Kenese 41:1-57

  • Ko fakamatala ne Iosefa a moemiti a te Falao (1-36)

  • Iosefa ko fakamaluga aka ne te Falao (37-46a)

  • Fakasoasoaga o meakai ne Iosefa (46e-57)

41  E lua tausaga mai tua ifo i ei, ne moemiti a te Falao+ i a ia e tu i tafa o te vaitafe ko te Naila.  Kae ne olo aka a pulumakau ‵gali kae puta‵puta e fitu mai i loto i te vaitafe kae kai‵kai i mouku i tafa o te Naila.+  E isi ne nisi pulumakau fakafou‵fou kae pa‵ka e fitu ne olo aka i tua o latou mai te Naila, kae ne ‵tu i tafa o pulumakau putaputa i te kaugutu o te Naila.  Tenā ne kamata ei o kai ne pulumakau pa‵ka a pulumakau ‵gali kae puta‵puta e fitu. I konā loa, ala aka ei te Falao.  Ne toe moe ifo a ia kae fai te lua o ana moemiti. E isi ne kaufui saito e fitu ne ‵tupu mai i te kausaito e tasi, e ‵lasi kae ‵gali.+  Kae mai tua o mea konā, ne ‵tupu aka a kaufui saito e fitu kolā ko pa‵ka fāka eiloa kae mage‵mage ona ko te ‵vela o te matagi mai saegala.  Kae ne kamata o folo ne kaufui saito pa‵ka a kaufui saito ‵lasi kae ‵gali e fitu. I konā loa, ne ala aka a te Falao, iloa ei ne ia me se moemiti fua.  I te taeaoakaga ne kamata o mafaufau ‵mafa a ia. Uga atu ei tena fekau ke o‵mai a faitaulaga faivailakau katoa mo tino ‵poto katoa o Aikupito. Ne fakamatala atu ne te Falao ana moemiti ki a latou, kae e seai eiloa se tino ne mafai o fakamatala mai ne ia te uiga o ana moemiti ki a ia.  I konā loa, faipati atu ei a te pule o tāgata ave ipu uaina a te tupu ki te Falao: “Ko fakaasi atu ne au aku agasala i te aso nei. 10  Ne kaitaua a te Falao ki ana tavini kae ‵pei ne ia au ki te falepuipui i te fale o te pule o leoleo, ko au mo te pule o tāgata faka‵fete falaoa.+ 11  Fakamuli ifo, ne fai a mā moemiti i te po eiloa e tasi. Ne tofu eiloa a mā moemiti mo lā fakamatalaga.+ 12  Kae e isi se tamataene Epelu ne ‵nofo tasi matou, se tavini a te pule o leoleo.+ I te fakamatalaatuga ne māua ki ei+ a mā moemiti, ne fakamatala mai ne ia a uiga o mā moemiti takitasi. 13  Ne taunu eiloa a mea kolā ne fakamatala mai ne ia e uiga ki a māua. Ne toe foki mai au ki taku galuega, kae ko te suā tagata ne noua kae fakatautau i te pou.”+ 14  Ne uga atu te fekau a te Falao ke puke fakavave mai a Iosefa+ mai te falepuipui.*+ Ne ‵vele a ia kae sui ana gatu kae fanatu ki loto i te Falao. 15  Muna a te Falao ki a Iosefa: “E isi saku moemiti ne fai kae e seai se tino e fakamatala mai ne ia tena uiga. Kae ko au ne logo me e mafai o fakalogo koe ki se moemiti kae fakamatala tena uiga.”+ 16  Ne tali atu a Iosefa ki te Falao: “Ko te Atua eiloa ka faipati atu ne ia ki te Falao se fakamatalaga aoga, kae e se ko au.”+ 17  Ne faipati atu te Falao ki a Iosefa: “Au ne moemiti i a au e tu i te kaugutu o te vaitafe ko te Naila. 18  Kae ne olo aka mai te Naila a pulumakau ‵gali kae puta‵puta e fitu, kae ne kamata o kai‵kai i mouku i tafa o te Naila.+ 19  Kae ne olo aka mai i olotou tua a nisi pulumakau e fitu, e fakaa‵lofa kae fakafou‵fou kae pa‵ka. Ne seki lavea aka eiloa ne au ne pulumakau fakafou‵fou penā i te fenua kātoa o Aikupito. 20  Kae ne kamata o kai ne pulumakau pa‵ka kae fakafou‵fou a pulumakau puta‵puta e fitu kolā ne olo aka muamua. 