Kenese 24:1-67

  • Ko ‵sala se avaga ma Isaako (1-58)

  • Ko fanatu a Lepeka o fakafetaui ki a Isaako (59-67)

24  Ko matua ‵ki a Apelaamo i te taimi nei, kae ko leva eiloa a tausaga o tena olaga, kae ne fakamanuia ne Ieova a Apelaamo i mea katoa.+  Ne fai atu a Apelaamo ki tena toe tavini matua i tena kaukāiga, telā ne tausi ne ia ana mea katoa:+ “Fakamolemole tuku mai tou lima ki te feitu ki lalo o toku kauaga,  kae ka fai ne au koe ke tauto mai i te igoa o Ieova, te Atua o te lagi mo te lalolagi, me ka se puke mai ne koe se avaga ma taku tamaliki tagata mai i tama‵liki fāfine a tino Kanana, kolā e ‵nofo fakatasi matou.+  E ‵tau mo koe o fano ki toku fenua mo oku kāiga+ o puke mai i ei se avaga ma taku tama, ko Isaako.”  Kae ne fai atu te tavini ki a ia: “Kafai la e se manako te fafine ke o‵mai māua ki te fenua tenei? E a, e ‵tau o fakafoki ne au tau tama ki te fenua telā ne vau koe i ei?”+  Tenā ne fai atu ei a Apelaamo ki a ia: “Onoono faka‵lei ke mo a ma ave ne koe taku tama ki te koga tenā.+  A Ieova te Atua o te lagi, telā ne puke mai ne ia au mai te fale o toku tamana mo te fenua o oku kāiga+ kae ne faipati mai ki a au kae tauto mai ki a au:+ ‘Ka tuku atu ne au te fenua+ tenei ki tau tama,’*+ ka uga atu ne ia tena agelu ke mua i a koe,+ kae ka puke mai eiloa ne koe se avaga ma taku tama mai konā.+  Kae kafai e se fia vau te fafine i a koe, ko saoloto ei koe mai te tautoga tenei. Kae e se ‵tau mo koe o ave taku tama ki te koga tenā.”  Ne tuku atu te lima o te tavini i te feitu ki lalo o te kauaga o Apelaamo tena matai kae tauto atu ki a ia e uiga ki te mea tenei.+ 10  Ne puke ne te tavini a kamela e sefulu a tena matai kae fano, ne puke ne ia a vaegā mea ‵lei katoa mai i tena matai. Tenā ne fano ei a ia i tena auala ki Mesopotamia, ki te fakai o Nakoli. 11  Ne fai ne ia ke malō‵lo a kamela i tafa o se vaikeli i tua o te fakai. A te taimi tenā ko te fakaafiafi, ko te taimi e olo atu ei a fāfine o asu vai. 12  Tenā ne fai atu ei a ia: “Ieova te Atua o toku matai ko Apelaamo, fakamolemole fakamanuia mai au i te aso nei, kae fakaasi mai tou alofa fakamaoni ki toku matai ko Apelaamo. 13  Au tenei ko tu i tafa o te vaikeli, kae ko tama fāfine a tāgata o te fakai ko o‵mai o asu vai. 14  A te tamafine telā e fai atu au ki ei: ‘Fakamolemole tuku ifo tau tiā vai ki lalo ke inu aka au,’ kae tali mai a ia, ‘Inu la, kae ka fainu foki ne au au kamela,’ ke filifili la ne koe a te tamafine tenā mo fai te avaga a tau tavini ko Isaako; kae e auala i te mea tenei ka iloa ei ne au me ko oti ne fakaasi mai ne koe tou alofa fakamaoni ki toku matai.” 15  Kae koi tuai o oti atu ana pati, kae vau a Lepeka, te tama fafine a Petueli,+ te tama tagata a Milika+ te avaga a Nakoli,+ te taina o Apelaamo, mo tena tiā vai e amo i tena tuauma. 