Kenese 31:1-55

  • Iakopo ko tele ‵muni ki Kanana (1-18)

  • Ko maua ne Lapana a Iakopo (19-35)

  • Te feagaiga a Iakopo mo Lapana (36-55)

31  Fakamuli ifo, ne lagona ne Iakopo a pati a tamaliki tāgata a Lapana ne fai: “Ko oti ne puke ne Iakopo a mea katoa a ‵tou tamana, kae ko uke ‵ki ana koloa ne maua mai mea a ‵tou tamana.”+  Kafai e kilo atu a Iakopo ki mata o Lapana, ne matea ne ia me ko ‵kese ana faifaiga ki a ia i lō taimi mua.+  Oti aka loa, ne fai atu a Ieova ki a Iakopo: “Foki ki te fenua o ou tupuga mo ou kāiga,+ kae ka fakatasi atu faeloa au ki a koe.”  Tenā ne uga atu ei te fekau a Iakopo ki a Lasela mo Lea ke olo atu ki te koga e ‵tu ei a tena lafu manu,  kae ne fai atu a ia ki a lāua: “Ne lavea ne au me ko ‵kese a faifaiga a te tamana o koulua ki a au,+ kae ko te Atua o toku tamana ne fakatasi mai faeloa ki a au.+  E iloa ‵lei ne koulua i a au ne tavini ki te tamana o koulua mo toku malosi kātoa.+  Kae ko te tamana o koulua ne taumafai o fakatogafiti ne ia au kae ‵fuli fakasefulu taimi ne ia toku ‵togi; kae ne seki talia ne te Atua ke fakalogo‵mae ne ia au.  Kafai e fai mai a ia penei, ‘A manu ilailā ka fai mo fai tou ‵togi,’ kae ka fa‵nau mai ne te lafu kātoa a manu ilailā; kae kafai e fai mai a ia, ‘A manu sele‵sele ka fai mo fai tou ‵togi,’ kae ka fa‵nau mai ne te lafu kātoa a manu sele‵sele.+  Tela la, ne puke faeloa ne te Atua a manu mai te tamana o koulua kae tuku mai ma aku. 10  I se taimi e tasi ne fai avaga ei te lafu, ne kilo aka au kae ne matea ne au i se moemiti a kouti tāgata kolā e fai avaga mo kouti fāfine, e sele‵sele, e ilailā, kae tu‵tutu.+ 11  Kae ne fai mai a te agelu a te Atua tonu ki a au i te moemiti, ‘Iakopo!’ kae ne tali atu au, ‘Tenei au.’ 12  Ne toe fai mai a ia, ‘Kilo aka ou mata, fakamolemole, kae ka lavea ne koe me i kouti tāgata katoa kolā e fai avaga mo kouti fāfine, e sele‵sele, e ilailā kae tu‵tutu, me ko oti ne lavea ne au a mea katoa e fai ne Lapana ki a koe.+ 13  Au ko te Atua tonu o Peteli,+ te koga telā ne fakatapu ne koe i ei se fatu fakamanatu kae ne fai i ei ne koe se tautoga ki a au.+ Nei la, tu ki luga, fano kea‵tea mai te fenua tenei kae toe foki atu ki te fenua ne fanau ei koe.’”+ 14  Ne tali atu a Lasela mo Lea ki a ia: “E mata, e isi se vaega koi ‵toe mō māua i te fale o te mā tamana? 15  E mata, e se kilo mai a ia ki a māua e pelā me ne tino fakaa‵tea, ona ko te mea ko oti ne ‵togi atu ne ia māua ki tua kae ko oti ne fakaaoga ne ia a tupe kolā ne ‵tau o tuku mai ki a māua?+ 16  A koloa katoa kolā ko oti ne puke mai ne te Atua mai te mā tamana i a māua mo mā tama‵liki.+ Tela la, fai a mea katoa ne fai atu ne te Atua ke fai ne koe.”+ 17  Tenā ne tu aka ei a Iakopo kae faka‵sopo atu ana tama‵liki mo ana avaga ki luga i kamela,+ 18  kae kamata o ave ne ia ana lafu manu katoa mo ana koloa katoa kolā ne maua ne ia,+ ko ana manu kolā ne maua i Patana-alama, kae olo atu ki tena tamana ko Isaako i te fenua o Kanana.+ 19  I te taimi nei a Lapana ko oti ne fano o ‵vele a fulufulu o ana mamoe, kae ne kaisoa ne Lasela se telafimi faite*+ a tena tamana.+ 20  E se gata i ei, ne faka‵se ne Iakopo a Lapana te tagata Alamea, me ne seki fakailoa atu ne ia ki tou tagata i a ia ka tele kea‵tea. 21  Ne tele a ia kea‵tea kae fanatu ki te suā feitu o te Vaitafe,*+ ko ia mo ana mea katoa. Tenā ne fanatu ei tou tagata ki te koga maugā o Kileata.