Kenese 43:1-34

  • Te malaga i te lua a taina o Iosefa ki Aikupito; fakatasi mo Peniamina (1-14)

  • Ko toe fetaui a Iosefa mo ana taina (15-23)

  • Te ‵kaiga a Iosefa mo ana taina (24-34)

43  A te oge ko tu poloki eiloa te masei i te fenua.+  Tela la, i te taimi ne palele ei olotou meakai kolā ne ‵togi mai i Aikupito,+ ne fai atu te lotou tamana ki a latou: “Toe ‵foki o ‵togi mai ne mu meakai ma tatou.”  Tenā ne fai atu ei a Iuta ki a ia: “E manino ‵lei te faipatiga a te tagata tenā ki a matou, ‘E se ‵tau o toe matea ne koutou au seiloga ke o‵mai koutou mo te otou taina.’+  Kafai e tuku mai ne koe te motou taina ke olo mo matou, ko olo ei matou o ‵togi mai ne meakai ma koe.  Kafai e se tuku mai ne koe a ia, ka se olo eiloa matou, me ne fai mai a te tagata tenā, ‘E se ‵tau o toe matea ne koutou au seiloga ke o‵mai koutou mo te otou taina.’”+  Kae ne fesili atu a Isalaelu:+ “Kaia ne fakapuapuaga ei ne koutou au mai te fai atu ki te tagata tenā me e isi aka foki se otou taina?”  Ne tali atu latou: “A te tagata tenā ne silisili mai e uiga ki a matou mo omotou kāiga, ana muna, ‘A te otou tamana koi ola? E isi aka foki se otou taina?’ kae ne fakaasi ‵tonu atu ne matou a mea konā ki a ia.+ E mafai pefea o iloa ne matou me ka fai mai a ia, ‘Puke mai te otou taina ki konei’?”+  Tenā ne fakamalosi atu ei a Iuta ki a Isalaelu tena tamana: “Tuku mai te tamaliki ke olo mo au,+ ko te mea ke na olo matou ke mo a ma ‵mate tatou+​—ko matou mo koe mo omotou tama‵liki.+  Ka tausi faka‵lei eiloa ne au a ia.+ Kafai e tupu se mea ki a ia ko fakasala ei ne koe au. Kafai e se fakafoki mai ne au a ia ki a koe, ko agasala ei au ki a koe i taimi katoa. 10  Moi sē ‵lave nei matou, penei ko oti ne olo matou kae toe ‵foki mai fakalua taimi.” 11  Ne fai atu a Isalaelu te lotou tamana ki a latou: “Kafai e penā loa, ke fai la te mea tenei: Puke a toe mea ‵lei eiloa o te ‵tou fenua i loto i otou taga kae avatu e pelā me ne meaalofa ki te tagata tenā:+ ne mu pasama,+ ne mu hani, ko pulu mai lakau mo pulu mai pa‵kili o lakau,+ ko niu piu mo alamoni. 12  Ke puke ne koutou a tupe e fakalua taimi te uke; kae toe faka‵foki atu a tupe kolā ne faka‵foki mai ki loto i otou taga.+ Kāti e isi se mea ‵se ne fai ne latou. 13  Puke te otou taina kae toe ‵foki ki te tagata tenā. 14  Ke fai eiloa ne te Atua Malosi Katoatoa ke alofa atu te tagata tenā ki a koutou, ko te mea ke mafai o fakasaoloto mai ne ia a te otou suā taina fakatasi mo Peniamina. Kae e penei mo au, kafai e ‵tau eiloa o galo saku tama, ko seai la saku mea e mafai o fai ki ei!”+ 15  Tenā ne puke ei ne tāgata konā a te meaalofa tenei, kae puke ne latou a tupe e fakalua taimi te uke e pelā foki mo Peniamina. Ne ‵tu aka latou kae faima‵laga atu i te lotou auala ki Aikupito kae ne toe ‵tu atu latou i mua o Iosefa.+ 16  I te laveaga ne Iosefa a Peniamina mo ana taina, ne fai fakavave atu a ia ki te tagata telā e tausi i tena fale: “Puke a tāgata konei o ave ki te fale, ‵ta ne manu kae fakatoka a meakai, me ka ‵kai fakatasi matou mo tāgata konei i te tutonu.” 17  Ne fai fakavave eiloa ne te tagata tenā a mea kolā ne fakatonu atu ne Iosefa+ kae ne ave ne ia latou ki te fale o Iosefa. 