Kenese 30:1-43

  • Ko fanau ne Pila a Tanu mo Nafatali (1-8)

  • Ko fanau ne Selepa a Kato mo Asela (9-13)

  • Ko fanau ne Lea a Isakala mo Sepulona (14-21)

  • Ko fanau ne Lasela a Iosefa (22-24)

  • Ko gasolo o uke te lafu mamoe a Iakopo (25-43)

30  I te iloaga ne Lasela me e se mafai o fanau ne ia ne tama‵liki ma Iakopo, ne loto masei tou fafine ki tena taina, kae ne fai atu ki a Iakopo: “Tuku mai ne aku tama‵liki, me kafai e seai ko au eiloa ko mate.”  Ne kaitaua a Iakopo ki a Lasela kae fai atu: “E a, au nei ko te Atua, telā ne fai ne ia koe ke seai ne au tama‵liki?”*  Muna a tou fafine: “Tenei taku tavini fafine ko Pila.+ ‵Moe fakatasi mo ia ko te mea ke fai ne ia ne tama‵liki ma aku,* kae ke mafai foki o maua ne aku tama‵liki e auala i a ia.”  Tenā ne tuku atu ei ne ia ki tou tagata a tena tavini fafine ko Pila e pelā me se avaga a ia, ‵moe fakatasi ei a ia mo Iakopo.+  Ne faitama a Pila kae fakamuli ifo ne fanau ne ia se tamaliki tagata ma Iakopo.  Tenā ne fai aka ei a Lasela: “Ko oti ne fai a te Atua mo fai toku famasino kae fakalogo foki ki toku leo, kae ne tuku mai ne ia ki a au se tamaliki tagata.” Tenā te pogai ne fakaigoa ei ne ia tou tagata ki a Tanu.*+  Ne toe faitama a Pila, te tavini fafine a Lasela kae fakamuli ifo ne fanau ne ia te tokolua o tamaliki tagata ma Iakopo.  Tenā ne fai aka ei a Lasela: “Ne tafiti malosi au i te mā tafitiga mo toku taina. Kae ne manumalo foki au i ei!” Tena ne fakaigoa ei ne ia tou tagata ki a Nafatali.*+  I te iloaga ne Lea i a ia ko se fanau, ne puke ne ia tena tavini fafine ko Selepa kae tuku atu ki a Iakopo e pelā me se avaga a ia.+ 10  Fakamuli ifo, ne fanau ne Selepa, te tavini fafine a Lea, se tamaliki tagata ma Iakopo. 11  Tenā ne fai aka ei a Lea: “Se manuia eiloa!” Tenā ne fakaigoa ei ne ia tou tagata ki a Kato.*+ 12  Fakamuli ifo, ne fanau ne Selepa, te tavini fafine a Lea, a te tokolua o tamaliki tagata ma Iakopo. 13  Tenā ne fai aka ei a Lea: “Ko oko eiloa i toku fiafia! Me ka fia‵fia mai eiloa ki a au a tama fāfine katoa o te fenua.”+ Tenā ne fakaigoa ei ne ia tou tagata ki a Asela.*+ 14  Ne sasale atu a Leupena+ i aso o te ‵katiga o saito kae ne maua ne ia a manutalake* i te fatoaga, kae avatu ne ia ki tena mātua ko Lea. Kae ne fai atu a Lasela ki a Lea: “Fakamolemole, aumai aka ne aku mea mai manutalake a tau tama.” 15  Ne fai atu a Lea ki a Lasela: “E mata, se mea faigofie fua ki a koe ke puke ne koe taku avaga?