Kenese 32:1-32

  • Ko fetaui a agelu mo Iakopo (1, 2)

  • Ko fakatoka a Iakopo ke fetaui mo Esau (3-23)

  • Ko tafiti a Iakopo mo se agelu (24-32)

    • Iakopo ko fakaigoa ki a Isalaelu (28)

32  Tenā ne fano ei a Iakopo i tena auala, kae ne fetaui a ia mo agelu a te Atua.  I te laveaga eiloa ne Iakopo a latou, ne fai aka ei a ia: “Tenei eiloa te kautau a te Atua!” Tenā ne fakaigoa ei ne ia te koga tenā ki a Manaima.*  Tenā ne uga ei ne Iakopo a avefekau ke ‵mua atu i a ia ki tena taina ko Esau i te laukele o Seila+ i te kogā fenua o Etoma,+  kae ne fakatonu atu a ia ki a latou: “Konei a pati ka fai atu ne koutou ki toku aliki ko Esau, ‘Konei a pati a tau tavini ko Iakopo ne fai mai: “Au ne nofo* i a Lapana i se taimi leva ‵ki ke oko mai eiloa ki te taimi nei.+  Kae ko oti ne maua ne au a pulumakau tāgata, asini, mamoe, mo tavini tāgata mo tavini fāfine,+ kae ko avatu ne au te fekau tenei ke fakailoa atu ki toku aliki, ko te mea ke isi se pogai e fiafia mai ei koe ki a au.”’”  Fakamuli ifo, ne ‵foki mai a avefekau ki a Iakopo, kae fai atu: “Matou ne fetaui mo tou taina ko Esau, kae tenā ko vau o fakafetaui ki a koe, kae e o‵mai mo ana tāgata e toko 400.”+  Kae ko Iakopo ne kamata o mataku malosi kae manavase.+ Ne vaevae ne ia ana tino, e pelā foki mo ana manu katoa, mo pulumakau mo kamela ki potukau e lua.  Ana muna: “Kafai e taua atu a Esau ki te potukau e tasi, kae ko te suā potukau e mafai o ‵tele ke ‵sao latou.”  Mai tua ifo i ei, ne fai atu a Iakopo: “Ieova te Atua o toku tupuna ko Apelaamo mo te Atua o toku tamana ko Isaako, ko koe eiloa telā ne fai mai ki a au, ‘Toe foki ki tou fenua mo ou kāiga kae ka fai faka‵lei au ki a koe,’+ 10  e se ‵tau o maua katoa ne au a te alofa fakamaoni mo te fakamaoni katoatoa kolā ko oti ne fakaasi mai ne koe ki tau tavini,+ me ko te tokotoko fua tenei ne fanatu mo au ki te suā feitu o te Iolitana, kae nei la ko lua katoa aku potukau.+ 11  Au e ‵talo atu ke fakasao+ aka au mai lima o toku taina ko Esau, me i a au e mataku i a ia ma vau o ta au,+ e pelā foki mo mātua mo olotou tama‵liki. 12  Kae ne fai mai koe: ‘Ka fai faka‵lei eiloa au ki a koe, kae ka fai ne au au tama* ke tokouke e pelā mo one i te tai kolā e se mafai o lau.’”+ 13  Ne moe a ia i konā i te po. Tenā ne tuku fakaa‵tea ei ne ia a nisi kope o ia mo fai se meaalofa ki tena taina ko Esau:+ 14  e 200 kouti fāfine, 20 kouti tāgata, 200 mamoe fāfine, 20 mamoe tāgata, 15  30 kamela koi faū olotou tama, 40 pulumakau fāfine, 10 pulumakau tāgata, 20 asini fāfine kae 10 asini tāgata kolā ko ma‵tua ‵lei.+ 16  Ne tuku atu ne ia a lafu manu takitasi ki ana tavini kae fai atu ki a latou: “‵Mua atu koutou i a au ki te suā feitu kae fakavā ne koutou a te lafu e tasi mai te suā lafu.” 17  Ne fakatonu atu foki a ia ki te tavini muamua: “Kafai e fetaui koe mo toku taina ko Esau kae fesili atu, ‘Ko oi tou matai, kae ko koe e fano ki fea, kae i a ai foki a te lafu manu tenā i ou mua?’ 18  e ‵tau mo koe o fai atu, ‘I a tau tavini ko Iakopo. Se meaalofa ne aumai ma toku aliki, ko Esau,+ kae kiloke! a ia foki tenā e vau mai tua o matou.’” 