Kenese 9:1-29

  • Fakatonuga mō tino katoa (1-7)

    • Te tulafono e uiga ki te toto (4-6)

  • Te feagaiga e uiga ki te nuanua (8-17)

  • Valoaga e uiga ki tino i te gafa o Noa (18-29)

9  Ne fakamanuia ne te Atua a Noa mo ana tama tāgata kae fai atu ki a latou: “Ke fanafanau kae ke fakatokouke kae ke faka‵fonu a te lalolagi ki otou fanau.+  Ka ma‵taku kae pole‵pole faeloa i a koutou a mea ola katoa o te lalolagi mo manu eva katoa o te lagi, mo so se mea ola e gasuesue i te laukele mo ika katoa o te tai. Ko tuku atu nei a mea konā ki otou lima.*+  A manu katoa kolā e gasue‵sue e mafai o fai pelā me ne meakai ma koutou.+ E pelā eiloa mo te tukuatuga ne au a lakau kaina katoa ki a koutou, ko tuku atu ne au a mea katoa konā ki a koutou.+  Ko ‵kano fua o te manu kolā koi isi ne toto i ei,+ telā ko tena ola, e se ‵tau mo koutou o ‵kai ki ei.+  I tafa i ei, ka avatu ne au te taui ma sui mō otou toto.* Ka avatu ne au te taui ma sui ki so se mea ola e tamate ne ia koutou; kae ka avatu ne au te taui ma sui ki so se tagata e tamate ne ia tena taina.+  So se tino e fakamaligi ne ia te toto o se tagata, ka fakamaligi foki tena toto ne te suā tagata,+ me ne faite ne Ia a te tagata ki foliga o te Atua.+  Kae e pelā mo koutou, ke fanafanau kae ke fakatokouke, ko te mea ke tokouke malosi koutou ke faka‵fonu a te lalolagi.”+  Tenā ne fai atu ei a te Atua ki a Noa mo ana tama:  “Ko fai nei ne au se feagaiga mo koutou+ mo otou tama mai tua o koutou, 10  mo mea ola katoa kolā e ‵nofo tasi mo koutou, ko manu eva, manu vae fa, mo mea ola katoa o te lalolagi kolā e ‵nofo tasi mo koutou, ko mea katoa kolā ne ulu mai ki tua mo te vaka​—ko mea ola katoa i te lalolagi.+ 11  Ao, ko fai ne au taku feagaiga mo koutou: Ka se toe fakaseai eiloa a mea ola katoa e auala i se lolo, kae ka se toe fakamasei eiloa a te lalolagi i se lolo.”+ 12  Ne toe fakaopoopo atu a te Atua: “Tenei te fakailoga o te feagaiga telā ka fai ne au i toku va mo koutou mo mea ola katoa kolā e ‵nofo tasi mo koutou, mō kautama katoa i aso mai mua. 13  Ka fakatu ne au taku nuanua i loto i te kaumana, kae ka fai a te mea tenā e pelā me se fakailoga o te feagaiga i toku va mo te lalolagi. 14  So se taimi e fakatu ei ne au se kaumana mai luga i te lalolagi, kae ka sae aka se nuanua mai te kaumana tenā. 15  Kae ka masaua eiloa ne au a taku feagaiga telā ne fai ne au i toku va mo koutou mo mea ola kese‵kese katoa; kae ka se toe ai eiloa se lolo e fakamasei ne ia a mea ola katoa.+ 16  Kae ka sae aka te nuanua i te kaumana, ka lavea ne au te mea tenā kae masaua te feagaiga ki te se-gata-mai ne fai i te va o te Atua mo mea ola kese‵kese katoa i luga i te lalolagi.” 17  Ne toe fai atu a te Atua ki a Noa: “Tenei te fakailoga o te feagaiga ka fai ne au i toku va mo mea ola katoa i te lalolagi.”+ 18  A tama a Noa kolā ne o‵mai ki tua mo te vaka ko Semu, Hamo mo Iafeta.+ Fakamuli ifo, ne fai a Hamo mo fai te tamana o Kanana.+ 19  A latou konei ko tama tāgata e tokotolu a Noa, kae ko tino katoa o te lalolagi ne ‵tupu mai i a latou kae salalau atu ki te lalolagi.+ 20  Ne kamata o galue a Noa e pelā me se tino ‵toki lakau, kae ne ‵toki ne ia se togavine. 21  I te taimi ne inu ei a ia ki uaina ne konā a ia, ne tapale ana gatu i loto i tena faleie kae nofo fuafua. 22  A Hamo, te tamana o Kanana, ne lavea ne ia a tena tamana e nofo fuafua, fakailoa atu ei ne ia ki ana taina e tokolua kolā e ‵nofo i tua. 23  Tenā ne puke ei ne Semu mo Iafeta se gatu ‵loa, taofi i lā tuauma kae ‵fuli lā tua o sa‵sale ki loto. Ne pulou ne lāua te lā tamana telā e nofo fuafua mo lā mata e ‵kilo fakaa‵tea, kae ne seki lavea eiloa ne lāua a te lā tamana e nofo fuafua. 24  I te taimi ne ala aka ei a Noa kae ko se konā, kae iloa aka ne ia a te mea ne fai ne tena tama toekimuli ki a ia, 25  ana muna: “Ke malaia a Kanana.+ Ke fai a ia mo fai te ‵toe pologa sē taulia ki ana taina.”+ 26  Kae ne toe fakaopoopo atu a ia: “Ke vikia a Ieova, te Atua o Semu,Kae ke fai a Kanana mo fai tena pologa.+ 27  Ke tuku atu ne te Atua ki a Iafeta se laukele lasi ‵ki,Kae ke nofo a ia i loto i faleie o Semu. Ke fai foki a Kanana mo fai tena pologa.” 28  Ne ola a Noa i tausaga e 350 mai tua o te Lolo.+ 29  E ‵tusa mo te 950 a tausaga o te olaga o Noa, mate ei a ia.

Fakamatalaga mai lalo

Io me “ko tuku atu ki lalo i te otou pulega.”
Io me “te toto o otou ola.”