+ E a, ka puke foki ne koe a manutalake a taku tama?” Ne fai atu a Lasela: “Ko ‵lei la. Ka ‵moe a ia mo koe i te po tenei māfai e tuku mai ne koe ne manutalake a tau tama.” 16  I te fokimaiga a Iakopo mai te fatoaga i te afiafi tenā, ne fanatu a Lea o fakafetaui ki a ia, kae fai atu: “A koe ka ‵moe mo au i te po nei, me ko oti ne ‵togi ne au koe ki manutalake a taku tama.” Tenā ne ‵moe ei lāua i te po tenā. 17  Ne lagona ne te Atua te ‵talo a Lea kae tali atu ki ei, faitama ei a ia kae fakamuli ifo ne fanau mai ne ia te tokolima o tamaliki tāgata a Iakopo. 18  Tenā ne fai aka ei a Lea: “Ko oti ne tuku mai ne te Atua toku ‵togi, me ko oti ne tuku atu ne au taku tavini ki taku avaga.” Tenā ne fakaigoa ei ne ia tou tagata ki a Isakala.*+ 19  Ne toe faitama foki a Lea kae fakamuli ifo ne fanau mai ne ia te tokoono o tamaliki tāgata a Iakopo.+ 20  Ne fai aka ei a Lea: “Ko oti ne tuku mai ne te Atua ki a au se tulaga ‵lei i mua o taku avaga. Nei la, ka talia eiloa au ne taku avaga,+ me ko oti ne fanau ne au ne tamaliki tāgata e tokoono ma ia.”+ Tena ne fakaigoa ei ne ia tou tagata ki a Sepulona.*+ 21  Fakamuli ifo, ne fanau mai ne ia se tamaliki fafine kae fakaigoa ne ia ki a Tina.+ 22  Fakamuli loa, ne toe saga atu te Atua ki a Lasela, ne lagona ne ia ana ‵talo kae tali atu ki ei mai te faiga o tou fafine ke faitama.*+ 23  Ne faitama a Lasela kae fanau mai ne ia se tamaliki tagata. Muna a tou fafine: “Ko oti ne ave kea‵tea ne te Atua toku masiasi!”+ 24  Tenā ne fakaigoa ei ne ia tou tagata ki a Iosefa,*+ kae fai aka: “Ko fakaopoopo mai ne Ieova te suā tamaliki tagata ki a au.” 25  I te otiga ne fanau a Lasela i a Iosefa, ne fai atu a Iakopo ki a Lapana: “Uga atu au ke fano ko te mea ke fano au ki toku kāiga mo toku fenua.+ 26  Tuku mai aku avaga mo aku tama‵liki kolā ne tavini ei au ki a koe, ko te mea ke na fano au; me e iloa ‵lei ne koe taku taviniga ne fai ki a koe.”+ 27  Tenā ne fai atu ei a Lapana ki a ia: “Kafai e alofa mai koe ki a au, fakamolemole sa olo. Ko oti ne matea ne au a fakailoga* e uke e fakaasi mai i ei me e fakamanuia au ne Ieova ona ko koe.” 28  Kae ne toe fai atu a ia: “Taku mai ki a au tou ‵togi, kae ka tuku atu eiloa ne au.”+ 29  Ne fai atu a Iakopo ki a ia: “E iloa ‵lei ne koe te auala ne tavini atu ei au ki a koe e pelā foki mo te tausiga ne au o au lafu manu;+ 30  ne mu‵tana fua au manu kae koi tuai o oko mai au, kae ko oti ne gasolo aka o uke au manu kae ne fakamanuia foki koe ne Ieova talu te taimi ne oko mai ei au. Tela la, ko te taimi fea ka fai ei ne au se mea mō toku kāiga eiloa?”+ 31  Tenā ne fai atu ei a Lapana: “Se a taku mea ka tuku atu ki a koe?” Muna a Iakopo: “E seai eiloa sau mea e tasi e tuku mai ma aku! Kafai e fai ne koe te mea e tasi tenei mō oku, ka toe tausi eiloa ne au tau lafu manu, kae puipui foki latou.+ 32  Ka sasale atu au i loto i tau lafu manu i te aso nei. Ke ‵vae aka kea‵tea ne koe a mamoe katoa kolā e ilailā kae pule‵pule, mo tamā mamoe tāgata kolā e lanu kakī, mo so se kouti fafine telā e pulepule kae ilailā. Tenā eiloa toku ‵togi mai te taimi nei o fano ki mua.