Kenese 42:1-38

  • Ko olo atu a taina o Iosefa ki Aikupito (1-4)

  • Ko fetaui a Iosefa mo ana taina kae tofotofo ne ia latou (5-25)

  • Ko ‵foki ana taina ki a Iakopo (26-38)

42  I te iloaga ne Iakopo me e isi ne meakai* i Aikupito,+ ne fai atu a ia ki ana tama tāgata: “Kaia e fakatau kilo‵kilo ei koutou e aunoa mo se mea e fai?”  Ne toe fai atu a ia: “Au ne logo me e isi ne meakai i Aikupito. Olo ki ei o ‵togi mai ne ‵tou meakai, ko te mea ke mo a ma ‵mate tatou i te fia‵kai.”+  Tenā ne olo ei a taina e tokosefulu o Iosefa+ o ‵togi mai olotou meakai i Aikupito.  Kae ne seki talia ne Iakopo a Peniamina,+ te taina o Iosefa, ke olo mo ana nisi taina me ne fai mai tou tagata: “I te mea ma tupu se fakalavelave ki a ia.”+  Ne olo atu a tama tāgata a Isalaelu fakatasi mo nisi tino kolā ne olo atu o ‵togi olotou meakai, me ko oko atu te oge ki te fenua o Kanana.+  A Iosefa ko te tagata telā e pule i te fenua kātoa,+ kae ko ia foki e fakatau atu ne ia a meakai ki tino katoa i te lalolagi.+ Ne oko mai a taina o Iosefa kae ifo atu i ana mua.+  I te laveaga ne Iosefa ana taina, iloa fakavave ei ne ia latou, kae ne seki fakailoa atu ne ia ki ana taina e uiga ki a ia.+ Ne faipati kaitaua atu a ia ki a latou: “A koutou ne o‵mai mai fea?” kae ne tali atu latou: “Matou ne o‵mai mai Kanana o ‵togi meakai.”+  Ne iloa ne Iosefa me ko ana taina kae e seki iloa ne latou a ia.  Ne masaua fakavave ne Iosefa ana moemiti ne fai e uiga ki a latou,+ kae fai atu ki a latou: “A koutou nei ne sipai! A koutou ne o‵mai o onoono ki feitu vāivāi o te motou fenua!” 10  Kae ne fai atu latou ki a ia: “Ikai, e toku aliki, au tavini ne o‵mai o ‵togi meakai. 11  A matou ko tama tāgata katoa a te tagata e tokotasi. A matou ne tāgata fai mea ‵tonu. Au tavini e se ne sipai.” 12  Kae ne fai atu a ia ki a latou: “Ikai loa! A koutou ne o‵mai o onoono ki feitu vāivāi o te motou fenua!” 13  Kae ne fai atu latou: “Au tavini ne taina e toko 12.+ A matou ko tama tāgata a te tagata e tokotasi+ i te fenua o Kanana, a te toekimuli tenā e ‵nofo mo te motou tamana,+ kae ko te suā taina o matou ko galo.”+ 14  Muna a Iosefa ki a latou: “E pelā eiloa mo aku pati ne fai atu ki a koutou​—‘A koutou ne sipai!’ 15  Tenei te auala ka tofotofo ei koutou: E tauto atu au i te igoa o te Falao, me ka se mafai o tiaki ne koutou a te koga tenei seiloga ke aumai ne koutou te otou taina foliki ki konei.+ 16  Uga atu se tino e tokotasi i a koutou ke puke mai te otou taina, kae ko te ‵toega o koutou ka tausi i konei. I te auala tenei ka fakamaoni aka ei me e ‵tonu eiloa koutou me ikai. Kae kafai koutou e ‵loi, ko iloa tonu ei ne au i a koutou ne sipai.” 17  Ne tausi eiloa ne ia a latou i te falepuipui i aso e tolu. 18  Ne fai atu a Iosefa ki a latou i te tolu o aso: “Fai te mea tenei ke ola ei koutou, me i a au e mataku ki te Atua. 19  Kafai a koutou e fai mea ‵tonu, ke nofo la se taina e tokotasi o koutou e pelā me se pagota, kae olo te ‵toega o koutou o ave a meakai ke fakafeoloolo aka ei te oge i otou kāiga.+ 20  Kafai e aumai ne koutou te otou taina foliki ki a au, ko iloa ei ne au i otou pati e fakatuagagina kae ka se ‵mate eiloa koutou.” Kae ne fai eiloa ne latou a te mea tenā. 21  Kae ne fai ifo a latou ki a latou eiloa: “Ko fakasala eiloa tatou ona ko te ‵tou taina,+ me ne lavea ne tatou tena manavase i te taimi ne fakamolemole mai ei ke a‵lofa atu tatou ki a ia, kae ko tatou ne seki faka‵logo ki ei. Tenā te pogai ko puapuaga ei tatou i te taimi nei.” 22  Tenā ne tali atu ei a Leupena ki a latou: “E a, e seki fai atu au ki a koutou, ‘Sa fai ne koutou se mea ke agasala ei koutou ki te tamaliki tenei,’ kae ne seki faka‵logo mai koutou ki a au?