mea tenei ko te mea ke fakamafanafana atu ki olotou loto,+ ke ‵kau fakatasi latou i te alofa+ kae ke maua ne latou a maumea katoa kolā e iku mai i te katoatoa o te lotou malamalama, ko te mea ke maua te iloaga tonu o te mea ‵funa kae tapu a te Atua, telā ko Keliso.+  Ne ‵funa faka‵lei aka i loto i a ia a koloa katoa o te poto mo te iloaga.+  E fai atu ne au te mea tenei ke seai se tino e fakaloiloi ne ia koutou ki olotou kinauga faka‵se tino.  E tiga eiloa e galo au mai i a koutou, kae ko toku loto e nofo eiloa i a koutou mo te fiafia ke lavea atu a te fanofano ‵lei o koutou+ mo te ‵mautakitaki o te otou fakatuanaki i a Keliso.+  Tela la, ona ko te mea ko oti ne talia ne koutou a te Aliki ko Keliso Iesu, tumau la i te sa‵sale fakatasi mo ia,  mai te ‵mau otou aka kae ati aka i luga i a ia+ mo te tumau i te fakatuanaki,+ e pelā eiloa mo akoakoga ne fai atu ki a koutou, kae ke ‵fonu i te loto fakafetai.+  Fakaeteete ke seai se tino e fakapologa ne ia koutou ki poto faka-te-lalolagi mo takolekolega sē aoga+ e ‵tusa mo tuu mo aganuu a tino, e ‵tusa mo kilokiloga fakavae o te lalolagi kae e se ki a Keliso;  me e maua i loto i a Keliso a te katoatoaga o uiga o te Atua.+ 10  Tela la, ko maua ne koutou a te katoatoaga e auala i a ia, telā ko te ulu o malo mo pulega katoa.+ 11  E auala i te otou fesokotakiga mo ia, ne pilitome foki koutou i te pilitome telā e se fai ki lima mai te ‵katiga o ‵kano o te foitino,+ kae ne pilitome ki te pilitome a Keliso.+ 12  Me i a koutou ne tanu fakatasi mo ia i tena papatisoga,+ kae e auala i te otou fesokotakiga mo ia ne toe faka‵tu+ fakatasi aka foki koutou e auala i te otou fakatuanaki ki galuega ‵mana a te Atua, telā ne fakatu aka ne ia a Iesu mai te mate.+ 13  E se gata i ei, e tiga eiloa ne ‵mate koutou i otou agasala kae seki pilitome koutou i te foitino, ne fakaola aka koutou ne te Atua fakatasi mo ia.+ Ne fakamagalo ne ia mo te kaimalie a ‵tou agasala katoa,+ 14  kae ‵solo kea‵tea te tulafono telā ne tusi ki lima+ ke ‵teke mai ki a tatou,+ telā e aofia i ei a fakatonuga mo fakamasinoga.+ Ne ave ne ia kea‵tea te mea tenā e auala i te ‵tukiga ki luga i te pou fakasaua.*+ 15  Ko oti ne fakatakavale ne ia a malo mo olotou pulega kae tuku faka‵sau atu ki mua o tino katoa,+ kae takitaki atu latou i te solo o te manumalo e auala i te mea tenā.* 16  Tela la, ke mo a ma fakamasino atu se tino ki a koutou e uiga ki mea e ‵kai mo mea e inu ei koutou,+ io me e uiga ki te fakamanatuga o se ‵kaiga fiafia io me ko te masina sae+ io me se sapati.+ 17  A mea konā se ata fua o mea kolā ka oko mai,+ kae ko te mea tonu eiloa ko te Keliso.+ 18  Ke mo a ma ave kea‵tea ne se tino a te failoga+ mai i a koutou, ko te tino telā e fiafia ki te loto maulalo fakaloiloi mo se vaegā tapuakiga ki te kau agelu, kae “e tu ‵mautakitaki a ia”* i mea ko oti ne lavea ne ia. E ‵fete fua te mafaufau o te tino tenā i manatu faka-te-foitino, 19  kae e se ‵piki ‵mau a ia ki te ulu,+ ko te ulu telā e maua mai i ei a mea katoa kolā e manakogina ne te foitino, kae e fusi fakatasi ne sokogā ivi mo uaua, kae e fai ne ia ke ola aka te foitino i te ola telā e tuku mai ne te Atua.+ 20  Kafai ne ‵mate fakatasi koutou mo Keliso e uiga ki kilokiloga fakavae o te lalolagi,+ kaia la koi ola ei koutou e pelā me ne vaega o te lalolagi mai te faka‵logo ki fakatonuga konei:+ 21  “Sa fakapatele, io me tami, io me puke ki ei,” 22  telā e fakasino ki mea katoa kolā ka fakaseai atu fakatasi mo olotou aoga e ‵tusa mo fakatonuga mo akoakoga a tāgata?+ 23  E tiga eiloa e foliga mai a mea konā me e maua i ei te poto i se tapuakiga telā ne ‵fatu ne tino mo te loto maulalo fakaloiloi mo te fakafi‵taga o te foitino,+ e seai eiloa ne aoga o mea konei i te taua ke manumalo i manakoga o te foitino.

Fakamatalaga mai lalo

Onoono ki te FP.
Io me kati, “i a ia.”
Ne siki mai i tala mua fapaupau.