Kenese 34:1-31

  • Ko pukemālō a Tina (1-12)

  • Te amioga fakaloiloi a tama tāgata a Iakopo (13-31)

34  A Tina, te tama fafine a Iakopo i a Lea,+ ne fano sāle o ta‵fao fakatasi* mo tamafine o te fenua.+  I te taimi ne lavea ei a ia ne Sekema, te tama tagata a Hamola te tagata Hivi,+ kae se aliki foki o te fenua tenā, ave ei ne ia tou fafine ke ‵moe lāua kae pukemālō ne ia.  Ne kamata o fakamasani a ia ki a Tina, te tama fafine a Iakopo, kae ne fiafai malosi a ia ki tou fafine kae faipati fakakolekole atu ki a ia.*  Fakamuli loa, ne fai atu a Sekema ki tena tamana ko Hamola:+ “Au e manako ki te tamafine tenei ke fai mo fai taku avaga.”  I te taimi ne logo ei a Iakopo me ko oti ne fai fakamasei ne Sekema a tena tama fafine ko Tina, kae ko ana tama tāgata e ‵nofo mo tena lafu manu i te vao. Ne seki faipati eiloa a Iakopo e uiga ki ei ke oko ki te taimi ne ‵foki mai ei latou.  Fakamuli ifo, ne fanatu a Hamola te tamana o Sekema o fai‵pati mo Iakopo.  Ne ‵logo a tama tāgata a Iakopo i te tala tenā kae ‵foki fakavave atu. Ne logo‵mae kae kaitāua malosi latou, me ko oti ne fakamasiasi ne Sekema a Isalaelu mai te ‵moe mo te tama fafine a Iakopo,+ se faifaiga telā ne seki ‵tau eiloa o fai.+  Ne fai atu a Hamola ki a latou: “A taku tama tagata ko Sekema e manako malosi ki te otou tama fafine. Fakamolemole tuku mai tou fafine ke fai mo fai tena avaga,  kae ke fai ne tatou se feagaiga ke fakatau a‵vaga ‵tou tino. Tuku mai ki a matou otou tama fāfine, kae puke ne koutou omotou tama fāfine.+ 10  Ko mafai ei o ‵nofo fakatasi tatou, kae ka mafai foki o maua ne otou laukele. Ko ‵nofo ei koutou kae fai otou pisinisi i ei.” 11  Tenā ne fai atu ei a Sekema ki te tamana o Tina mo ana tuagane: “Kafai e talia ne koutou au, kae ka tuku atu ne au ki a koutou so se mea e fakamolemole mai ei koutou ki a au. 12  E mafai o avaka ne koutou ke maluga ‵ki te ‵togi* o Tina mo te meaalofa+ o te fakaipoipoga. Au e toka o tuku atu so se aofaki telā e fai mai ne koutou ki a au. Tuku mai fua te tamafine tenā ke fai mo fai taku avaga.” 13  Kae ne tali fakaloiloi atu a tama tāgata a Iakopo ki a Sekema mo tena tamana ko Hamola, ona ko te mea ko oti ne fai fakamasei ne ia a Tina te lotou tuagane. 14  Ne fai atu latou ki a lāua: “E se mafai o fai ne matou se mea penā ke tuku atu te motou tuagane ki se tagata telā e seki pilitome,+ me i te mea tenā se mea fakamasiasi ki a matou. 15  E mafai fua o talia ne matou te mea tenā i te pogai e tasi tenei: ke fai koutou e pelā mo matou kae pilitome otou tāgata katoa.+ 16  Tenā ko tuku atu ei ne matou omotou tama fāfine ki a koutou, kae puke ne matou otou tama fāfine, kae ka ‵nofo fakatasi tatou e pelā me se fenua e tasi. 17  Kae kafai e se faka‵logo mai koutou ki a matou ke pilitome koutou, ko puke ei te motou tamaliki fafine kae olo kea‵tea mai konei.” 18  Ne lotoma‵lie a Hamola+ mo Sekema, te tama tagata+ a Hamola ki olotou pati konā. 19  Ne seki fakatalave a te tamataene i te faiga o te ‵tonu tenā,+ ona ko tena fiafai ki te tama fafine a Iakopo, kae ko ia foki ko te ‵toe tino tāua i te kāiga o tena tamana. 20  Ne olo atu a Hamola mo tena tama tagata ko Sekema ki te mataloa o te fakai+ kae fai‵pati atu ki tāgata o te lotou fakai, penei: 21  “A tāgata konei e ma‵nako ke maua se va filemu mo tatou. Tuku atu ke ‵nofo latou i te ‵tou fenua ko te mea ke fai olotou pisinisi i ei, me e lava kae ‵toe a te laukele mō latou. E mafai o puke ne tatou olotou tama fāfine mo fai ‵tou avaga, kae tuku atu ne tatou ‵tou tama fāfine ki a latou.+ 22  E tasi fua te pogai e talia ne tāgata konei ke ‵nofo fakatasi tatou e pelā me se fenua e tasi: e ‵tau o pilitome+ a ‵tou tāgata katoa e pelā eiloa mo latou. 23  Mai konā, e mata, ka se fai olotou kope, olotou koloa, mo olotou manu katoa ma tatou? Tela la, ke na talia ne tatou te lotou fakamolemole ko te mea ke mafai o ‵nofo fakatasi tatou.” 24  A tino katoa kolā ne maopoopo atu ki te mataloa o tena fakai ne faka‵logo ki a Hamola mo tena tama ko Sekema, kae ne pilitome i ei a tāgata katoa kolā ne maopoopo atu ki konā. 25  I te tolu o aso kae koi logo‵mae malosi latou, ne ulu ‵funa atu a tama tāgata e tokolua a Iakopo, ko Simeona mo Levi, ko tuagane o Tina,+ mo lā pelu ki loto i te fakai kae tamate a tāgata katoa i ei.+ 26  Ne tamate ne lāua a Hamola mo tena tama ko Sekema ki te pelu kae puke ne lāua a Tina mai te fale o Sekema kae olo. 27  Ne o‵mai a nisi tama tāgata a Iakopo ki tāgata ‵mate konā kae puke a kope katoa i te fakai me ne fai fakamasei ne tino konā te lotou tuagane.+ 28  Ne puke ne latou olotou lafu mamoe, lafu pulumakau, olotou asini, mo so se mea i loto i te fakai mo koga i tua i ei. 29  Ne puke foki ne latou olotou kope totino katoa, kae ave fakapagota olotou tama‵liki fo‵liki katoa mo olotou avaga, e penā foki mo mea katoa i olotou fale. 30  Ona ko te mea tenei, ne fai atu ei a Iakopo ki a Simeona mo Levi:+ “Ko oti ne aumai ne koulua a puapuaga e uke ki luga i a au, kae ko fai ne koulua au ke fai mo fai se mea fakatakalialia ki tino o te fenua tenei, ki tino Kanana mo tino Pelise. E se tokouke oku tāgata, kae kafai e ‵kau fakatasi latou o taua mai ki a au, ko au eiloa ko mate, ko au mo toku kāiga kātoa.” 31  Kae ne fai atu lāua: “E mata, e ‵tau o fai ne se tino te mā tuagane e pelā me se fafine talitāgata?”

Fakamatalaga mai lalo

Io me “asiasi.”
Epelu, “faipati ki te loto o te tamafine.”
Se ‵togi o se tamafine telā ka fai tena avaga.