Kenese 37:1-36

  • Moemiti a Iosefa (1-11)

  • Iosefa mo ana taina loto ma‵sei (12-24)

  • Iosefa ko fakatau atu pelā me se pologa (25-36)

37  Ne nofo faeloa a Iakopo i te fenua o Kanana, te koga telā ne nofo ei tena tamana e pelā me se tino fakaa‵tea.+  Tenei te tala fakasolopito o Iakopo. I te taimi ko 17 ei tausaga o Iosefa,+ ne tausi ne te talavou tenei a te lafu mamoe+ fakatasi mo tama tāgata a Pila+ mo tama tāgata a Selepa,+ ko avaga a tena tamana. Kae ne avatu ne Iosefa se lipoti sē ‵lei ki tena tamana e uiga ki a latou.  Kae ko Isalaelu ne alofa malosi atu ki a Iosefa i lō ana isi tama tāgata+ katoa me ne fanau tena tama tenei kae ko toeaina a ia, kae ne ‵sui foki ne ia se gatu* fakapito mō ia.  I te taimi ne iloa ei ne ana taina me e alofa malosi atu te lotou tamana ki a ia i lō ana taina katoa, ne kamata o takalia‵lia latou ki a Iosefa, kae e se fai‵pati faka‵lei* atu ki a ia.  Fakamuli ifo, ne fai te moemiti a Iosefa kae fakamatala atu ne ia ki ana taina,+ kae ne gasolo aka eiloa o takalia‵lia malosi latou ki a ia.  Ne fai atu a ia ki a latou: “Fakamolemole, faka‵logo mai ki taku moemiti.  A tatou ne saisai ‵tou fusi saito i te kogaloto o te fatoaga, kae ne tu ‵tonu eiloa ki luga taku fusi saito, kae ko otou fusi saito e ‵tu fakatamilo kae ifo atu ki ei.”+  Ne fai atu ana taina ki a ia: “E a, ka fai ne koe a koe eiloa mo fai te tupu kae pule mai ki a matou?”+ Kae ne gasolo aka faeloa o takalia‵lia malosi a latou ki a ia ona ko tena moemiti mo ana pati ne fai atu ki a latou.  Mai tua ifo, ne toe fai foki tena suā moemiti, kae fakamatala atu ne ia ki ana taina, ana muna: “E isi foki saku suā moemiti ne fai. I te taimi nei a te la mo te masina mo fetū e 11 ne ifo mai ki a au.”+ 10  Tenā ne fakamatala atu ei ne ia ki tena tamana mo ana taina, kae ne ‵liko a ia ne tena tamana kae fai atu ki a ia: “Se a te uiga o tau moemiti tenā? E a, ka ifo atu foki māua mo tou mātua mo ou taina ki a koe?” 11  Kae ne gasolo aka eiloa o loto ma‵sei ana taina ki a ia,+ kae ko tena tamana ne tausi ne ia a pati konā i tena mafaufau. 12  Ne olo atu ana taina o tausi te lafu mamoe a te lotou tamana i se koga telā e pili ki Sekema.+ 13  E seki leva kae fai atu a Isalaelu ki a Iosefa: “A ou taina kolā e tausi te lafu mamoe i tafa o Sekema. Vau ke uga koe ne au ki a latou.” Ne fai atu a Iosefa: “Au ko toka!” 14  Ne fai atu a Isalaelu: “Fakamolemole, fano o āsi ki ou taina me e ‵lei latou io me ikai. Āsi atu foki ki te lafu mamoe me e ‵lei io me ikai ko vau ei koe o fakailoa mai ki a au.” Ne uga atu ne ia tou tagata ke fano mai te vanu* o Hepelona,+ kae ne fano a ia ki Sekema. 15  Fakamuli ifo, ne maua ne se tagata a Iosefa e takasēsē i te vao. Ne fesili atu a te tagata ki a ia: “Se a te mea e ‵sala koe ki ei?” 16  Ne fai atu a ia: “Au e ‵sala ki oku taina. Fakamolemole, fakaasi mai ki a au te koga e tausi i ei ne latou a te lafu mamoe?” 17  Ne fai atu te tagata: “Ko oti ne tiaki ne latou te koga tenei, me ne lagona ne au olotou pati, ‘‵Tou olo ki Totana.’” Tenā ne fano ei a Iosefa o ‵sala ana taina kae ne maua ne ia latou i Totana. 