Kenese 48:1-22

  • Ko fakamanuia ne Iakopo a tama tāgata e tokolua a Iosefa (1-12)

  • Ko maua ne Efalaima a fakamanuiaga e uke atu (13-22)

48  I te otiga o mea konei, ne avatu te fakailoaga ki a Iosefa: “Kiloke, a tou tamana ko gasolo o vāivāi.” Tenā ne puke ei ne ia ana tama tāgata e tokolua ko Manase mo Efalaima ke olo mo ia.+  Ne avatu te fakailoaga ki a Iakopo: “A tau tama tagata ko Iosefa tenei ko vau ki a koe.” Tenā ne fakamalosi ei a Isalaelu o nofotu aka i luga i tena moega.  Kae ne fai atu a Iakopo ki a Iosefa: “Ne fakasae mai a te Atua Malosi Katoatoa ki a au i Lusā i te fenua o Kanana kae fakamanuia ne ia au.+  Ana muna ki a au, ‘Ka fai ne au a koe ke fua malosi mai, ka fakatokouke ne au tou gafa, ka fai ne au koutou mo fai ne tino e tokouke+ kae ka tuku atu ne au a te fenua tenei ki au tama* mai ou tua ke fai mō latou ki te se-gata-mai.’+  Au tama tāgata kolā ne fa‵nau i te fenua o Aikupito kae koi tuai o vau au ki a koe i konei i Aikupito, ka fai mo fai aku tama.+ A Efalaima mo Manase ka fai mo fai aku tama e pelā eiloa mo aku tama ko Leupena mo Simeona.+  Kae ko au tama‵liki kolā ka fa‵nau mai tua o lāua ka fai mo fai au tama. Ka maua ne latou se vaega o te laukele telā e maua ne olotou taina ke fai mo fai te lotou tofi.+  Kae penei mo au, i te taimi ne vau ei au mai Patana, ne mate a Lasela+ i oku tafa i te fenua o Kanana kae koi tai ‵mao eiloa te auala ki Efalata.+ Tenā ne tanu ei ne au a ia i konā i te auala ki Efalata, telā ko Peteleema.”+  Ne lavea ne Isalaelu a tama tāgata a Iosefa kae fesili atu: “Ko oi a tama‵liki konei?”  Ne fai atu a Iosefa ki tena tamana: “Ko aku tama tāgata kolā ne tuku mai ne te Atua ki a au i te koga tenei.”+ Kae ne fai atu a Iakopo, “Fakamolemole, aumai lāua ki a au ke fakamanuia ne au a lāua.”+ 10  A mata o Isalaelu i te taimi nei ko gasolo o se ‵kite ona ko te matua, kae ko se lavea foki ne ia a mea. Tenā ne avatu ei ne Iosefa a lāua ki a ia, uma atu a ia ki ei kae ‵sai atu ki a lāua. 11  Ne fai atu a Isalaelu ki a Iosefa: “Au seki mafaufau me ka toe lavea ne au ou mata,+ kae ko oti foki ne fai ne te Atua ke lavea ne au au tama.”* 12  Tenā ne puke mai ei ne Iosefa ana tama mai vae o Isalaelu, punou ifo ei a ia ki lalo. 13  Ne puke ne Iosefa a lāua, ko Efalaima+ i tena lima fakaatamai ki te feitu fakamaui o Isalaelu, kae ko Manase+ i tena lima fakamaui ki te feitu fakaatamai o Isalaelu, kae avatu ne ia a lāua ki a Isalaelu. 14  Kae ko Isalaelu, ne tuku atu tena lima fakaatamai ki luga i te ulu o Efalaima, telā ko te tamaliki foliki, kae ne tuku atu tena lima fakamaui ki luga i te ulu o Manase. Ne tuku atu ana lima mo te mautinoa ki luga i a lāua konei, faitalia me e iloa ne ia i a Manase ko te tamaliki matua.+ 15  Kae ne fakamanuia ne ia a Iosefa, ana muna:+ “A te Atua tonu telā ne sa‵sale fakatasi mo oku tupuga ko Apelaamo mo Isaako,+Ko te Atua tonu telā ne tausi ne ia au i toku olaga kātoa ke oko mai eiloa ki te aso nei,+ 16  A te agelu telā ne fakasao ne ia au mai puapuaga katoa,+ ke fakamanuia ne ia a tama‵liki tāgata konei.+ Ke fakaigoa lāua ki toku igoa mo igoa o oku tupuga ko Apelaamo mo Isaako,Ke fakatokouke a lā fanau i te lalolagi.”+ 17  I te taimi ne lavea ei ne Iosefa me ne tuku ne tena tamana a tena lima fakaatamai i luga i te ulu o Efalaima, ne seki fiafia a ia ki ei, kae ne taumafai o puke te lima o tena tamana kea‵tea mo te ulu o Efalaima kae ke tuku atu ki te ulu o Manase. 18  Ne fai atu a Iosefa ki tena tamana: “Ikai e toku tamana, tenei te toekimua.+ Tuku tou lima fakaatamai ki luga i tena ulu.” 19  Kae ne ita faeloa tena tamana kae fai atu: “E iloa ne au, e taku tama, e iloa ne au. Ka tokouke foki tena gafa kae ka takutakua foki a ia. Kae ka sili atu te takutakua o tena taina foliki i lō ia,+ kae ko ana tama ka mafai o māfua mai i a latou a atufenua e uke.”+ 20  Kae ne tumau eiloa a ia i te fakamanuia atu ki a lāua i te aso tenā,+ ana muna: “Ke taku ne tino Isalaelu a tou igoa māfai ko fai olotou fakamanuiaga penei,‘Ke fai ne te Atua a koe e pelā mo Efalaima kae e pelā foki mo Manase.’” Tela la, ne fakamuamua faeloa ne ia a Efalaima i lō Manase. 21  Tenā ne fai atu ei a Isalaelu ki a Iosefa: “Kiloke, au ko pili o mate,+ kae ko te Atua ka fakatasi atu faeloa ki a koutou kae ka toe faka‵foki ne ia koutou ki te fenua o otou tupuga.+ 22  Kae pelā mo au, ka tuku atu ne au ki a koe se vaega e tasi o te fenua ke silia atu i vaega o ou taina, ko te fenua telā ne puke mai ne au mai i tino Amoli e auala i taku pelu mo taku kausana.”

Fakamatalaga mai lalo

Epelu, “fanau.”
Epelu, “fanau.”