21  I te otiga ne kai ne latou, e seai eiloa se tino e mafai o iloa ne ia te mea tenā, me koi tumau eiloa latou i te pa‵ka. I konā loa, ala aka ei au. 22  “Fakamuli ifo, ne matea ne au i taku moemiti a kaufui saito e fitu e ‵tupu aka mai i te kausaito e tasi, e ‵lasi kae ‵gali.+ 23  Ne ‵tupu aka mai tua o mea konā a kaufui saito e fitu, e laumate‵mate, e pa‵ka kae mage‵mage ona ko te ‵vela o te matagi mai saegala. 24  Tenā ne kamata ei o folo ne kaufui saito pa‵ka a kaufui saito ‵gali e fitu. Ne fai atu ne au a mea konei ki faitaulaga faivailakau+ kae e seai se tino ne mafai o fakamatala mai ne ia tena uiga ki a au.”+ 25  Muna a Iosefa ki te Falao: “E tasi fua te uiga o moemiti a te Falao. Ko oti ne fakailoa atu ne te Atua tonu ki te Falao a te mea telā ka fai ne Ia.+ 26  A pulumakau ‵lei e fitu e fakauiga ki tausaga e fitu. E penā foki a kaufui saito ‵lei e fitu ko tausaga foki e fitu. E ‵pau eiloa te uiga o moemiti konā. 27  A pulumakau pa‵ka kae fakafou‵fou e fitu kolā ne olo aka i olotou tua e fakauiga ki tausaga e fitu; kae ko kaufui saito ma‵sei e fitu kolā ne mage‵mage i te ‵vela o te matagi mai saegala e fakasino atu ki tausaga e fitu o te oge. 28  E pelā eiloa mo aku pati ko oti ne fai atu ki te Falao: Ko oti ne fakailoa atu ne te Atua tonu ki te Falao a te mea telā ka fai ne Ia. 29  “Ka oko mai a tausaga e fitu ka uke ei a meakai i te fenua kātoa o Aikupito. 30  Kae e ‵tao atu ki ei ko tausaga e fitu o te oge, kae ka se toe masaua eiloa ne tino a tausaga ne uke ei a meakai i te fenua o Aikupito, me ka pokotia malosi a te fenua kātoa i te oge.+ 31  Kae ka se toe masaua eiloa ne tino a te taimi ne uke ei a mea i luga i te fenua ona ko te oge telā ka poko mai tua ifo i ei, me ka masei ‵ki eiloa a te oge tenā. 32  Ne fakaasi fakalua atu a te moemiti tenā ki te Falao, e fakamaoni mai i ei me ka fai eiloa ne te Atua tonu a te mea tenā, kae ko pili fua o fakataunu ne te Atua tonu a te mea tenā. 33  “Tela la, ke na ‵sala ne te Falao se tagata poto kae atamai ke pule i te fenua kātoa o Aikupito. 34  E ‵tau o ‵tofi ne te Falao ne ovasia i te fenua ke fakaputu ne latou te tasi-vae-lima o fuataga katoa o te laukele i Aikupito i tausaga e fitu kolā e uke ei a meakai.+ 35  Kae e ‵tau o fakaputu ne latou a meakai katoa i tausaga e uke ei a mea, kae fakaputu ne latou a saito mai lalo i te pulega a te Falao mo fai a meakai kae ‵teu i loto i fakai kae tausi i ei.+ 36  A meakai konā e ‵tau o tufa atu i te fenua kātoa i tausaga e fitu e pokotia ei te fenua o Aikupito i te oge, ko te mea ke se ‵mate a tino i te taimi o te oge.”+ 37  Ne fiafia a te Falao mo ana tavini katoa ki te manatu tenei. 38  Ne fai atu a te Falao ki ana tavini: “E mata, e mafai o maua se isi tagata penei mo te tagata tenei, telā e nofo i ei te agaga o te Atua?” 39  Tenā ne fai atu ei a te Falao ki a Iosefa: “Ona ko te mea ne fakaasi atu ne te Atua ki a koe a mea katoa konei, e seai eiloa se isi tino e poto kae atamai e penei mo koe. 40  Ka fai koe ne au ke pule i toku fale, kae ka faka‵logo katoatoa atu ki a koe oku tino katoa.+ Ko au fua i toku tulaga e pelā me ko te tupu e maluga atu i a koe.” 41  Kae ne toe fai atu a te Falao ki a Iosefa: “Kiloke, ko ‵tofi ne au koe ke pule i te fenua kātoa o Aikupito.”