18  Kae ne ma‵taku a latou i te taimi ne ave ei latou ki te fale o Iosefa, kae fai aka latou: “A tatou ko aumai ki konei ona ko tupe kolā ne faka‵foki atu i ‵tou taga i te taimi muamua. Nei la, ka puke ne latou a tatou ke fai e pelā me ne pologa kae ka puke foki ne latou a ‵tou asini!”+ 19  Ne olo atu latou ki te tagata e tausi i te fale o Iosefa kae fai‵pati atu ki a ia i te mataloa o te fale. 20  Olotou muna: “Te motou aliki, fakamolemole loa! A matou ne o‵mai muamua ki konei o ‵togi meakai.+ 21  Kae i te motou okoga ki te koga ne ma‵nava ei matou, ne ‵tala omotou taga kae maua atu omotou tupe i loto i taga takitasi a matou, ko omotou tupe katoa eiloa.+ Kae e ma‵nako matou ke faka‵foki atu a tupe konā. 22  Ne puke mai ne matou a tupe e uke atu ke ‵togi ki ei a meakai. E se iloa ne matou me ko oi ne tuku ne ia omotou tupe ki loto i omotou taga.”+ 23  Kae ne fai atu a ia: “E ‵lei fua. Sa ma‵taku. A te Atua o koutou mo te Atua o te otou tamana ne tuku atu ne ia a tupe konā ki loto i otou taga. Ko oti eiloa ne maua ne au otou tupe.” Oti aka, aumai ei ne ia a Simeona ki a latou.+ 24  Ne ave latou ne te tagata tenā ki loto i te fale o Iosefa kae tuku atu a vai mo ‵fulu olotou vae, kae fagai foki ne ia olotou asini. 25  Kae ne fakatoka ne latou a te meaalofa+ ke tuku atu ki a Iosefa i te tutonu, me ne ‵logo latou i a latou ka ‵kai i konā.+ 26  I te uluatuga a Iosefa ki loto i te fale, ne avatu ne latou te lotou meaalofa ki a ia, kae ne to‵tuli ifo latou o ifo atu i ana mua.+ 27  Oti aka, ne fesili atu a Iosefa me e a latou, kae fai atu: “A koutou ne fai mai i te otou tamana ko matua, e a mai a ia? E a, koi ola a ia?”+ 28  Ne fai atu latou: “A tau tavini tenā ko te motou tamana e malosi faeloa. Koi ola foki a ia.” Kae ne to‵tuli ifo latou o ifo atu ki a ia.+ 29  I tena kiloakaga kae lavea ne ia a Peniamina tena taina, te tama tagata a tena mātua,+ fai atu ei a ia: “Tenei te otou taina, te toekimuli telā ne fai mai koutou e uiga ki ei?”+ Kae ne toe fai atu a ia: “Ke alofa atu a te Atua ki a koe, e taku tama.” 30  Ne fano fakavave a Iosefa ki tua, ona ko te mea ko se ‵kafi ne ia o fa‵ki tena alofa ki tena taina, kae ne ‵sala ki se koga ke tagi ei a ia. Ne fanatu a ia ki se potu tafa ki loto kae tagi i ei.+ 31  Oti aka, ne ‵fulu ana mata kae vau ki tua kae ne mafai o fa‵ki ne ia tena tagi, kae fai atu: “Laulau mai a meakai.” 32  Ne laulau fakaa‵tea ne latou ana meakai, ne laulau fakaa‵tea foki ne latou a meakai a ana taina, e pelā foki mo meakai a tino Aikupito i loto i te fale o Iosefa, me i tino Aikupito e se mafai o ‵kai fakatasi mo tino Epelu, me se mea fakatakalialia a te mea tenā ki tino Aikupito.+ 33  Ne fakasaga‵saga atu ana taina i ana mua, ko te toekimua e ‵tusa eiloa mo tena tulaga toekimua+ ke oko ki te toekimuli e ‵tusa mo tena tulaga toekimuli, kae ne fakatau kilo‵kilo a latou i a latou eiloa mo te ofo. 34  Ne avatu faeloa ne ia a meakai mai tena taipola ki a latou katoa, kae ne fakaopoopo ne ia te vaega o Peniamina e fakalima taimi e uke atu i vaega katoa o nisi tino.+ Ne ‵kai kae inu latou ke oko eiloa ki te taimi ko ma‵kona ei latou.

Fakamatalaga mai lalo