Kenese 39:1-23

  • Iosefa i te fale o Potifala (1-6)

  • Iosefa ko ‵teke ki te avaga a Potifala (7-20)

  • Ko ‵pei a Iosefa ki te falepuipui (21-23)

39  Ne ave a Iosefa ki Aikupito, kae ne ‵togi a ia ne se tagata Aikupito+ e igoa ki a Potifala,+ se ofisa a te Falao, kae ko te pule o leoleo a te tupu, mai tino Isamaeli+ kolā ne avatu ne latou a ia ki konā.  Kae ko Ieova ne fakatasi atu ki a Iosefa.+ Ona ko te mea tenā, ne manuia faeloa a ia kae e isi ne tofi ne maua ne ia i te fale o tena matai, te tagata Aikupito.  Kae ne lavea ne tena matai i a Ieova ne fakatasi atu ki a ia kae ne fai ne Ieova ke manuia faeloa tou tagata i ana mea katoa e fai.  Ne fiafia faeloa a Potifala ki a Iosefa kae ne fai ne ia mo fai tena tino fesoasoani. Tenā ne fakasopo ei ne ia a Iosefa ke pule i tena fale mo ana mea katoa.  Mai te taimi ne fakasopo ei ne ia tou tagata ke pule i tena fale mo ana mea katoa, ne fakamanuia faeloa ne Ieova a te kāiga o te tagata Aikupito tenā ona ko Iosefa, kae ne fakamanuia foki ne Ieova ana mea katoa i tena fale mo tena laukele.+  Fakamuli loa, ne tuku atu ne ia ana mea katoa ke tausi ne Iosefa, kae seai loa se mea ne faka‵mafa ki ei tena mafaufau kae na ko ana meakai. Ne fai foki a Iosefa mo fai se tamataene tuputupu ‵lei kae taulekaleka.  Mai tua ifo i ei, ne kamata o fiafai a te avaga o tena matai ki a Iosefa kae fai atu: “Vau ke ‵moe tāua.”  Ne ita tou tagata kae fai atu ki te avaga a tena matai: “E seai se mea e ‵mafa ki ei a te mafaufau o toku matai i a au e nofo i te fale, kae ko oti ne tuku mai ne ia ana mea katoa ke tausi ne au.  E seai se tino e sili atu i a au i loto i te fale tenei, kae e seai se mea ne taofi ne ia mai i a au kae na ko koe fua, me i a koe ko tena avaga. Tela la, e mafai pefea ne au o fai te matugā mea masei tenei ke agasala ei au i mua o te Atua?”+ 10  I aso katoa ne faipati atu faeloa tou fafine ki a Iosefa, kae ne seki talia eiloa ne ia ke ‵moe lāua mo tou fafine io me ke ‵nofo lāua tokolua. 11  Kae i te aso e tasi ne fanatu a Iosefa o fai ana galuega i loto i te fale e seai eiloa se tavini e nofo i loto i ei. 12  Tenā ne ‵lave atu ei tou fafine ki te gatu o Iosefa, kae fai atu: “Vau ke ‵moe tāua!” Ne tele a Iosefa ki tua kae ne tiaki atu tena gatu telā ko ‵mau i te lima o tou fafine. 13  I te laveaga ne tou fafine a te gatu i tena lima kae ko Iosefa ko tele ki tua, 14  ne pakalaga atu a ia ki ana tavini kae fai atu ki a latou: “Kiloke! Ne aumai ne ia a te tagata Epelu tenei ki a tatou ke fakamasiasi ne ia tatou. Ne vau a ia o pukemālō au, kae ne kamata au o pakalaga ki luga. 15  Kae i te taimi ne lagona ei ne ia au e pakalaga ki luga, ne tele a ia ki tua kae tiaki tena gatu i oku tafa.” 16  Ne tausi eiloa ne ia te gatu o tou tagata i ana tafa ke oko ki te taimi ne oko atu ei a te matai o Iosefa ki tena fale. 17  Tenā ne fai atu ei ne tou fafine a pati eiloa konā ki a Potifala, ana muna: “A te tavini Epelu telā ne aumai ne koe ne vau o fakamasiasi ne ia au. 18  Kae i te taimi ne kamata ei au o pakalaga ki luga, ne tele a ia ki tua kae tiaki tena gatu i oku tafa.” 19  I te taimi eiloa ne logo ei a tena matai i pati a tena avaga ne fai atu ki a ia: “Konei a mea ne fai ne tau tavini ki a au,” ne kaitaua ‵ki eiloa tou tagata. 20  Ne ave ei ne te matai o Iosefa a tou tagata o ‵pei ki te falepuipui, ko te koga telā e ‵loka ei a pagota a te tupu, kae ne nofo faeloa a ia i loto i te falepuipui.+ 21  Ne fakatasi atu faeloa a Ieova ki a Iosefa kae ne fakaasi atu ne ia te alofa fakamaoni ki tou tagata kae fai foki ne ia ke fiafia a te pule o te falepuipui ki a ia.+ 22  Ne fai ne te pule o te falepuipui ke pule a Iosefa i pagota katoa i loto i te falepuipui, kae ko galuega katoa ne fai ne pagota ko mea katoa kolā ne fakatonu atu ne Iosefa ke fai ne latou.+ 23  Ko seai eiloa se mea e tausi ne te pule o te falepuipui, me ne fakatasi atu faeloa a Ieova ki a Iosefa kae ne fai ne Ieova ke iku manuia a mea katoa kolā e fai ne ia.+

Fakamatalaga mai lalo