18  Ne lavea ‵mao ne latou a Iosefa, kae koi tuai o oko atu a ia ki a latou, ne kamata o fai ne latou se togafiti masei ke tamate a ia. 19  Ne fai atu te suā tino ki te suā tino i a latou: “Kiloke! Tenā ko vau te tagata fai moemiti.+ 20  O‵mai ke na tamate ne tatou a ia kae ‵pei atu ki loto i se vaikeli e tasi, kae ka fai atu tatou me ne kai a ia ne se manu fekai. Ko onoono aka ei tatou me se a te mea ka iku mai i ana moemiti konā.” 21  I te lagonaga ne Leupena+ a te mea tenei ne taumafai a ia o fakasao a Iosefa mai i a latou. Ne fai atu a ia: “Ke mo a ma tamate ne tatou a ia.”+ 22  Ne fai atu a Leupena ki a latou: “Sa fakamaligi toto.+ ‵Pei atu fua a ia ki loto i te vaikeli tenei i te koga lavaki, kae ke mo a ma fakapakia atu a ia.”+ Ne mafaufau tou tagata ke fakasao ne ia a Iosefa mai i a latou kae toe fakafoki atu ki tena tamana. 23  I te okoatuga eiloa a Iosefa ki ana taina, ne tapale ne latou te gatu o Iosefa, ko te gatu fakapito telā ne pei ei a ia,+ 24  kae puke ne latou a ia o ‵pei ki loto i te vaikeli. I te taimi tenā a te vaikeli e ‵masa; e seai ne vai i ei. 25  Tenā ne saga‵saga ifo ei latou o ‵kai. I te taimi ne ‵kilo aka ei latou ki luga, ne lavea ne latou se kaumalaga o tino Isamaeli+ e o‵mai mai Kileata. Ne aumai i luga i olotou kamela a pulu mai lakau, pasama, mo pulu mai pa‵kili o lakau,+ kae olo atu latou i te lotou auala ki Aikupito. 26  Ne fai atu a Iuta ki ana taina: “Se a te aoga e tamate ei ne tatou ‵tou taina kae ‵funa aka ana toto?+ 27  O‵mai, ke na fakatau atu+ ne tatou a ia ki tino Isamaeli, kae ke mo a ma fakaoko ‵tou lima ki luga i a ia. A ia foki la ko ‵tou taina, ko ‵tou ‵kano.” Tenā ne faka‵logo ei latou ki te lotou taina. 28  Kae i te okomaiga o tino Mitiana+ fai pisinisi, ne avaka ne latou a Iosefa mai te vaikeli kae fakatau atu a ia ki tino Isamaeli mō tupe siliva e 20.+ Ne ave ne tāgata konei a Iosefa ki Aikupito. 29  Fakamuli ifo, ne foki atu a Leupena ki te vaikeli kae lavea ne ia me ko galo a Iosefa i loto i ei, saesae ei ne ia ana gatu. 30  I tena fokiatuga ki ana taina ne fai atu a ia: “Ko galo te tamaliki! Ne a nei aku mea ka fai?” 31  Ne puke ne latou te gatu o Iosefa, ta ne latou se kouti tagata kae ufi tena gatu ki loto i toto o te kouti. 32  Oti aka, ave ei ne latou te gatu fakapito tenā ki te lotou tamana kae fai atu: “A te mea tenei ne maua ne matou. Fakamolemole, onoono aka me ko te gatu o tau tama tenei io me ikai.”+ 33  Tenā ne onoono atu a ia ki ei kae fai aka: “Ko te gatu eiloa o taku tama! Kāti ne kai a ia ne se manu fekai! Ko oti eiloa ne saesae valevale a Iosefa!” 34  Ne saesae ne Iakopo ana gatu kae ‵sai a gatu lautaga ki tena taugasulu kae ne fanoanoa eiloa a ia i aso e uke ona ko tena tama. 35  Ne taumafai faeloa ana tama tāgata mo ana tama fāfine katoa o fakamafanafana a ia, kae ne seki talia ne ia a fakamafanafanaga, ana muna: “Ka fanaifo au ki te Tanuga*+ mo te fanoanoa ona ko taku tama!” Kae ne tagi fanoanoa faeloa a tena tamana ona ko ia. 36  Ne fakatau atu ne tino Mitiana a ia i Aikupito ki a Potifala, se ofisa a te Falao+ kae ko te pule o leoleo+ a te tupu.

Fakamatalaga mai lalo

Io me “se gatu gali kae ‵loa.”
Epelu, “mo te filemu.”
Io me “koga malalo.”
Io me “Seoli,” telā ko te tanuga masani o tino. Onoono ki te FP.