Kenese 22:1-24

  • Ko fakailoa ki a Apelaamo ke ofo a Isaako pelā me se taulaga (1-19)

    • Fakamanuiaga e maua ona ko tama a Apelaamo (15-18)

  • Te kāiga o Lepeka (20-24)

22  Fakamuli ifo, ne tofotofo ne te Atua tonu a Apelaamo,+ kae ne fai atu ki a ia: “Apelaamo!” kae ne tali atu tou tagata: “Tenei au!”  Tenā ne fai atu ei a ia: “Fakamolemole, puke tau tama, ko tau tama eiloa e tokotasi telā e alofa malosi koe ki ei,+ ko Isaako,+ kae olo ki te fenua o Molia+ kae ofo atu a ia e pelā me se taulaga ‵sunu i se mauga e tasi telā ka fakasino atu ne au ki a koe.”  Ne ala aka a Apelaamo i te tafataeao ‵malu, fakatoka tena asini kae puke ne ia ana tavini e tokolua kae olo mo ia mo tena tama ko Isaako. Ne ‵kati ne ia a fafie mō te taulaga ‵sunu kae olo atu latou ki te koga telā ne fakasino atu ne te Atua tonu ki a ia.  I te tolu o aso, ne kilo aka a Apelaamo kae lavea ‵mao ne ia te koga tenā.  Ne fai atu Apelaamo ki ana tavini: “‵Nofo koulua i konei mo te asini, kae ka olo atu māua mo te tamaliki ki te koga telā o tapuaki i ei ko toe ‵foki mai ei māua ki a koulua.”  Ne puke ne Apelaamo a fafie mō te taulaga ‵sunu kae tuku atu ki tena tama ko Isaako. Kae puke i ana lima a te afi mo te naifi,* kae ne sa‵sale fakatasi atu lāua.  Kae ne fai atu a Isaako ki tena tamana ko Apelaamo: “Toku tamana!” Ne tali atu a ia: “Io, tenei au e taku tama!” Kae toe fai atu a ia: “Tenei te afi mo fafie, kae tefea la te mamoe mo fai te taulaga ‵sunu?”  Ne tali atu a Apelaamo: “Ka tuku mai eiloa ne te Atua te mamoe mo fai te taulaga ‵sunu,+ e taku tama.” Kae ne sa‵sale fakatasi atu lāua.  Fakamuli loa ne oko atu lāua ki te koga telā ne fakasino atu ne te Atua tonu ki a ia, kae ne faite ne Apelaamo se fatafaitaulaga i konā kae fakatoka a fafie i luga i ei. Ne saisai ne ia a lima mo vae o tena tama ko Isaako kae tuku ki luga i fafie i te fatafaitaulaga.+ 10  Tenā ne ‵kapa atu ei te lima o Apelaamo ki te naifi* ke tamate tena tama.+ 11  Kae ne kalaga ifo te agelu a Ieova mai te lagi ki a ia: “Apelaamo, Apelaamo!” kae ne tali atu a ia: “Tenei au!” 12  Tenā ne fai atu ei a te agelu: “Sa fakapakia ne koe te tamaliki, kae sa fai foki sau mea ki ei, me ko iloa nei ne au i a koe e mataku tonu eiloa ki te Atua me seki taofi ne koe tau tama, ko tau fuatasi eiloa mai i a au.”+ 13  I konā loa ne kilo aka a Apelaamo, matea ei ne ia i ana mua se tamā mamoe tagata e lave‵lave ana suki i se vao lakau. Ne fanatu a Apelaamo o puke mai te tamā mamoe ke ofo atu mo fai te taulaga ‵sunu ke sui ei tena tama. 14  Kae ne fakaigoa ne Apelaamo te koga tenā ki a Ieova-tile.* Tenei te pogai e fai ei a tino i aso nei, penei: “Ka tuku mai ne Ieova i luga i tena mauga a mea kolā e manakogina.”+ 15  Ne toe kalaga ifo a te agelu a Ieova ki a Apelaamo mai te lagi i te lua o taimi, 16  ana muna: “‘Ka tauto atu au e auala i a au eiloa,’ ko te folafolaga a Ieova,+ ‘ona ko te mea ne fai ne koe te mea tenei kae ne seki taofi ne koe tau tama, ko tau fuatasi eiloa,+ 17  ka fakamanuia eiloa ne au a koe kae ka fakatokouke eiloa ne au au tama* e pelā mo fetū o te lagi mo one i te tafatai,+ kae ka puke eiloa ne au tama a fakai* o ana fili.+ 18  Kae e auala i tau tama*+ ka maua ne atufenua katoa o te lalolagi se fakamanuiaga ona ko koe ne fakalogo ki toku leo.’”+ 19  Mai tua ifo i ei, ne toe foki atu a Apelaamo ki ana tavini, ne ‵tu aka latou kae toe ‵foki atu katoa ki Pelesepa;+ kae ne nofo atu eiloa a Apelaamo i Pelesepa. 20  Mai tua ifo i konā ne logo a Apelaamo i se tala: “Ko isi ne tama tāgata a tou taina ko Nakoli+ i tena avaga ko Milika: 21  A Iusa ko tena toekimua, Pusa ko tena taina, mo Kemuelu te tamana o Alamo, 22  Kiseta, Haso, Pilitaso, Itelafo, mo Petueli.”+ 23  A Petueli ko te tamana o Lepeka.+ A te tokovalu konei ko tama a Milika i a Nakoli, te taina o Apelaamo. 24  Ne maua foki ana tama tāgata i tena avaga fakasalasala ko Leuma: ko Tepa, Kaamo, Tahaso, mo Maaka.

Fakamatalaga mai lalo

Io me “naifi ‵ta manu.”
Io me “naifi ‵ta manu.”
Tena uiga “Ka Tuku Mai ne Ieova; Ka Onoono a Ieova ki ei.”
Epelu, “fanau.”
Io me “mataloa o fakai.”
Epelu, “fanau.”