19  Kae ne fakatonu atu foki a ia ki te tokolua, te tokotolu mo latou katoa kolā e tau‵tali mai tua o lafu manu: “Konei a pati e ‵tau o fai atu ne koutou ki a Esau māfai e fetaui koutou mo ia. 20  Kae e ‵tau foki o fai atu koutou, ‘A tau tavini ko Iakopo tenā e vau mai tua o matou.’” Me ne fai ifo a ia: “Kafai e avatu muamua taku meaalofa+ ki a ia e mafai eiloa o fiafia a ia ki ei, kae kafai e fetaui fakamuli māua ko mafai ei o tali faka‵lei ne ia au.’ 21  Tenā ne ave ei a meaalofa konā ki te suā feitu ke ‵mua atu i a ia, kae ne moe a ia i te po i te koga tenā. 22  Fakamuli ifo i te po eiloa tenā, ne tu aka a Iakopo, puke ana avaga e tokolua+ mo ana tavini fāfine e tokolua+ mo ana tama‵liki tāgata e toko 11 kae olo atu ki te suā feitu i te asaga o Iapoka.+ 23  Ne puke ne ia latou kae olo atu ki te suā feitu o te tamā vaitafe, kae avatu foki ne ia ana mea katoa ki konā. 24  Mai tua ifo, ne nofo a Iakopo i a ia eiloa. Tenā ne kamata ei o tafiti a ia mo se tagata ke oko eiloa ki te vaveao ‵malu.+ 25  I te iloaga ne ia i a ia ko se manumalo i a Iakopo, ne fakapatele atu a ia ki te sokoga o tena kautega; kae ne seke te kautega o Iakopo i te taimi ne ta‵fiti ei a ia mo te tagata tenā.+ 26  Oti aka kae fai atu a te tagata tenā: “Tuku mai au ke fano me ko pili o ao.” Kae ne fai atu a Iakopo: “E se mafai ne au o tuku atu koe ke fano seiloga ke fakamanuia ne koe au.”+ 27  Muna te tagata ki a ia: “Ko oi tou igoa?” kae ne tali atu a ia: “Ko Iakopo.” 28  Tenā ne fai atu ei te tagata tenā: “A koe ka se toe fakaigoa ki a Iakopo, kae ki a Isalaelu,*+ me ko oti ne fakatau‵fai koulua mo te Atua+ e pelā foki mo tāgata kae ne manumalo eiloa koe i te fakaotiga.” 29  Ne fai atu a Iakopo: “Fakamolemole, fai mai ki a au tou igoa.” Kae ne fai atu te tagata tenā: “Kaia e fesili mai ei koe ki toku igoa?”+ Tenā ne fakamanuia ei ne ia a Iakopo i konā. 30  Ne fakaigoa ne Iakopo a te koga tenā ki a Penieli,*+ me ne fai mai a ia, “Ko oti ne matea ne au a te Atua mata ki mata kae ne sao eiloa au.”+ 31  Kae ne ‵kasa atu te la ki luga i a ia i te taimi ne tiaki ei ne ia a Penueli,* kae ne ketuketu atu a ia me ko seke tena kautega.+ 32  Tenā te pogai e se masani ei a tino Isalaelu o ‵kai ki te uaua telā e tele i te sokoga o te kautega mo te kauaga ke oko mai ki aso nei, me ne fakapatele atu te tagata tenā ki te sokoga o te kautega mo te kauaga o Iakopo.

Fakamatalaga mai lalo

Tena uiga “E Lua Kautau.”
Io me “nofo e pelā me se tino fakaa‵tea.”
Epelu, “fanau.”
Tena uiga “Tino e Fakatau‵fai (Kausaki) mo te Atua” io me “Te Atua e Fakatau‵fai.”
Tena uiga “Mata o te Atua.”
Io me “Penieli.”