Kenese 44:1-34

  • Te ipu siliva a Iosefa i te taga a Peniamina (1-17)

  • Te fakatagi a Iuta mō Peniamina (18-34)

44  Fakamuli ifo, ne fakatonu atu a Iosefa ki te tagata e tausi i tena fale: “Faka‵fonu a taga a tāgata konā ki meakai ki te mea e mafai ne latou o ave, kae tuku atu a tupe a latou ki loto i olotou taga takitasi.+  Kae e ‵tau o tuku ne koe taku ipu, te ipu siliva, ki loto i te taga a te toekimuli fakatasi mo ana tupe kolā ne aumai mo ‵togi a meakai.” Ne fai eiloa ne ia te fakatonuga a Iosefa.  I te tafataeao, i te taimi ko maina mai ei, ne uga atu a tāgata konei ke olo mo olotou asini.  Ne seki ‵mao latou mai te fakai kae fai atu a Iosefa ki te tagata telā e tausi i tena fale: “Tu ki luga! Fano o afuli a tāgata konā! Kafai e ‵poa ne koe latou, fai atu ki a latou, ‘Kaia ko taui ei ne koutou a te ‵lei ki te masei?  E se tenei te ipu e inu sāle i ei a toku matai kae fakaaoga ne ia o fakamatala a mea ‵funa? Ko oko eiloa te masei o te mea ne fai ne koutou.’”  Ne ‵poa ne ia latou kae fai atu a pati konā ki a latou.  Kae ne fai atu latou ki a ia: “Kaia ne fai ei ne toku aliki a vaegā pati penā? E se mafai o fai ne au tavini se vaegā mea penei.  A tupe kolā ne maua ne matou i loto i omotou taga ne faka‵foki mai eiloa ne matou ki a koe mai te fenua o Kanana.+ E mafai la pefea ne matou o kaisoa a siliva io me ko aulo mai te fale o tou matai?  Kafai e maua ne koe a te mea tenā i se tino e tokotasi o au pologa, ke tamate la te tino tenā, kae ko matou katoa ka fai mo pologa a tou matai. 10  Kae ne fai atu a ia: “Ke fai eiloa te mea tenā ne fai mai ne koutou: A te tino ne puke ne ia te ipu ka fai mo fai taku pologa, kae ko koutou katoa ka ‵sao.” 11  I konā loa ne tuku fakavave ifo ne latou olotou taga ki lalo kae ‵tala. 12  Ne sukesuke fakamaea ne ia, e kamata mai te toekimua ke oko eiloa ki te toekimuli. Fakamuli loa, kae maua te ipu i loto i te taga a Peniamina.+ 13  Tenā ne saesae ei ne latou olotou gatu kae toe fakauta olotou taga ki luga i olotou asini kae toe ‵foki atu ki te fakai. 14  I te taimi ne olo atu ei a Iuta+ mo ana taina ki te fale o Iosefa, koi nofo mai tou tagata i ei; kae ne faka‵siga ifo latou ki te laukele i ana mua.+ 15  Ne fai atu a Iosefa ki a latou: “Se a te mea tenei ne fai ne koutou? E se iloa ne koutou me e mafai o iloa ne au a mea ‵funa?”+ 16  I konā loa, ne tali atu a Iuta: “Ne a omotou pati ka fai atu ki te motou matai? E mafai pefea o fakatalitonu atu ne matou i a matou ne tino fakamaoni? Ko oti ne iloa ne te Atua tonu a te mea ‵se ne fai ne au pologa.+ Ko fai nei matou mo fai a pologa a toku matai, ko matou mo te tino tenei ne maua i a ia a te ipu! 17  Kae ne fai atu a ia: “E se mafai ne au o fai te mea tenei! A te tagata telā ne maua i ei taku ipu ka fai mo fai taku pologa.+ Kae ko te ‵toega o koutou ka toe ‵foki atu ki te otou tamana mo te filemu.” 