Kenese 40:1-23

  • Ko fakamatala ne Iosefa te uiga o moemiti a pagota (1-19)

    • “Ko te Atua fua e fakamatala ne ia a moemiti” (8)

  • Te ‵kaiga o te aso fanau o te Falao (20-23)

40  I te otiga o mea konei, ne agasala a te pule o tāgata ave ipu uaina+ a te tupu o Aikupito mo te pule o tāgata faka‵fete falaoa ki te lā aliki, te tupu o Aikupito.  Ne kaitaua a te Falao ki ana ofisa e tokolua, te pule o tāgata ave ipu uaina mo te pule o tāgata faka‵fete falaoa,+  kae ne ‵pei ne ia lāua ki te falepuipui i loto i te fale o te pule o leoleo,+ ko te koga telā e ‵loka i ei a Iosefa.+  Tenā ne ‵tofi ei ne te pule o leoleo a Iosefa ke ‵nofo mo lāua kae ke tausi atu foki ki a lāua,+ kae ne ‵nofo atu a lāua i te falepuipui i se taimi* tai mata leva.  A te tagata ave ipu uaina mo te tagata faka‵fete falaoa a te tupu o Aikupito, kolā ko ‵nofo i te falepuipui, ne fai lā moemiti i te po eiloa e tasi, kae ne tofu te moemiti mo tena fakamatalaga.  I te suā taeao, ne fanatu a Iosefa ki a lāua kae ne lavea ne ia a lāua e mata fanoa‵noa.  Ne fesili atu a ia ki ofisa a te Falao kolā e ‵nofo tasi latou i te falepuipui i loto i te fale o tena matai: “Kaia e mata fanoa‵noa ei koulua i te aso nei?”  Tenā ne fai atu ei lāua ki a ia: “E isi ne mā moemiti ne fai, kae e seai se tino e fakamatala mai ne ia te uiga o moemiti konā.” Ne fai atu a Iosefa ki a lāua: “E a, e se ko te Atua fua e fakamatala ne ia a moemiti katoa?+ Fakamolemole, fakamatala mai ki a au a moemiti a koulua.”  Ne fakamatala atu ne te pule o tāgata ave ipu uaina a tena moemiti ki a Iosefa, ana muna ki a ia: “I taku moemiti, ne matea ne au se vine e tu i oku mua. 10  Kae i luga i te vine tenā e tolu a kaula i ei, kae i te taimi ko ‵somo aka ana kaula ‵fou, ne ma‵tala mai olotou pula kae ko ‵sulu gali mai a fuagavine i ei. 11  Kae ko te ipu a te Falao e puke i toku lima, kae ne puke ne au a fuagavine konā kae ‵kumi a te sua ki loto i te ipu a te Falao. Oti aka, tuku atu ei ne au a te ipu ki te lima o te Falao.” 12  Tenā ne fai atu ei a Iosefa ki a ia: “Tenei la tena uiga: A kaula e tolu konā ko aso e tolu. 13  I te tolu o aso mai te taimi nei, ka ave koe ne te Falao ki tua, kae fakafoki koe ki tou tulaga,+ kae ka tuku atu ne koe a te ipu uaina a te Falao ki tena lima e pelā eiloa mo te mea ne fai sāle muamua ne koe.+ 14  Kae e ‵tau o masaua ne koe au māfai ko fanofano ‵lei a tou olaga. Fakamolemole, ke fakaasi mai ne koe te alofa fakamaoni ki a au kae ke taku atu ne koe te tala e uiga ki a au ki te Falao, ko te mea ke ‵tala au ki tua mo te koga tenei. 15  A te tonuga loa, au ne puke ‵funa ne tino mai i te fenua o tino Epelu,+ kae e seai foki saku mea masei ne fai i te koga tenei ke ‵pei ei au ki te falepuipui.”*+ 16  I te taimi ne iloa ei ne te pule o tāgata faka‵fete falaoa me ne fakamatala atu ne Iosefa se mea ‵lei, ne fai atu a ia ki tou tagata: “Au foki ne moemiti me e tolu a kete falaoa e tuku i luga i toku ulu, 17  kae i te kete tafa ki luga ne tuku i ei a meakai valevale e faite ki falaoa ma te Falao, kae ne kai ne manu eva a meakai konā mai loto i te kete telā e tuku i luga i toku ulu.” 18  Tenā ne tali atu ei a Iosefa, “Tenei la tena uiga: A kete e tolu konā ko aso e tolu. 19  I te tolu o aso mai te taimi nei, ka ‵kati ne te Falao a tou ua kae fakatautau ne ia koe i se pou, kae ka kai ou ‵kano ne manu eva.”+ 20  A te tolu o aso ko te aso fanau o te Falao,+ kae ne fai ne ia se ‵kaiga mō ana tavini katoa, kae ne ‵tala mai ne ia a te pule o tāgata ave ipu uaina mo te pule o tāgata faka‵fete falaoa i mua o ana tavini. 21  Kae ne fakafoki ne ia te pule o tāgata ave ipu uaina ki tena tulaga e pelā me se tagata ave ipu uaina, kae ne tuku atu faeloa ne ia te ipu ki te Falao. 22  Kae ne fakatautau ne ia te pule o tāgata faka‵fete falaoa ki te pou, e pelā eiloa mo te fakamatalaga a Iosefa ki a lāua.+ 23  Kae ne seki masaua ne te pule o tāgata ave ipu uaina a Iosefa; ne puli galogalo eiloa i tou tagata a Iosefa.+

Fakamatalaga mai lalo

Epelu, “aso.”
Epelu, “te vaikeli; te lua.”