Kenese 33:1-20

  • Ko fetaui a Iakopo mo Esau (1-16)

  • Ko faimalaga a Iakopo ki Sekema (17-20)

33  Ne kilo aka a Iakopo kae lavea ne ia a Esau e o‵mai mo ana tāgata e toko 400.+ Tenā ne vaevae ei ne ia a tama‵liki ki a Lea, Lasela mo tavini fāfine e tokolua.+  Ne tuku ne ia a tavini fāfine mo lā tama‵liki ke ‵tafa ki mua,+ ‵tao atu ki ei ko Lea mo ana tama‵liki+ mo Lasela+ ei mo Iosefa i olotou tua.  Kae ne fanatu a ia i mua o latou kae ifo fakafitu ki lalo i te laukele i te taimi ko pili atu ei a ia ki tena taina.  Kae ko Esau ne tele atu o fakafetaui ki a ia, ne ‵sai kae sogi atu ki tou tagata, kae ne ‵tagi ei lāua.  I te kiloakaga a Esau ne lavea ne ia a fāfine mo tama‵liki, ana muna: “Ko oi a tino konei ne o‵mai mo koe?” ne tali atu a Iakopo: “Ko tama‵liki kolā ne tuku mai ne te Atua ona ko tena alofa ki tau tavini.”+  Ne olo atu ki mua a tavini fāfine mo lā tama‵liki kae ifo ki lalo;  ne o‵mai foki a Lea mo ana tama‵liki kae ifo ki lalo. Oti aka, o‵mai ei a Iosefa mo Lasela kae ifo foki ki lalo.+  Muna a Esau: “Kaia ne uga mai ei ne koe se kaumalaga lasi ‵ki telā ne fetaui matou?”+ Ne tali atu a Iakopo: “Ko te mea ke mafai o fiafia mai a toku aliki ki a au.”+  Muna a Esau: “Toku taina, e uke ‵ki oku kope.+ Tausi au mea.” 10  Kae ne fai atu a Iakopo: “Ikai, fakamolemole. Kafai ne fiafia mai koe ki a au, e ‵tau o puke ne koe taku meaalofa tenā ki a koe, me ne aumai ne au ko te mea ke mafai o lavea ne au ou mata. Kae i te laveaga ne au ou mata, ko pelā eiloa me ko oti ne lavea foki ne au a mata o te Atua me ne fakafetaui mai koe ki a au mo te fiafia.+ 11  Fakamolemole, puke te meaalofa e avatu ei aku fakamanuiaga ki a koe,+ me i te Atua e fiafia ki a au kae ko maua ne au a mea katoa kolā e ‵tau o maua.”+ Kae ne finau atu faeloa a Iakopo, puke ei ne Esau a mea konā. 12  Fakamuli ifo, ne fai atu a Esau: “‵Tou olo, kae ke mua au i a koutou.” 13  Kae ne fai atu a Iakopo: “E malamalama ‵lei koe e toku aliki me i aku tama‵liki koi fo‵liki ‵ki+ kae e ‵tau o tausi atu au ki mamoe mo pulumakau kolā koi faū olotou tama. Kafai e fakava‵vave ne au latou i se aso e tasi ka ‵mate eiloa te lafu manu kātoa. 14  Fakamolemole, ke na fano a toku aliki mai mua o tena tavini, kae ka fakamuli atu au i te vave telā e mafai o olo i ei aku manu mo aku tama‵liki, ke oko ki te taimi e oko atu ei au ki toku aliki i Seila.”+ 15  Tenā ne fai atu ei a Esau: “Fakamolemole, talia mai ke tuku atu ne au aku nisi tino ki a koe.” Kae ne fai atu a Iakopo: “Kaia e fai ei ne koe te mea tenā? Au e manako fua ke fiafia mai toku aliki ki a au.” 16  I te aso eiloa tenā ne foki atu ei a Esau i tena auala ki Seila. 17  Ne fanatu a Iakopo ki Sukota,+ kae ne faite ne ia se fale i konā mō ia e pelā foki mo fale fakamalu‵malu mō tena lafu manu. Tenā te pogai ne fakaigoa ei ne ia te koga tenā ki a Sukota.* 18  Fakamuli loa, ne taunu atu a Iakopo i tena malaga mai Patana-alama+ ki te fakai o Sekema+ i te fenua o Kanana,+ kae ne fakatu aka ei tena faleie i tafa o te fakai tenā. 19  Tenā ne ‵togi ei ne ia se vaega o te laukele telā ko tu i ei tena faleie mai i tama tāgata a Hamola, te tamana o Sekema, ki tupe siliva e 100.+ 20  Ne fakatu ne ia i konā se fatafaitaulaga kae fakaigoa ne ia ki te Atua,* ko te Atua o Isalaelu.+

Fakamatalaga mai lalo

Tena uiga “Fale Fakamalumalu.”
Epelu, “Ele.”