Kenese 35:1-29

  • Ko ‵pei kea‵tea ne Iakopo a atua fakaa‵tea (1-4)

  • Iakopo ko foki atu ki Peteli (5-15)

  • Ko fanau a Peniamina; ko mate a Lasela (16-20)

  • Tama tāgata e toko 12 a Isalaelu (21-26)

  • Ko mate a Isaako (27-29)

35  Fakamuli ifo ne fai atu te Atua ki a Iakopo: “Tu ki luga, fano ki Peteli+ kae nofo i ei, kae faite se fatafaitaulaga ki te Atua tonu telā ne fakasae atu ki a koe i te taimi ne tele ei koe kea‵tea mai tou taina ko Esau.”+  Tenā ne fai atu ei a Iakopo ki tino o tena kāiga mo tino katoa kolā ne ‵nofo mo ia: “‵Pei kea‵tea a atua faite konā e ‵nofo mo koutou+ kae faka‵ma otou foitino kae sui otou gatu,  kae ‵tu ki luga i a tatou ka olo ki Peteli. Ka faite ne au i konā se fatafaitaulaga ki te Atua tonu telā ne saga mai ki a au i te aso o toku puapuaga kae ne fakatasi mai faeloa ki a au i so se koga* ne fano au ki ei.”+  Ne avatu ne latou ki a Iakopo olotou atua faite katoa mo ligi i olotou taliga, kae ne tanu* ne Iakopo a mea konā i lalo o te lakau lasi telā e pili ki Sekema.  I te lotou oloatuga ne fai ne te Atua ke ma‵taku a tino i fakai i olotou tafa, tenā ne seki olo ei latou o afuli a tama tāgata a Iakopo.  Fakamuli ifo, ne oko atu a Iakopo mo tino katoa kolā ne olo mo ia ki Lusā,+ telā ko Peteli, i te fenua ko Kanana.  Ne faite ne ia i konā se fatafaitaulaga kae fakaigoa ne ia te koga tenā ki a Ela-peteli,* me tenā te koga ne fakasae atu ei te Atua tonu ki tou tagata i te taimi ne tele ei a ia kea‵tea mai tena taina.+  Mai tua ifo, ne mate a te nesi a Lepeka ko Tepola,+ kae ne tanu i lalo o te oka i tafa o Peteli. Ne fakaigoa ne ia te koga tenā ki a Aluna-pakata.*  Ne toe fakasae atu a te Atua ki a Iakopo i tena malaga mai Patana-alama kae ne fakamanuia atu ki a ia. 10  Muna a te Atua ki a ia: “A tou igoa ko Iakopo. Kae nei ka se toe fakaigoa koe ko Iakopo,+ kae ko Isalaelu.” Kae ne kamata o fakaigoa ne ia tou tagata ki a Isalaelu.+ 11  Ne toe fai atu a te Atua ki a ia: “Au ko te Atua Malosi Katoatoa.+ Ke fanafanau kae ke fakatokouke tau fanau. Ka māfua mai i a koe a fenua mo atufenua e uke,+ kae ka māfua mai a tupu mai tou gafa.*+ 12  Kae ko te fenua telā ne tuku ne au ki a Apelaamo mo Isaako, ka tuku atu ne au ki a koe, kae ka tuku atu+ foki ne au ki au tama* mai ou tua.” 13  Oti aka, fanaka ei te Atua ki luga mai i te koga telā ne fai‵pati i ei lāua. 14  Ne fakatu ne Iakopo se fatu fakamanatu i te koga telā ne fai‵pati i ei lāua mo te Atua, se pou fatu, kae ‵ligi ne ia se taulaga o meainu mo te sinu ki luga i ei.+ 15  Kae ne toe fakaigoa ne Iakopo a te koga telā ne fai‵pati lāua i ei mo te Atua ki a Peteli.+ 16  Tenā ne tiaki ei ne latou a Peteli. Kae koi tai ‵mao eiloa latou mai Efalata, ne kamata a Lasela o fanau, kae ne faigata ‵ki a ia o fanau. 17  Kae koi taumafai tou fafine ke fanau te tamaliki, kae fai atu te fafine fakafanau ki a ia: “Sa mataku, me ka fanau mai foki ne koe se tamaliki tagata.”+ 18  I te taimi ko pili ei o galo tena ola (me ko pili o mate tou fafine) ne fakaigoa ne ia a te tamaliki ki a Penani,* kae ne fakaigoa a ia ne tena tamana ki a Peniamina.*+ 19  Ne mate a Lasela kae ne tanu a ia i te auala ki Efalata, telā ko Peteleema.+ 20  Ne fakatu ne Iakopo se fatu fakamanatu i luga i te tanuga o tou fafine; ko te fatu fakamanatu o te tanuga o Lasela ke oko mai ki te aso nei. 21  Mai tua ifo, ne fano a Isalaelu o fakatu tena faleie i se koga tai ‵mao mai te taoa o Eta. 22  Kae koi nofo atu a Isalaelu i te fenua tenā, ne fano a Leupena kae ‵moe mo Pila te avaga fakasalasala a tena tamana, kae ne logo a Isalaelu i te mea tenā.+ E toko 12 katoa a tama tāgata a Iakopo. 23  A tama tāgata a Iakopo i a Lea ko Leupena+ tena toekimua, ‵tao atu ki ei ko Simeona, Levi, Iuta, Isakala, mo Sepulona. 24  Kae ko ana tama tāgata i a Lasela ko Iosefa mo Peniamina. 25  Kae ko ana tama tāgata i a Pila, te tavini a Lasela, ko Tanu mo Nafatali. 26  Kae ko ana tama tāgata i a Selepa, te tavini a Lea, ko Kato mo Asela. Konei a tama tāgata a Iakopo kolā ne fa‵nau i Patana-alama. 27  Fakamuli ifo, ne oko atu a Iakopo ki te koga ne nofo i ei tena tamana ko Isaako i Mamele,+ i Kiliata Alapa, telā ko Hepelona, ko te koga telā ne ‵nofo i ei a Apelaamo mo Isaako e pelā me ne tino fakaa‵tea.+ 28  Ne ola a Isaako i tausaga e 180.+ 29  Tenā ne ‵pusi ei ne Isaako tena toe manavaga kae mate kae ne fakatasi atu ki ana tino,* mai tua o se olaga loa kae fakamalie loto;* kae ne tanu a ia ne ana tama tāgata ko Esau mo Iakopo.+

Fakamatalaga mai lalo

Io me “i te auala.”
Io me “‵funa.”
Tena uiga “Te Atua o Peteli.”
Tena uiga “Te Oka o te Tagi Fanoanoa.”
Epelu, “ka ‵mai ki tua mai ou taugasulu.”
Epelu, “fanau.”
Tena uiga “Te Tama Tagata o Toku Fanoanoa.”
Tena uiga “Te Tama Tagata o te Lima Fakaatamai.”
A te mea tenei se tugapati fakauiga telā e fakasino atu ki te mate.
Epelu, “ko matua kae uke ana aso.”