+ 22  I te tolu o aso, ne fakailoa atu ki a Lapana me i a Iakopo ko oti ne tele kea‵tea. 23  Ne puke ne Lapana ana taina* kae olo atu o afuli a ia, kae i te fitu o aso ne maua atu ne latou a Iakopo i te koga maugā o Kileata. 24  Tenā ne fakasae atu ei a te Atua ki a Lapana te tagata Alamea+ i se moemiti i te po,+ kae fai atu ki a ia: “Ke fakaeteete koe i au pati e fai ki a Iakopo, faitalia me ‵lei io me ma‵sei.”*+ 25  Ne fanatu a Lapana ki a Iakopo, me ko oti ne ‵toki ne Iakopo a tena faleie i luga i te mauga, kae ko Lapana ne ‵nofo mo ana taina i te koga maugā o Kileata. 26  Tenā ne fai atu ei a Lapana ki a Iakopo: “Se a te mea tenei ko fai ne koe? Kaia ne faka‵se ei ne koe au kae puke ne koe aku tama fāfine e pelā me ne fāfine ne ave fakapagota i se taua? 27  Kaia ne tele ‵muni ei koe, kae faka‵se ne koe au kae e se fakailoa mai ki a au? Moi ne fakailoa mai ne koe ki a au penei ko oti ne uga ne au koe ke fano mo te fiafia mo pese e ta ki samupelini mo kitala. 28  E seki tuku mai ne koe se avanoaga ke uma atu au ki oku mokopuna mo aku tama fāfine. Ko oti ne fai ne koe se mea valea. 29  E mafai fua o fai ne au se mea ke logo‵mae ei koutou, kae ko te Atua o tou tamana ne fai mai ki a au i te po: ‘Ke fakaeteete koe i au pati e fai ki a Iakopo, faitalia me ‵lei io me ma‵sei.’+ 30  Kae nei la, ko fano koe me i a koe ko leva ne manako o foki ki te kāiga o tou tamana, kae kaia ne kaisoa ei ne koe aku atua?”+ 31  Ne tali atu a Iakopo ki a Lapana: “Ne fai ne au te mea tenā ona ko au ne mataku, me ne fai ifo au ki a au eiloa, ‘Kāti ka ‵fao mālō ne koe au tama fāfine mai i a au.’ 32  So se tino e maua ne koe i ei au atua ka se ola. Fano la o sukesuke aku mea i mua o ‵tou taina konei, ko puke ei au mea.” Kae ne seki iloa ne Iakopo me ne kaisoa ne Lasela a atua konā. 33  Ne fanatu a Lapana ki loto i te faleie o Iakopo, mo te faleie o Lea, mo faleie o te avā pologa fāfine,+ kae seki maua ne ia ana atua. Tenā ne fano ei a ia ki tua mo te faleie o Lea kae ulu atu ki te faleie o Lasela. 34  I te taimi tenā, ko oti ne puke ne Lasela a telafimi faite kae tuku ki loto i te taga o te nofoga o te fafine i luga i te kamela, kae sagasaga tou fafine i luga i ei. Ne salasala a Lapana ki ana mea i loto i te faleie kātoa, kae ne seki maua ne ia. 35  Tenā ne fai atu ei tou fafine ki tena tamana: “Toku aliki, sa ita mai ki a au, me ko se mafai ne au o tu ki luga, me ko oko mai ki a au te masaki masani o fāfine.”+ Ne salasala faka‵lei tou tagata ki ana telafimi faite+ kae ne seki maua ne ia. 36  Ne kaitaua a Iakopo kae kamata o fakamasei ne ia a Lapana. Tenā ne fai atu ei a Iakopo ki a Lapana: “Se a taku mea ‵se ne fai, kae se a foki taku agasala ko vau ei koe o afuli au? 37  Nei la, ko oti ne vakisa ne koe aku mea katoa, e isi la se kope o koe ne maua i aku mea? Tuku mai la ki mua o oku taina mo ou taina, ko fai ei ne latou se fakaikuga e uiga ki a tāua. 38  I te 20 tausaga ne ‵nofo ei au mo koe, ne seki ‵lele+ eiloa a tama o au mamoe mo au kouti, kae ko au e seki kai aka eiloa ki se mamoe tagata mai tau lafu. 39  Ne seki avatu eiloa ne au ki a koe se manu telā ne saesae ne manu fe‵kai.+ Ne sui eiloa ne au a te manu tenā. Faitalia me ne kaisoa a te manu tenā i te ao io me i te po, e manako eiloa koe ke toe ‵togi atu ne au. 40  Ne puapuagatia au i te ‵vela o te la i te ao, mo te ‵moko o te po, kae ne seki mafai o tō ‵lei taku moe.