16  Ko oko eiloa te taulekaleka o te tamafine tenei, se tamafine ‵ma telā e seki ‵moe fakatauavaga eiloa mo se tagata. Ne fanaifo tou fafine ki lalo i te vaikeli, utu tena tiā vai, kae toe fanaka ki luga. 17  Ne tele fakavave atu te tavini o fakafetaui ki a ia kae fai atu: “Fakamolemole tuku mai ne mu vai mai tau tiā vai ke inu aka au.” 18  Ana muna: “Inu koe e tou ‵malu.” Ne tuku fakavave ifo ne ia tena tiā vai mai tena tuauma kae tuku atu ke inu tou tagata. 19  I te otiga ne fainu ne ia tou tagata, ana muna: “Ka asu foki ne au a vai mo fainu au kamela ke ma‵kona.” 20  Tenā ne ‵ligi fakavave ei ne ia a vai i tena tiā vai ki te tali fagai manu, kae fokifoki atu faeloa ki te vaikeli o asu aka a vai, kae ne asu mai faeloa ne ia a vai ki kamela katoa a te tavini. 21  I te taimi tenā, ne onoono atu faeloa te tavini ki a ia mo te ofo, kae mafaufau me e mata ko oti ne fakamanuia ne Ieova a tena malaga io me ikai. 22  I te otiga ne inu a kamela, ne puke aka ne te tavini se ligi aulo o te isu mō tou fafine, telā e āfa sekela* te ‵mafa mo taulima aulo e lua kolā e sefulu sekela* te ‵mafa, 23  kae fai atu, “Fakamolemole, fakaasi mai ki a au me ko oi ou mātua? E mata, e isi se potu e avanoa i te fale o tou tamana ke ‵moe ei matou i te po tenei?” 24  Ana muna ki te tavini: “Au ko te tama fafine a Petueli+ te tama tagata a Milika i tena avaga ko Nakoli.”+ 25  Kae ne toe fai atu a tou fafine: “E uke omotou kausaito mo mea fagai manu, e pelā foki mo te koga ke ‵moe koutou i ei i te po nei.” 26  Tenā ne punou ifo ei tou tagata kae ifo atu i mua o Ieova 27  kae fai atu: “Ke vikia a Ieova, te Atua o toku matai ko Apelaamo, me ne fakaasi atu faeloa ne ia tena alofa fakamaoni mo tena fakamaoni ki toku matai. Ne takitaki mai au ne Ieova ki te fale o taina o toku matai.” 28  Kae ne tele atu te tamafine tenā o fakamatala atu ki te kaukāiga o tena mātua a mea katoa konei. 29  E isi se tuagane o Lepeka e igoa ki a Lapana.+ Kae ne tele atu a Lapana ki te tagata i tua i te vaikeli. 30  I te laveaga ne ia a te ligi i te isu o tena tuagane mo taulima i ana lima kae lagona ne ia a pati a tena tuagane ko Lepeka e fai penei, “Konei a pati a te tagata ne fai mai ki a au,” fanatu ei a ia o fakafetaui ki te tagata telā koi tu eiloa i tafa o kamela i te vaikeli. 31  Kae ne fai atu a ia: “Vau, a koe telā ko oti ne fakamanuia ne Ieova. Kaia e tu ei koe i te koga tenā? Ko oti ne fakatoka ne au te fale mo se koga ke ‵nofo i ei au kamela.” 32  Ne ulu atu te tagata ki loto i te fale, kae ne talatala ne Lapana a kamela kae tuku atu a kausaito mo mea fagai manu ki a latou. Ne puke mai ne ia a vai mo ‵fulu ana vae e penā foki mo vae o tāgata kolā ne o‵mai mo ia. 33  Kae i te taimi ko oti ei ne fakatoka a meakai ki ana mua, ne fai atu tou tagata: “E se mafai au o kai seiloga ke fai atu ne au a mea kolā e ‵tau o fai atu.” Muna a Lapana: “Faipati!” 34  Tenā ne fai atu ei a ia: “Au ko te tavini a Apelaamo.