Kenese 26:1-35

  • Ko Isaako mo Lepeka i Kelaa (1-11)

    • Ko fakamautinoa te folafolaga a te Atua ki a Isaako (3-5)

  • Te kinauga ona ko vaikeli (12-25)

  • Te feagaiga a Isaako mo Apimeleko (26-33)

  • Avaga Heti a Esau (34, 35)

26  Ne poko se oge i te fenua tenā, e pelā mo te oge muamua telā ne poko i aso o Apelaamo,+ tenā ne fano ei a Isaako ki a Apimeleko te tupu o tino Filisitia i Kelaa.  Tenā ne fakasae atu ei a Ieova ki a ia kae fai atu: “Sa fano ki Aikupito. Nofo i te fenua telā ka fakasino atu ne au ki a koe.  Nofo i te fenua tenei e pelā me se tino fakaa‵tea,+ kae ka fakatasi atu faeloa au ki a koe kae fakamanuia koe me ka tuku atu ne au ki a koe mo au tama* a fenua katoa konei,+ kae ka fakataunu ne au taku tautoga ne fai ki tou tamana ko Apelaamo:+  ‘Ka fakatokouke eiloa ne au au tama* e pelā mo fetū o te lagi;+ kae ka tuku atu ne au ki au tama* a fenua katoa konei;+ kae e auala i au tama* ka maua ei ne atufenua katoa o te lalolagi se fakamanuiaga mō latou,’+  ona ko Apelaamo ne fakalogo ki toku leo kae fai faeloa a mea e manako au ki ei, ko aku fakatonuga, aku tulafono fakavae mo aku tulafono.”+  Tenā ne nofo eiloa a Isaako i Kelaa.+  I taimi katoa ne fesili atu ei a tāgata o te fenua tenā e uiga ki tena avaga, ne tali atu a ia: “A ia ko toku tuagane.”+ Ne mataku a ia ma fai atu, “A ia ko taku avaga,” me ne fai mai tou tagata, “Kāti ka tamate au ne tāgata o te fenua ona ko Lepeka,” me i a ia se fafine taulekaleka.+  I se taimi tai leva mai tua ifo, ne fatio ifo a Apimeleko te tupu o tino Filisitia i te famalama, kae matea ne ia a Isaako e fai ana faifaiga fakafamau* mo tena avaga ko Lepeka.+  Ne kalaga fakavave atu a Apimeleko ki a Isaako kae fai atu: “A te fafine tenā ko tau avaga eiloa! Kaia ne fai mai ei koe: ‘A ia ko toku tuagane’?” Kae ne fai atu a Isaako ki a ia: “Au ne fai atu penā me i a au e mataku i a au ma tamate ona ko ia.”+ 10  Kae ne toe fai atu a Apimeleko: “Se a te mea tenei ko fai ne koe ki a matou?+ Ne faigofie fua o ‵moe se tino e tokotasi mai i oku tino mo tau avaga, kae ko fai ne koe a matou ke agasala!”+ 11  Tenā ne fakatonu atu ei a Apimeleko ki ana tino katoa, ana muna: “So se tino e patele ki te tagata tenei mo tena avaga ka tamate eiloa!” 12  Kae ne kamata o ‵toki ne Isaako a fuaga i te laukele tenā, kae i te tausaga tenā ne tau ne ia ana fuataga e faka-100 taimi te uke i lō ana fuaga ne ‵toki, me ne fakamanuia a ia ne Ieova.+ 13  Ne maumea tou tagata, kae ne gasolo aka faeloa o uke ana mea ke oko eiloa ki te taimi ko maumea ‵ki ei a ia. 14  Ne maua ne ia a lafu mamoe mo lafu pulumakau e uke mo tavini e tokouke,+ kae ne kamata o loto ma‵sei a tino Filisitia ki a ia. 15  Tenā ne puke ei ne tino Filisitia a one kae tanu ki ei a vaikeli kolā ne keli ne tavini a tena tamana i aso o Apelaamo.+ 16  Tenā ne fai atu ei a Apimeleko ki a Isaako: “Fano kea‵tea mai i omotou tafa, me i a koe ko gasolo o malosi atu i lō matou.” 17  Tenā ne fano ei a Isaako mai i konā o nofo i te vanu o Kelaa.