+ 41  E ‵tusa mo te 20 tausaga ne nofo ei au i tou fale. Ne tavini atu au ki a koe i tausaga e 14 mō au tama fāfine e tokolua, kae e 6 tausaga mō tau lafu manu, kae ne fulifuli faeloa ne koe toku ‵togi fakasefulu taimi.+ 42  Moi fai ne seki kau mai ki a au a te Atua o toku tamana,+ te Atua o Apelaamo mo te Tino telā ne mataku ki ei a Isaako,+ penei ko leva ne ‵tuli ne koe au kea‵tea e aunoa mo se mea e tasi. Ko oti ne lavea ne te Atua toku fi‵ta mo aku galuega ne fai, kae tenā te pogai ne polopoloki ei ne ia koe i te po.”+ 43  Tenā ne tali atu ei a Lapana ki a Iakopo: “A fāfine konei ko aku tama, kae ko tama‵liki konei ko oku mokopuna, a lafu manu konei ko aku lafu manu, mo mea katoa konā e kilo koe ki ei i a aku mo aku tama fāfine. Se a la taku mea e mafai o fai i te aso nei ki a lāua io me ko tama‵liki kolā ne fa‵nau mai ne lāua? 44  Nei la, vau ke na fai ne tāua se feagaiga, ko koe mo au, kae ka fai eiloa te mea tenā e pelā me se molimau i te va o tāua.” 45  Ne puke aka ne Iakopo se fatu kae ‵toki ne ia e pelā me se fatu fakamanatu.+ 46  Ne fai atu foki a Iakopo ki ana taina: “Puke mai ne fatu!” Ne puke mai ne latou a fatu kae fai se fakaputuga. Oti aka, ‵kai ei latou i luga i te fakaputuga fatu tenā. 47  Ne kamata o fakaigoa ne Lapana a te fakaputuga fatu tenā ki a Ika-situta,* kae ne fakaigoa ne Iakopo ki a Kaleta.* 48  Tenā ne fai atu ei a Lapana: “A te fakaputuga fatu tenei ka fai mo molimau i te va o koe mo au i te aso nei.” Tenā te pogai ne fakaigoa ei ne ia ki a Kaleta,+ 49  mo te Faleleoleo Maluga, me ne fai mai a Lapana: “E kilokilo mai eiloa a Ieova ki a koe mo au māfai e taki ‵nofo tāua i a tāua eiloa. 50  Kafai e se fai faka‵lei ne koe aku tama fāfine, kae kamata o puke mai ne nisi avaga a koe i tafa o aku tama fāfine, faitalia me seai se tino e iloa ne ia, kae masaua i te Atua ka fai mo molimau i te va o koe mo au.” 51  Ne toe fai atu a Lapana ki a Iakopo: “Tenei te fakaputuga fatu, kae tenei te fatu fakamanatu telā ne ‵toki ne au i te va o koe mo au. 52  A te fakaputuga fatu tenei se molimau, kae ko te fatu fakamanatu tenei e fai mo fai se molimau,+ ko te mea ke mo a ma tō atu au ki te suā feitu o te fakaputuga fatu tenei o taua atu ki a koe, kae ke mo a foki ma tō mai koe ki te feitu tenei o te fakaputuga fatu mo te fatu fakamanatu tenei o taua mai ki a au. 53  Ke fai a te Atua o Apelaamo+ mo te Atua o Nakoli, telā ko te Atua foki o te lā tamana mo fai te famasino i te va o tāua.” Kae ne tauto atu a Iakopo i te igoa o te Atua telā ne mataku ki ei a tena tamana ko Isaako.+ 54  Oti aka, ne ofo atu ne Iakopo se taulaga i luga i te mauga kae ‵kami mai ana taina ke ‵kai latou i meakai. Ne ‵kai latou kae ‵moe foki i te po tenā i luga i te mauga. 55  Kae ne tu aka a Lapana i te tafataeao ‵malu, uma atu ki ana mokopuna+ mo ana tama fāfine kae fakamanuia atu latou.+ Tenā ne tiaki ei ne Lapana a te koga tenā o foki atu ki te fale.+

Fakamatalaga mai lalo

Io me “atua o te kāiga; tupua.”
Telā ko te Eufilate.
Io me “kāiga.”
Epelu, “Fakaeteete ke mo a ma fai‵pati koe mo Iakopo mai te ‵lei ki te masei.”
Se tugapati Alamaika telā e fakauiga ki te “Fakaputuga e Molimau ei.”
Se tugapati Epelu telā e fakauiga ki te “Fakaputuga e Molimau ei.”