+ 35  Kae ko Ieova ne fakamanuia malosi ne ia toku matai, kae fakamaumea malosi ne ia mai te tukuatuga ki a ia a mamoe mo pulumakau, siliva mo aulo, tavini tāgata mo tavini fāfine, mo kamela mo asini.+ 36  E se gata i ei, ne fanau ne Sala se tamaliki tagata ma toku matai i te taimi ko matua ‵ki ei a ia;+ kae ka tuku atu ne ia ana mea katoa ki tena tama.+ 37  Kae ne fai mai toku matai ke tauto atu au, penei: ‘E se ‵tau mo koe o puke mai se avaga ma taku tama mai tama fāfine a tino Kanana, i te fenua tenei e nofo ei au.+ 38  Ikai, kae ko koe ka fano ki te fale o toku tamana mo toku kāiga,+ kae e ‵tau mo koe o puke mai se avaga ma taku tama.’+ 39  Kae ne fai atu au ki toku matai: ‘Kae kafai la e se manako te fafine ke o‵mai māua?’+ 40  Ana muna ki a au: ‘A Ieova, telā ne sasale au i ana auala,+ ka uga ne ia tena agelu+ ke olo mo koe kae ka fakamanuia eiloa ne ia tau malaga, kae e ‵tau mo koe o puke mai se avaga ma taku tama mai toku kāiga kae mai i te fale o toku tamana.+ 41  Ka fakasaoloto koe mai tau tautoga ki a au māfai e fano koe ki toku kāiga kae e se tuku atu ne latou te fafine ki a koe. Ka fakasaoloto koe ne te mea tenei mai tau tautoga.’+ 42  “I taku okomaiga ki te vaikeli i te aso nei, ne fai atu ei au: ‘Ieova te Atua o toku matai ko Apelaamo, kafai e fakamanuia ne koe taku malaga, 43  au tenei ko tu i tafa o te vaikeli. Kafai e vau se tamafine+ o asu vai, ka fai atu au ki a ia: “Fakamolemole, ke inu aka au i ne mu vai mai tau tiā vai,” 44  kae ka fai mai a ia ki a au: “Inu koe, kae ka asu foki ne au a vai mo fainu au kamela.” Ke fai la a te fafine tenā mo fai te tino telā ko oti ne filifili ne Ieova mo fai te avaga a te tama a toku matai.’+ 45  “Kae koi tuai o oti aku pati i toku loto, kae ko vau a Lepeka mo tena tiā vai e amo i tena tuauma, ne fano a ia ki lalo i te vaikeli kae kamata o asu vai. Tenā ne fai atu ei au ki a ia: ‘Fakamolemole, ke inu aka au.’+ 46  Ne tuku fakavave ki lalo tena tiā vai mai tena tuauma kae fai mai, ‘Inu koe,+ kae ka fainu foki ne au au kamela.’ Tenā ne inu ei au, fainu foki ei ne ia aku kamela. 47  Mai tua ifo ne fesili atu au ki a ia: ‘Ko oi ou mātua?’ kae ne tali mai a ia: ‘Au ko te tama fafine a Petueli te tama a Nakoli i tena avaga ko Milika.’ Tenā ne faka‵mau atu ei ne au te ligi ki tena isu kae faulu atu a taulima ki ana lima.+ 48  Kae ne punou ifo au kae ifo atu i mua o Ieova kae ‵viki atu ki a Ieova te Atua o toku matai ko Apelaamo,+ telā ne takitaki mai ne ia au i te auala tonu ke puke a te tama fafine a te taina o toku matai ma tena tama. 49  Kae nei la, fai mai ki a au māfai e ma‵nako koutou o fakaasi mai te otou a‵lofa fakamaoni mo te fakamaoni ki toku matai; kae kafai e se talia ne koutou, fakailoa mai ko te mea ke iloa ne au te mea e ‵tau o fai.”*+ 50  Tenā ne tali atu ei a Lapana mo Petueli: “A te mea tenei se mea mai i a Ieova. E se mafai ne māua o fai atu ao io me ikai ki a koe.