Kenese 45:1-28

  • Ko fakaasi atu ne Iosefa a ia (1-15)

  • Ko ‵foki a taina o Iosefa ki a Iakopo (16-28)

45  Ko se mafai eiloa ne Iosefa o fa‵ki tena tagi i mua o ana tavini katoa.+ Ne kalaga atu a ia: “Fai ki tino katoa ke olo ki tua mai i konei!” E seai eiloa se tino ne nofo atu i konā i te taimi ne fakaasi atu ei ne Iosefa me ko oi a ia ki ana taina.+  Tenā ne kamata ei a ia o tagi malosi ki luga, lagona ei ne tino Aikupito kae ne oko atu foki te tala tenā ki te palesi o te Falao.  Fakamuli loa, ne fai atu a Iosefa ki ana taina: “Au ko Iosefa. E a, koi ola toku tamana?” Kae ne seki mafai ne ana taina o tali atu ki a ia me ne ‵poi masei latou i a ia.  Ne fai atu a Iosefa ki ana taina: “Fakamolemole mumea mai ki oku tafa.” Tenā ne mumea atu ei a latou ki a ia. Ne fai atu a ia: “Au ko Iosefa te otou taina telā ne fakatau atu ne koutou ki tino Aikupito.+  Kae ke mo a ma manava‵se io me kaitāua koutou ki a koutou eiloa me ne fakatau mai ne koutou au ki konei; me ko te Atua eiloa ne uga mai ne ia au ke mua i a koutou ko te mea ke faka‵sao ei a ola o tino.+  Tenei te lua tausaga o te oge i te fenua,+ kae e toe lima tausaga e seai ei ne tino e ‵toki kae ‵kati saito.  Kae ne uga mai au ne te Atua ke mua i a koutou ko te mea ke fakatumau ne au te otou gafa+ i te lalolagi* kae ke tumau koutou i te ola e auala i se faka‵saoga lasi.  Tela la, e se ko koutou ne aumai ne koutou au ki konei, kae ko te Atua tonu eiloa, ko te mea ke ‵tofi aka au mo fai se tino fakatonutonu pule* ki te Falao kae ke fai au mo aliki i tena fale kātoa kae ke pule atu foki i te fenua kātoa o Aikupito.+  “‵Foki fakavave ki toku tamana kae fai atu ki a ia, ‘Konei a pati a tau tama tagata ko Iosefa ne fai mai: “Ko oti ne ‵tofi au ne te Atua ke pule i Aikupito kātoa.+ Vau ki a au i konei. Sa fakatalave.+ 10  E ‵tau mo koe o nofo i te fenua o Kosena,+ ko te mea ke pili mai koe ki a au, ko koe, mo au tama tāgata, ou mokopuna, au lafu mamoe, au lafu manu mo au mea katoa. 11  Ka avatu faeloa ne au a meakai ki a koe i konā, me e toe lima a tausaga o te oge.+ Ko te mea ke mo a ma oko atu ki a koe mo tou kāiga mo au mea katoa a te mativa.”’ 12  E lavea mai eiloa ne koutou ki otou mata e pelā foki mo toku taina ko Peniamina me ko au eiloa tenei e faipati atu ki a koutou.+ 13  Tela la, e ‵tau o fakailoa atu ne koutou ki toku tamana a toku tulaga ‵malu i Aikupito mo mea katoa kolā ne lavea ne koutou. Fakavave o puke mai toku tamana ki konei.” 14  Tenā ne ‵sai* atu ei a ia ki tena taina ko Peniamina kae tagi mautuutu, ne tagi foki a Peniamina kae ‵sai atu ki tena ua.+ 15  Ne uma atu a ia ki ana taina katoa kae tagi, oti aka fai‵pati ei a ia mo ana taina. 16  Ne oko atu a te tala tenā ki te palesi o te Falao: “Ko oti ne oko mai a taina o Iosefa!” Kae ne fia‵fia a te Falao mo ana tavini ki te tala tenā. 17  Ne fai atu a te Falao ki a Iosefa: “Fai atu ki ou taina, ‘Fai te mea tenei: Fakauta otou amoga ki luga i manu kae olo ki te fenua o Kanana, 18  kae puke mai te otou tamana mo otou kāiga katoa kae o‵mai ki a au i konei. Ka tuku atu ne au ki a koutou a mea ‵lei katoa i te fenua o Aikupito; kae ka ‵kai* koutou ki toe meakai ‵gali* o te fenua.’+ 19  Kae e fakatonu atu au ke fai koe ki a latou:+ ‘Fai a te mea tenei: Puke ne ka+ mai te fenua o Aikupito mo aumai otou tama‵liki mo otou avaga, kae aumai foki te otou tamana i te suā ka kae o‵mai ki konei.+ 20  Sa manava‵se ki otou kope,+ me ka fai ma koutou a mea ‵lei katoa i te fenua o Aikupito.’” 21  Ne fai eiloa ne tama tāgata a Isalaelu a te mea tenā, kae ne tuku atu ne Iosefa ki a latou a ka e ‵tusa loa mo te fakatonuga a te Falao, kae tuku atu foki ne ia olotou meakai mō te malaga. 22  Ne tuku atu foki ne ia ki a latou taki tokotasi ne gatu tala mō latou, kae ne tuku atu ne ia ki a Peniamina e 300 tupe siliva kae lima ana gatu tala.+ 23  Kae ne ave ne ia ki tena tamana a mea konei: e sefulu asini kolā ne fakauta ki mea ‵lei mai Aikupito kae sefulu asini fāfine ne fakauta ki saito mo falaoa mo nisi meakai mō te malaga a tena tamana. 24  Ne uga atu ne ia ana taina ke olo, kae i te ologa, ne fai atu a ia ki a latou: “E tapu koutou e taua i te auala.”+ 25  Tenā ne olo ei latou mai Aikupito kae oko atu ki te fenua o Kanana ki te lotou tamana ko Iakopo. 26  Ne fai atu latou ki a ia: “A Iosefa koi ola, kae ko ia nei e pule i te fenua kātoa o Aikupito!”+ Ne poi masei a ia kae e seki talitonu ki a latou.+ 27  Kae i te taimi ne fai atu ei ne latou ki a ia a pati katoa a Iosefa ne fai atu ki a latou, kae lavea foki ne ia a ka kolā ne aumai ne Iosefa ke avatu a ia i ei, kamata ei o maua ne te lotou tamana ko Iakopo a te loto malosi. 28  Ne fai atu a Isalaelu mo te fiafia: “Ko lava i ei! Ko iloa ne au i taku tama ko Iosefa koi ola! E ‵tau mo au o fano ke lavea ne au a ia kae koi tuai au o mate!”+

Fakamatalaga mai lalo

Io me “i te fenua.”
Epelu, “e pelā me se tamana.”
Epelu, “ki tena ua.”
Io me “ola.”
Io me “gako.”