Kenese 50:1-26

  • Ko tanu ne Iosefa a Iakopo i Kanana (1-14)

  • Ko fakamautinoa ne Iosefa a tena fakamagaloga (15-21)

  • Aso fakaotioti o Iosefa mo tena mate (22-26)

    • Fakatonuga a Iosefa e uiga ki ana ivi (25)

50  Tenā ne fakasiga atu ei a Iosefa ki luga i tena tamana+ kae tagi mautuutu i luga i a ia kae sogi atu ki a ia.  Mai tua ifo i ei, ne fakatonu atu a Iosefa ki ana tavini, ko tokitā, ke fakatoka* te foitino o tena tamana.+ Tenā ne fakatoka ei ne tokitā te foitino o Isalaelu,  kae ne fai ne latou te mea tenā i aso e 40, me tenā eiloa te vaitaimi e fakatoka ei te foitino, kae ne ‵tagi faeloa a tino Aikupito ki a ia i aso e 70.  I te taimi ne oti ei a aso o te fanoanoa o Iakopo, ne faipati atu a Iosefa ki ofisa* a te Falao, ana muna: “Kafai e fia‵fia mai koutou ki a au, fai atu la te fekau tenei ki te Falao,  ‘Ne fai mai toku tamana ke tauto atu au ki a ia,+ ana muna: “Kiloke! Au ko pili o mate.+ E ‵tau o tanu ne koe au i toku tanuga,+ telā ko oti ne fakatoka ne au i te fenua o Kanana.”+ Fakamolemole, talia mai ke fano au o tanu toku tamana, ko toe foki mai ei au.’”  Ne tali atu te Falao: “Fano o tanu tou tamana e pelā eiloa mo tau tautoga ki a ia.”+  Tenā ne fano ei a Iosefa o tanu tena tamana, kae ne olo mo ia a tavini katoa a te Falao, ko toeaina+ i tena palesi mo toeaina katoa i te fenua o Aikupito,  mo te kaukāiga katoa o Iosefa mo ana taina mo te kaukāiga o tena tamana.+ Ko olotou tama‵liki fo‵liki fua mo olotou lafu mamoe mo olotou lafu manu ne tuku i te fenua o Kosena.  Ne olo atu foki mo latou a kaliota+ mo tāgata faka‵tele solofanua, kae ne tokouke ‵ki te lotou kaumalaga. 10  Tenā ne oko atu ei latou ki te koga tuki saito o Ataata, i te kogā koga o te Iolitana, kae ne fanoa‵noa malosi latou i ei, kae ne fanoanoa faeloa a Iosefa mō tena tamana i aso e fitu i konā. 11  Ne lavea ne tino Kanana a latou e fanoa‵noa i te koga tuki saito o Ataata, kae ne fai aka latou: “A te mea tenei se mea fakafanoanoa lasi ‵ki mō tino Aikupito!” Tenā te pogai ne fakaigoa ei te koga tenā ki a Apela-misalaima,* i te kogā koga o te Iolitana. 12  Tela la, ne fai eiloa ne tama tāgata a Iakopo a mea katoa kolā ne fakatonu atu ne ia ki a latou.+ 13  Ne ave a ia ne ana tama tāgata ki te fenua o Kanana kae tanu ne latou a ia i te ana i te manafa telā e tu i Makapelu, ko te manafa i mua o Mamele telā ne ‵togi ne Apelaamo mai i a Efelona te tino Heti mō tanu ana tino ‵mate.+ 14  I te otiga ne tanu ne ia tena tamana, ne toe foki a Iosefa ki Aikupito fakatasi mo ana taina mo tino katoa kolā ne olo mo ia o tanu tena tamana. 15  I te mateaga ne taina o Iosefa me ko mate te lotou tamana, olotou muna: “Kāti koi nofo eiloa a Iosefa mo tena loto ita ki a tatou, kae ka taui mai ne ia ki a tatou a mea ma‵sei katoa kolā ne fai ne tatou ki a ia.”+ 16  Ne avatu ne latou se fekau ki a Iosefa penei: “Ne tuku mai ne tou tamana a te fakatonuga tenei kae koi tuai a ia o mate: 17  ‘Konei a pati e ‵tau o fai atu ne koutou ki a Iosefa: “Au e fakamolemole atu ke fakamagalo ne koe a te agasala a ou taina telā ne fai ke fakalogo‵mae atu ki a koe.”’ Nei la, fakamolemole fakamagalo mai te agasala a tavini a te Atua o tou tamana.” Kae ko Iosefa ne tagi mautuutu i te taimi ne fai‵pati atu ei latou ki a ia. 18  Tenā ne olo atu foki ana taina kae ifo i ana mua kae fai atu: “Konei a matou ke fai mo fai au pologa!”+ 19  Muna a Iosefa ki a latou: “Sa ma‵taku. E a, au nei ko te Atua ke fakamasino ne au koutou? 20  E tiga eiloa ne ma‵nako koutou o ta au,+ kae ne fai eiloa ne te Atua se mea ‵lei ke tausi ei a ola o tino e tokouke, e pelā eiloa mo te mea e fai ne ia i aso nei.+ 21  Tela la, sa ma‵taku. Ka avatu faeloa ne au a meakai ma koutou mo otou tama‵liki fo‵liki.”+ Tenā ne fakamafanafana atu ei a ia ki a latou kae faipati atu mo te loto talitonu ki a latou. 22  Kae ne nofo faeloa a Iosefa i Aikupito, ko ia mo tino katoa i te kaukāiga o tena tamana. Kae ne ola a Iosefa i tausaga e 110. 23  Kae ne matea ne Iosefa a mokopuna o Efalaima,+ e pelā foki mo tama a Makila+ te tama tagata a Manase. Ne fa‵nau latou e pelā eiloa me ne tama tonu a Iosefa.* 24  Fakamuli ifo, ne fai atu a Iosefa ki ana taina: “Au ko pili o mate, kae e seai se fakalotolotolua me ka saga atu eiloa a te Atua ki a koutou,+ kae ka ave ne ia a koutou mai te fenua tenei ki te fenua telā ne tauto atu ei a ia ki a Apelaamo, Isaako, mo Iakopo.”+ 25  Ne fai ne Iosefa ke tauto atu ki a ia a tama a Isalaelu, ana muna: “E seai se fakalotolotolua me ka saga atu eiloa te Atua ki a koutou. Tela la, e ‵tau o puke ne koutou oku ivi o ave kea‵tea mai konei.”+ 26  Kae ne mate a Iosefa kae ko 110 ana tausaga. Ne fakatoka ne latou tena foitino ke se pala,+ kae tuku atu ki loto i tena pusa i Aikupito.

Fakamatalaga mai lalo

Ke fakaaoga a sinu ma‵nogi ke fai ei ke mo a ma pala te foitino o te tino mate.
Io me “kaukāiga.”
Tena uiga “Te Taimi Fanoa‵noa o Tino Aikupito.”
Epelu, “ne fa‵nau i luga i tulivae o Iosefa.”