+ 42  Tenā ne tapale ei ne te Falao tena mama fakamailoga mai tena lima kae faulu atu ki te lima o Iosefa, kae fakapei atu ki a ia a gatu lino ‵lei, kae fakasafe atu foki se malele aulo ki tena ua. 43  E se gata i ei, ne fakasopo a ia i luga i te lua o kaliota a te tupu ko te mea ke ka‵laga atu a tino i ana mua, “Avaleki!”* I te auala tenā ko ‵tofi ei ne ia a Iosefa ke pule i te fenua kātoa o Aikupito. 44  Ne toe fai atu a te Falao ki a Iosefa: “Au ko te Falao, kae e aunoa mo te taliaga a koe, e seai eiloa se tino e talia ke fai ne ia so se mea* i luga i te fenua o Aikupito.”+ 45  Fakamuli ifo, fakaigoa ei ne te Falao a Iosefa ki a Sapena-paenea kae tuku atu ki a ia a Asenati+ te tama fafine a Potifele te faitaulaga o Onu* mo fai tena avaga. Kae ne kamata o pule* atu a Iosefa i te fenua kātoa o Aikupito.+ 46  Ko 30 tausaga+ o Iosefa i te taimi ne tu atu ei a ia i mua o te Falao te tupu o Aikupito. Ne tiaki ne Iosefa a te Falao kae faimalaga atu i loto i te fenua kātoa o Aikupito. 47  Ne ‵fua malosi mai eiloa a te laukele i tausaga e fitu kolā ne uke a fuataga i ei. 48  Kae ne fakaputu faeloa ne ia a meakai i tausaga e fitu mai te fenua o Aikupito, kae tausi ne ia i loto i fakai. Ne ‵teu ne ia i loto i fakai takitasi a meakai mai laukele i olotou feitu katoa. 49  Ne fakaputu faeloa ne Iosefa a saito e se faka‵tau eiloa i te uke, e pelā eiloa mo one i te tai, ke oko eiloa ki te taimi ko se mafai ei ne latou o lau me ko tō uke. 50  Kae koi tuai o oko mai te tausaga o te oge kae ko oti ne fa‵nau a tama tāgata e tokolua a Iosefa+ i tena avaga ko Asenati te tama fafine a Potifele te faitaulaga o Onu.* 51  Ne fakaigoa ne Iosefa tena toekimua ki a Manase,*+ me ne fai mai a ia, “Ko oti ne fai ne te Atua ke puli i a au oku fakalavelave katoa e pelā foki mo te kāiga katoa o toku tamana.” 52  Kae ne fakaigoa ne ia te tokolua o ana tama ki a Efalaima,*+ me ne fai mai a ia, “Ko oti au ne fai ne te Atua ke ‵fua malosi mai i te fenua ne puapuagatia ei au.”+ 53  Tenā ne palele atu ei a tausaga e fitu kolā ne uke i ei a meakai i te fenua o Aikupito,+ 54  kae ne kamata a tausaga e fitu o te oge, e pelā eiloa mo pati a Iosefa.+ Ne oko atu te oge ki fenua katoa, kae ko te fenua kātoa o Aikupito e isi faeloa ne meakai i ei.+ 55  Fakamuli ifo, ne pokotia te fenua kātoa o Aikupito i te oge, kae ne kamata o ‵tagi atu a tino ki te Falao ke maua ne olotou meakai.+ Kae ne fai atu te Falao ki tino Aikupito katoa: “Olo ki a Iosefa, kae fai so se mea e fakatonu atu ne ia ki a koutou.”+ 56  Ne pokotia a te lalolagi kātoa i te oge.+ Tenā ne kamata ei o ‵tala ne Iosefa a fale saito katoa kae fakatau atu ne ia a saito ki tino Aikupito,+ ona ko te masei o te tulaga o te oge i Aikupito. 57  E se gata i ei, ne olo atu a tino mai koga katoa o te lalolagi o ‵togi olotou meakai i Aikupito, ona ko te masei o te tulaga o te oge i te lalolagi kātoa.+

Fakamatalaga mai lalo

Epelu, “te vaikeli; te lua.”
Kāti se pati e taku atu ke fakaasi ei te fakaaloalo mo te āva.
Epelu, “sisi aka tena lima io me ko tena vae.”
Telā ko Heliopolisi.
Io me “faimalaga.”
Telā ko Heliopolisi.
Tena uiga “Te Tino e Fakapuli; Te Tino e Fai ne ia ke Puli.”
Tena uiga “‵Fua Malosi.”