Kenese 4:1-26

  • Kaino mo Apelu (1-16)

  • Tino ne ‵tupu mai i a Kaino (17-24)

  • Setu mo tena tama ko Enosa (25, 26)

4  Ne ‵moe fakatauavaga a Atamu mo tena avaga ko Eva, kae ne faitama ei tou fafine.+ I te taimi ne fanau ei a ia i a Kaino,+ ana muna: “Ko maua* ne au se tamaliki tagata ona ko te fesoasoani o Ieova.”  Fakamuli ifo, ne toe fanau mai ne ia a Apelu,+ ko te taina o Kaino. Ne fai a Apelu mo fai se tausi mamoe, kae ko Kaino se tagata ‵toki fatoaga.  Mai tua ifo, ne aumai ne Kaino a nisi fuataga o te laukele kae ofo atu e pelā me se taulaga ki a Ieova.  Kae ne aumai ne Apelu a nisi tama toekimua mai tena lafu mamoe,+ fakatasi mo olotou gako. I te taimi ne talia ei ne Ieova a Apelu mo tena taulaga,+  ne seki talia ne ia a Kaino mo tena taulaga. Ne kaitaua malosi a Kaino, kae e se fiafia.*  Tenā ne fai atu ei a Ieova ki a Kaino: “Kaia e kaitaua ei koe kae e se fiafia?  Kafai e ‵fuli koe o fai te mea ‵lei, e a ka se toe taliagina koe?* Kae kafai e se fai ne koe te mea ‵lei, a te agasala e tolotolo atu eiloa ki tou mataloa kae e manako malosi ke pule atu ki a koe; kae e mata, ka mafai o manumalo koe i ei?”  Mai tua i konā ne fai atu a Kaino ki tena taina ko Apelu: “Tā olo ki te vao.” I te taimi koi ‵nofo atu ei lāua i te vao, ne ta ne Kaino a tena taina ko Apelu ke mate.+  Fakamuli ifo, ne fai atu a Ieova ki a Kaino: “Tefea tou taina ko Apelu?” kae ne fai atu a ia: “E se iloa ne au. Kaia, ko au nei ko te tausi o toku taina?” 10  Ne toe fai atu a te Atua: “Se a tau mea ne fai? Fakalogo mai! A te toto o tou taina ko kalaga mai ki a au mai te laukele.+ 11  Kae nei la, a koe ko malaia kae ka ‵tuli kea‵tea koe mai te laukele telā ko fakamaga tena gutu o inu a toto o tou taina mai i ou lima.+ 12  Kafai e ‵toki ou fatoaga i te laukele, ka se mafai o ‵fua mai. Ka fai koe mo fai se tino maumausolo kae takasēsē faeloa i te lalolagi.” 13  Ne fai atu a Kaino ki a Ieova: “A te fakasalaga mō taku mea ‵se ko tō ‵mafa katoa. 14  I te aso nei ko ‵tuli kea‵tea ne koe au mai te laukele, kae ka ‵muni au mai i ou mata; kae ka fai au mo fai se tino maumausolo kae takasēsē i te lalolagi, kae ko so se tino e maua ne ia au ka tamate eiloa ne ia au.” 15  Muna a Ieova ki a ia: “Ona ko te pogai tenā, so se tino e tamate ne ia a Kaino ka maua ne ia tena fakasalaga fakafitu taimi.” Tenā ne fai ei ne Ieova se fakailoga mō Kaino ko te mea ke mo a ma tamate a ia ne se tino telā e maua ne ia a ia. 16  Tenā ne fano kea‵tea ei a Kaino mai mua o Ieova kae fanatu o nofo i te fenua ko Nota* i te feitu ki saegala o Etena.+ 17  Fakamuli ifo, ne ‵moe fakatauavaga a Kaino mo tena avaga,+ faitama ei tou fafine kae fanau mai ne ia a Enoka. Tenā ne kamata ei o faite ne Kaino se fakai lasi kae fakaigoa ne ia te fakai tenā ki te igoa o tena tama tagata ko Enoka. 18  Fakamuli ifo, ne fai te tama a Enoka ko Ilata. Kae ko Ilata ko te tamana o Mesuala, kae ko Mesuala ko te tamana o Metusaeli, kae ko Metusaeli ko te tamana o Lameko. 19  E tokolua a avaga a Lameko. A te igoa o tena avaga muamua ko Ata, kae ko te tokolua ko Selai. 20  Ne fanau ne Ata a Iapalu. Ne fai a Iapalu mo fai te tino muamua ne nofo i faleie kae isi ne ana lafu manu. 21  A te igoa o tena taina ko Iupalu. Ko ia te tino muamua ke fakaaoga ne ia a te kitala mo te paipa fakatagitagi. 22  Ne fanau mai foki ne Selai a Tupalu-kaino, se tino faite mea faigaluega kese‵kese ki kopa mo fiti. Kae ko te tuagane o Tupalu-kaino ko Naama. 23  Tenā ne ‵fatu ei ne Lameko a pati konei mō ana avaga ko Ata mo Selai: “Faka‵logo mai ki toku leo, koulua e avaga a Lameko;Tuku mai oulua taliga ki aku pati: Ne tamate ne au se tagata me ne fakapakia ne ia au,Ao, se tamataene, me ne fusu ne ia au. 24  Kafai e taui atu faka-7 taimi ki te tino e tamate ne ia a Kaino,+Kae ko Lameko e faka-77 taimi.” 25  Ne toe ‵moe fakatauavaga foki a Atamu mo tena avaga, fanau mai ei ne tou fafine se tamaliki tagata. Ne fakaigoa ne ia ki a Setu*+ me ne fai mai tou fafine: “Ko oti ne tuku mai ne te Atua ki a au se isi tama* ke sui ei a Apelu, me ne tamate a ia ne Kaino.”+ 26  Ne fai foki te tama a Setu kae fakaigoa ne ia ki a Enosa.+ I te taimi tenā, ne kamata o ka‵laga a tino ki te igoa o Ieova.

Fakamatalaga mai lalo

Io me “fanau.”
Epelu, “kae faka‵piko ana mata.”
Io me “e a, ka seai se fakamalugaga?”
Tena uiga “te tulaga o se tino maumausolo.”
Tena uiga “Fakaeke; Tuku Atu; Fakatoka.”
Epelu, “fanau.”