+ Kae nei la ko fakasala tatou ona ko tena toto.”+ 23  Kae e se iloa ne latou i a Iosefa e malamalama i olotou pati me e isi se tino ne ‵fuli ne ia olotou pati. 24  Ne fano a ia kea‵tea mai i a latou kae tagi.+ I tena fokimaiga o toe faipati atu ki a latou, ne puke ne ia Simeona+ mai i a latou, kae saisai i olotou mua.+ 25  Tenā ne fai atu ei te fakatonuga a Iosefa ke faka‵fonu olotou taga ki meakai kae ke faka‵foki a tupe a te tino ki tena taga kae ke tuku atu foki ne meakai ma latou mō te lotou malaga. Ne fai katoa a mea konā mō latou. 26  Ne fakauta ne latou olotou meakai ki luga i olotou asini kae olo. 27  I te taimi ne ‵tala ei ne se tino e tokotasi i a latou tena taga ke fagai tena asini i te koga ne ma‵nava ei latou, ne lavea ne ia ana tupe e ‵tafa eiloa ki luga i tena taga. 28  I konā eiloa kae fai atu a ia ki ana taina: “Aku tupe konei ne faka‵foki mai, konei i loto i taku taga!” Ne manava‵se malosi latou kae pole‵pole i te ma‵taku, kae fai ifo ki a latou eiloa: “Se a te mea tenei ko fai ne te Atua ki a tatou?” 29  I te taimi ne oko atu ei latou ki a Iakopo te lotou tamana i te fenua o Kanana, ne fai atu ne latou ki a ia a mea katoa kolā ne ‵tupu ki a latou, olotou muna: 30  “A te tagata telā e pule i te fenua tenā ne faipati kaitaua mai ki a matou,+ kae ‵losi mai i a matou ne sipai. 31  Kae ne fai atu matou ki a ia, ‘A matou ne tāgata fai mea ‵tonu. A matou e se ne sipai.+ 32  A matou ne taina e toko 12,+ ko tama tāgata a te motou tamana. E tokotasi ko galo,+ kae ko te toekimuli o matou telā e ‵nofo mo te motou tamana i te fenua o Kanana.’+ 33  Kae ne fai mai a te tagata telā e pule i te fenua tenā ki a matou, ‘Tenei te mea ka iloa ei ne au i a koutou e fai mea ‵tonu: Tuku se taina e tokotasi o koutou ke ‵nofo mo au.+ Kae olo o ave ne meakai ke fakafeoloolo aka ei te oge i otou kāiga.+ 34  Kae puke mai te otou taina foliki ki a au, ko iloa ei ne au i a koutou e se ne sipai, kae ne tāgata fai mea ‵tonu. Ko fakafoki atu ei ne au te otou taina ki a koutou, ko fai ei otou pisinisi i te fenua.’” 35  I te ‵ligiifoga ne latou olotou taga meakai ne maua ne latou taki tokotasi olotou taga tupe i loto i ei. I te taimi ne lavea ei ne latou mo te lotou tamana a taga tupe konā, ne ma‵taku eiloa latou. 36  Ne fai atu a Iakopo te lotou tamana ki a latou: “Ko oti ne ave ne koutou aku tama kea‵tea mai i a au!+ Ko galo atu a Iosefa,+ ko galo atu foki a Simeona,+ kae nei ka ave foki ne koutou a Peniamina! Kaia ko ‵tupu ei a mea katoa konei ki a au?” 37  Kae ne fai atu a Leupena ki tena tamana: “Kafai e se fakafoki mai ne au a Peniamina ki a koe, ko tamate la ne koe aku tama tāgata e tokolua.+ Tuku mai ke tausi ne au a ia, kae ka toe fakafoki mai eiloa ne au a ia ki a koe.”+ 38  Kae ne fai atu a ia: “A taku tama ka se olo mo koutou, me ko oti ne mate atu tena taina kae ko ia fua tenei koi ‵toe.+ Kafai e isi se fakalavelave e tupu ki a ia i te otou malaga, ko tuku ifo ei ne koutou oku laulu sinā ki lalo i te Tanuga*+ ona ko te fanoanoa.”+

Fakamatalaga mai lalo

Kāti ne saito io me ne kalite.
Io me “Seoli,” telā ko te tanuga masani o tino. Onoono ki te FP.