* 51  Tenā Lepeka i ou mua. Puke a ia kae olo, kae ke fai a ia mo fai te avaga a te tama a tou matai, e pelā eiloa mo pati a Ieova.” 52  I te lagonaga ne te tavini a Apelaamo a lā pati, ifo fakavave ei a ia ki lalo i te laukele i mua o Ieova. 53  Kae ne kamata o aumai ne te tavini a mea e faite ki siliva mo aulo mo gatu kae tuku atu ki a Lepeka, kae ne tuku atu ne ia a meaalofa tāua ki tena tuagane mo tena mātua. 54  Mai tua ifo i ei, ne ‵kai kae inu a te tavini mo tāgata kolā ne olo atu mo ia, kae ne ‵moe latou i konā. I tena tuakaga i te taeao, ne fai atu a ia: “Tuku mai au ke fano ki toku matai.” 55  Kae ne fai atu te tuagane mo te mātua o Lepeka: “Tuku mua ke ‵nofo matou mo te tamafine i aso e sefulu. Tenā ko mafai ei a ia o fano.” 56  Kae ne fai atu a ia ki a lāua: “Sa faka‵lave ne koulua au, me ko oti ne fai ne Ieova taku malaga ke iku manuia. Tuku mai au ke fano, ko te mea ke fanatu au ki toku matai.” 57  Kae ne fai atu lāua: “Ke ka‵laga māua ki te tamafine ke vau ke fesili atu ki ei.” 58  Ne ka‵laga lāua ki a Lepeka kae fai atu ki ei: “E manako koe o olo mo te tagata tenei?” Ne tali atu a ia: “Au e manako o fano.” 59  Tenā ne tuku atu ei ne latou a Lepeka+ te lotou tuagane mo tena tausi*+ mo te tavini a Apelaamo mo ana tāgata ke olo. 60  Kae ne fakamanuia ne latou a Lepeka kae fai atu ki a ia: “Te motou tuagane, ke māfua mai i a koe a tino e tokouke ‵ki, kae ke puke ne tau tama* a fakai* o tino kolā e takalia‵lia ki a latou.”+ 61  Tenā ne ‵tu aka ei a Lepeka mo ana fāfine fesoasoani, ‵sopo ki luga i kamela kae tau‵tali atu i te tagata tenā. Ne puke ne te tavini a Lepeka kae olo atu i te lotou auala. 62  Kae ko Isaako ne vau i te auala telā e tau atu ki Pia-laloi,+ me i a ia e nofo i te fenua o te Nekepi.+ 63  A Isaako ne fanatu o sasale i te koga tenā i te afiafi po o mafaufau ‵loto i ei.+ I tena kiloakaga lavea ei ne ia a kamela e o‵mai! 64  I te kiloakaga a Lepeka matea ei ne ia a Isaako, kae ne sopo fakavave ifo a ia ki lalo mo te kamela. 65  Tenā ne fesili atu ei tou fafine ki te tavini: “Ko oi te tagata telā e sasale mai o fakafetaui ki a tatou?” Ne fai atu te tavini: “Ko toku matai.” Puke ei ne ia tena veli o ‵pono ana mata. 66  Kae ne fakamatala atu ne te tavini ki a Isaako a mea katoa kolā ne fai ne ia. 67  Oti aka, aumai ei ne Isaako a Lepeka ki loto i te faleie o tena mātua ko Sala.+ Ne puke ne ia a Lepeka mo fai tena avaga; kae ne alofa malosi a Isaako ki a ia,+ kae ne maua ne Isaako se fakamafanafanaga mai tua o te galoatuga o tena mātua.+

Fakamatalaga mai lalo

Epelu, “fanau.”
A te sekela e ‵pau mo te 11.4 kalame. Onoono ki te MF E14.
A te sekela e ‵pau mo te 11.4 kalame. Onoono ki te MF E14.
Epelu, “‵fuli ki te feitu fakaatamai io me ko te feitu fakamaui.”
Io me “E se mafai ne māua o faipati atu se mea ‵lei io me se mea ma‵sei ki a koe.”
Telā ko tena nesi telā ko tavini nei e pelā me se tino fesoasoani.
Epelu, “fanau.”
Io me “mataloa o fakai.”