+ 18  Kae ne toe keli ne Isaako a vaikeli kolā ne keli i aso o tena tamana ko Apelaamo kolā ne tanu ne tino Filisitia mai tua o te mate o Apelaamo,+ kae ne fakaigoa ne ia ki igoa kolā ne fakaigoa ne tena tamana ki ei.+ 19  I te taimi ne keli ei ne tavini a Isaako te vanu, maua ei ne latou se vaikeli e ‵ma a vai i ei. 20  Kae ne kamata o kinau a tausi mamoe o Kelaa mo tausi mamoe a Isaako kae fai atu: “I a matou te vai tenei!” Tenā ne fakaigoa ei ne Isaako a te vaikeli ki a Eseki,* me ne kinau latou e uiga ki ei. 21  Kae ne kamata o keli ne latou te suā vaikeli, kae ne kamata foki latou o kinau i ei. Tenā ne fakaigoa ei ne Isaako ki a Sitina.* 22  Fakamuli ifo, ne fano a Isaako kea‵tea mai i konā kae keli ne ia se isi vaikeli, kae ne seki toe kinau latou e uiga ki ei. Tenā ne fakaigoa ei ne ia ki a Leopota* kae fai atu: “Ne fai penā me ko oti ne tuku mai ne Ieova se manafa e lava kae ‵toe mō tatou kae fakamanuia ne ia tatou i te laukele tenei.”+ 23  Tenā ne fanatu ei a ia mai i konā ki Pelesepa.+ 24  I te po tenā ne fakasae atu a Ieova ki a ia kae fai atu: “Au ko te Atua o tou tamana ko Apelaamo.+ Sa mataku,+ me i a au e fakatasi atu ki a koe, kae ka fakamanuia ne au a koe kae fakatokouke au tama* ona ko taku tavini ko Apelaamo.”+ 25  Ne faite ne ia se fatafaitaulaga i konā kae kalaga atu ki te igoa o Ieova.+ Kae ne fakatu ne Isaako tena faleie i konā+ kae ne keli ne ana tavini se vaikeli i te koga tenā. 26  Fakamuli ifo, ne fanatu a Apimeleko ki a Isaako mai Kelaa fakatasi mo Ausata tena tino fakatonutonu mo Pikolo te takitaki o tena kautau.+ 27  Ne fai atu a Isaako ki a latou: “Kaia ko o‵mai ei koutou ki a au i a koutou ne takalia‵lia ki a au kae uga au ke fano kea‵tea mai otou tafa?” 28  Ne fai atu latou: “Ko matea faka‵lei ne matou i a Ieova ne fakatasi atu faeloa ki a koe.+ Tela la, ko fai atu matou, ‘Fakamolemole ke fai se tautoga i te va o matou mo koe, kae ke fai foki ne matou se feagaiga mo koe+ 29  me ka se fai eiloa ne koe se mea masei ki a matou e pelā mo matou ne seki fakalogo‵mae atu ki a koe, kae ne fai fua ne matou a te mea ‵lei ki a koe me ne uga ne matou koe ke fano mo te filemu. Ko koe nei te tino e fakamanuia ne Ieova.’” 30  Tenā ne fai ei ne Isaako se ‵kaiga mō latou kae ne ‵kai kae inu latou. 31  Ne ‵tu aka latou i te tafataeao ‵malu kae fai te lotou tautoga i te va o latou.+ Oti aka, tuku atu ei ne Isaako latou ke olo mo te filemu. 32  Ko te aso eiloa tenā ne olo atu ei a tavini a Isaako kae fakailoa atu ki a ia e uiga ki te vaikeli telā ne keli ne latou,+ kae fai atu ki a ia: “Ko maua ne matou te vai!” 33  Ne fakaigoa ne Isaako te vaikeli tenā ki a Sipaa. Tenā te pogai ne fakaigoa ei te fakai tenā ki a Pelesepa,+ ke oko mai eiloa ki te aso nei. 34  I te taimi ko 40 ei tausaga o Esau ne avaga a ia ki a Iutiti te tama fafine a Peeli te tino Heti mo Pasemeta foki te tama fafine a Eloni te tino Heti.+ 35  Kae ne fai lāua mo mea fakafanoanoa ki a Isaako mo Lepeka.+

Fakamatalaga mai lalo

Epelu, “fanau.”
Epelu, “fanau.”
Epelu, “fanau.”
Epelu, “fanau.”
Io me “fakatau ‵sai.”
Tena uiga “Finauga.”
Tena uiga “‵Losiga.”
Tena uiga “Koga Lauefa.”
Epelu, “fanau.”