+ 33  Kae ka matea eiloa ne koe toku amiotonu* māfai e vau koe i se aso o onoono ki toku ‵togi; me kafai e lavea ne koe so se kouti fafine telā e se ilailā kae e se pulepule io me ko so se tamā mamoe tagata telā e se lanu kakī, ka iloa ei ne koe me ne kaisoa ne au a manu konā.” 34  Ne fai atu a Lapana: “Ko ‵lei la! Ke fai eiloa e pelā mo au pati.”+ 35  I te aso eiloa tenā, ne ‵vae ei kea‵tea ne ia a kouti tāgata kolā e sele‵sele kae pule‵pule mo kouti fāfine kolā e ilailā kae pule‵pule, mo so se tamā mamoe tagata telā e isi se pule ‵kena i ei kae lanu kakī, kae tuku atu ke tausi ne ana tama tāgata. 36  Oti aka, ave ei ne Lapana tena lafu manu ki te koga telā e ‵tusa mo te tolu o aso te ‵mao mai i a Iakopo, māfai e faimalaga atu ki ei, kae ne tausi ne Iakopo a manu a Lapana kolā ne ‵toe mai. 37  Ne puke ne Iakopo a lakau kolā ne ‵kati mai te lakau ko te lipeno, te alamoni mo te alemoni, kae ne ‵fole ne ia kea‵tea a pa‵kili o lakau konā ko tuku faka‵sau mai ei a pule ‵kena. 38  Tenā ne tuku atu ei ne ia a lakau kolā ko oti ne ‵fole ki loto i tali fainu manu kolā ka inu i ei a manu, ko te mea ke mafai o fai avaga latou i mua o lakau konā, māfai ko o‵mai o inu. 39  Kae ka fai avaga a manu i mua o lakau konā, kae ka fa‵nau mai ei ne latou a punua manu kolā e sele‵sele, e ilailā, kae pule‵pule. 40  Tenā ne ‵vae ei kea‵tea ne Iakopo a tamā mamoe tāgata kae ‵fuli atu a te lafu manu ki te koga e ‵tu ei a manu sele‵sele kae lanu kakī a Lapana. Oti aka, ‵vae ei ne ia kea‵tea ana manu, ke mo a ma ‵milo fakatasi mo manu a Lapana. 41  Kae kafai ko fai avaga a manu kolā e foitino ma‵losi, ko tuku atu i ei ne Iakopo a lakau i loto i tali fainu manu i mua o manu konā, ko te mea ke fai avaga a manu i tafa o lakau konā. 42  Kae kafai ne manu vāi‵vai, e se tuku atu ne ia a lakau konā. Tela la, a manu kolā e vāi‵vai i a Lapana, kae ko manu foitino malosi‵losi i a Iakopo.+ 43  Kae ne gasolo aka faeloa o maumea a Iakopo, kae ne maua ne ia a lafu manu mo tavini tāgata mo tavini fāfine mo kamela mo asini e uke.+

Fakamatalaga mai lalo

Io me “ne ‵pono ne ia te moegatama o koe.”
Epelu, “ke fanau i luga i oku tulivae.”
Tena uiga “Famasino.”
Tena uiga “Taku Tafitiga.”
Tena uiga “Manuia.”
Tena uiga “Fiafia; Fiafiaga.”
Se tamā lakau mai te itukāiga o te pateta telā e isi ne ana fuataga.
Tena uiga “A ia ko Toku ‵Togi.”
Tena uiga “Taliaga.”
Epelu, “kae ko te Atua ne fakalogo ki a ia kae ‵tala ne ia tena moegatama.”
Ko te fakatoetoega o Iosifia, ko tena uiga “Ke Fakaopoopo (Fakauke) ne Ioa.”
Io me “ko oti ne matea ne au a fakamaoniga.”
Io me “fai mea tonu.”