Kenese 28:1-22

  • Ko uga ne Isaako a Iakopo ki Patana-alama (1-9)

  • Te moemiti a Iakopo i Peteli (10-22)

    • Ko fakamautinoa te folafolaga a te Atua ki a Iakopo (13-15)

28  Ne kalaga atu a Isaako ki a Iakopo kae fakamanuia ne ia kae fakatonu atu ki ei, ana muna: “E se ‵tau o avaga koe ki se fafine mai tamafine o Kanana.+  Fano ki Patana-alama ki te kāiga o Petueli, te tamana o tou mātua, kae puke mai se avaga ma koe mai tama fāfine a Lapana,+ te tuagane o tou mātua.  Ka fakamanuia koe ne te Atua Malosi Katoatoa kae fai ne ia ke fua malosi kae fakatokouke tou gafa, kae ka fai eiloa koe mo fai se fakapotopotoga o tino.+  Kae ka tuku atu ne ia ki a koe a fakamanuiaga kolā ne folafola atu ne ia ki a Apelaamo,+ ki a koe mo tau tama,* ko te mea ke fai mō koe te fenua telā ne nofo koe i ei e pelā me se tino fakaa‵tea, telā ne tuku ne te Atua ki a Apelaamo.”+  Tenā ne uga ei ne Isaako a Iakopo ke fano, fano ei a ia ki Patana-alama, ki a Lapana te tama tagata a Petueli te tagata Alamea,+ te tuagane o Lepeka,+ te mātua o Iakopo mo Esau.  Ne lavea ne Esau me ne fakamanuia ne Isaako a Iakopo kae ne uga atu ke fano ki Patana-alama o puke mai sena avaga i ei, kae i te taimi ne fakamanuia ei ne ia ne fakatonu atu a ia: “Ke mo a eiloa ma avaga koe ki tamafine Kanana,”+  kae ne fakalogo eiloa a Iakopo ki tena tamana mo tena mātua kae ne fano ki Patana-alama.+  Ne iloa ne Esau me i tena tamana ko Isaako+ e se fiafia ki tamafine Kanana,  tenā ne fanatu ei a Esau ki a Isamaeli kae puke ne ia a Malata mo fai tena avaga, te tama fafine a Isamaeli, telā ko te tama tagata a Apelaamo kae ko te tuagane o Nepaiota, i tafa o ana nisi avaga.+ 10  Ne tiaki ne Iakopo a Pelesepa kae fanatu i tena auala ki Halana.+ 11  Ne oko atu a ia ki se koga e tasi kae ne fakatoka a ia o moe i te po tenā i konā me ko oti ne tō te mata o te la. Ne puke mai ne ia se fatu e tasi mai te koga tenā mo fai tena kali kae takato ki lalo i konā.+ 12  Tenā ne moemiti ei a ia, kae kiloke! e isi se kakega e tu i te lalolagi kae oko atu tena suā mata ki te lagi; kae e isi ne agelu a te Atua e olo aka kae olo ifo i ei.+ 13  Kae kiloke! a Ieova tenā e nofo mai luga atu i ei, kae ne fai mai a ia: “Au ko Ieova te Atua o tou tamana ko Apelaamo mo te Atua o Isaako.+ A te laukele tenā e takato koe i ei, ka tuku atu ne au ki a koe mo tau tama.*+ 14  Kae ko tau tama* ka fai eiloa e pelā mo ‵pefu o te laukele i te tokouke,+ kae ka salalau atu koutou ki te feitu ki togala mo saegala, mo te feitu ki mātū mo saute, kae e auala i a koe mo tau tama* ka maua eiloa ne kāiga katoa i luga i te laukele a fakamanuiaga.+ 15  Ka fakatasi atu eiloa au ki a koe kae puipui ne au a koe i so se koga e fano koe ki ei, kae ka fakafoki mai ne au a koe ki te fenua tenei.+ Ka se tiakina eiloa ne au a koe ke oko ki te taimi e fakataunu ei taku tautoga tenei ki a koe.”+ 16  Ne ala aka a Iakopo kae fai aka penei: “E tonu eiloa i a Ieova e nofo i te koga tenei, kae e se iloa ne au.” 17  Ne mataku tou tagata kae toe fai aka: “Ko oko eiloa te fakamataku o te koga tenei! Tenei eiloa te fale o te Atua+ kae tenei foki te mataloa ki te lagi.”+ 18  Ne tu aka a Iakopo i te tafataeao ‵malu, puke ne ia te fatu telā ne aluga a ia ki ei, kae ‵toki ne ia mo fai se fatu fakamanatu kae ‵ligi atu a sinu ki luga i ei.+ 19  Tenā ne fakaigoa ei ne ia te koga tenā ki a Peteli,* kae ko te igoa muamua o te fakai tenā ko Lusā.+ 20  Tenā ne fai ei ne Iakopo se tautoga, ana muna: “Kafai e tumau eiloa a te Atua i te fakatasi mai ki a au kae puipui ne ia au i taku malaga, kae tuku mai foki a falaoa mo oku kai mo gatu mo oku pei 21  kae toe foki atu au mo te filemu ki te kāiga o toku tamana, ko fakamaoni mai ei i a Ieova ko toku Atua eiloa. 22  Kae ko te fatu tenei ne fakatu ne au e pelā me se fatu fakamanatu ka fai mo fai te fale o te Atua,+ kae ka tuku atu eiloa ne au ki a koe a te tasi-vae-sefulu o mea katoa kolā e tuku mai ne koe ki a au.”

Fakamatalaga mai lalo

Epelu, “fanau.”
Epelu, “fanau.”
Epelu, “fanau.”
Epelu, “fanau.”
Tena uiga “Te Fale o te Atua.”