18  Ne fakapilipili atu a Iuta ki a ia kae fai atu: “Au e fakamolemole atu ki a koe e toku matai, talia mai ke faipati atu tau pologa ki toku matai, kae ke se kaitaua eiloa koe ki tau pologa, me i a koe e pelā eiloa mo te Falao.+ 19  Ne fesili mai toku matai ki ana pologa, ‘E isi se otou tamana io me se isi taina aka o koutou?’ 20  Ne fai atu matou ki toku matai, ‘E isi se motou tamana telā ko toeaina mo tena tama telā ne fanau mai kae ko toeaina a ia, ko ia eiloa te toekimuli o matou.+ A tena taina ko oti ne mate,+ kae ko ia fua te tama a tena mātua koi ‵toe,+ kae e alofa malosi a tena tamana ki a ia.’ 21  Oti aka, fai mai ei koe ki au pologa, ‘Puke mai a ia ki a au ko te mea ke lavea ne au a ia.’+ 22  Kae ne fai atu matou ki toku matai, ‘E se mafai o tiaki ne te tamaliki tenei a tena tamana. Kafai e tiaki ne ia ko tena tamana eiloa ko mate.’+ 23  Tenā ne fai mai ei koe ki au pologa, ‘E se mafai eiloa o toe lavea ne koutou oku mata, seiloga ke puke mai ne koutou te otou taina foliki ki a au.’+ 24  “Ne olo atu matou ki tau pologa, telā ko toku tamana kae fai atu ki ei a pati katoa a toku matai kolā ne fai mai. 25  Fakamuli ifo, fai mai ei te motou tamana, ‘Toe ‵foki o ‵togi mai ne mu meakai ma tatou.’+ 26  Kae ne fai atu matou, ‘A matou e se mafai o olo. A matou e olo fua māfai e tuku mai te motou taina foliki ke olo mo matou, me e se mafai o toe lavea ne matou a mata o te tagata tenā, seiloga ke puke atu ne matou te motou taina foliki.’+ 27  Tenā ne fai mai ei tau pologa, telā ko toku tamana ki a matou, ‘E iloa ‵lei ne koutou me e tokolua fua aku tama tāgata i taku avaga.+ 28  Kae ne galo atu te tamaliki e tokotasi o lāua, kae ne fai aka au: “Kāti ko oti ne saesae valevale a ia ne se manu fekai!”+ kae seki toe lavea eiloa ne au a ia ke oko mai ki te taimi nei. 29  Kafai foki e puke ne koutou a ia tenei mai i a au kae tupu se fakalavelave ki a ia, ko tuku ifo ei ne koutou oku laulu sinā ki lalo i te Tanuga*+ ona ko te puapuaga.’+ 30  “Kae nei la, kafai e foki atu au ki tau pologa, telā ko toku tamana, e aunoa mo te tamaliki tenei, me e sili atu tena alofa ki te tamaliki tenei i lō tena alofa ki a ia eiloa, 31  kae kafai e lavea ne ia me e galo te tamaliki tenei ko te mea eiloa ko mate a ia, kae ka tuku ifo ne au pologa a laulu sinā o tau pologa, telā ko te motou tamana, ki lalo i te Tanuga ona ko te fanoanoa lasi. 32  Ne fai atu tau pologa ki toku tamana e uiga ki te tamaliki tagata, ana muna, ‘Kafai e se fakafoki mai ne au a ia ki a koe, ko agasala ei au ki toku tamana ki te se-gata-mai.’+ 33  Tela la, fakamolemole tuku tau pologa ke nofo mo fai te pologa a toku matai i lō te tamaliki tagata tenei, ko te mea ke mafai o ‵foki fakatasi atu a ia mo ana taina. 34  E mafai pefea o foki atu au ki toku tamana e aunoa mo te tamaliki tenei? Me e se mafai ne au o kilo atu ki te puapuaga telā ka oko ki toku tamana!”

Fakamatalaga mai lalo

Io me “Seoli,” telā ko te tanuga masani o tino. Onoono ki te FP.