Kenese 20:1-18

  • Ko fakasao a Sala mai i a Apimeleko (1-18)

20  Ne fakamasiki atu ne Apelaamo ana faleie+ mai i konā ki te fenua i te Nekepi* kae kamata o nofo i te va o Katesa+ mo Sula.+ I te taimi ne nofo ei a ia i Kelaa,+  ne toe fai foki ne Apelaamo a te mea ne fai ne ia ki tena avaga ko Sala: “A ia ko toku tuagane.”+ Tenā ne uga atu ei te fekau a Apimeleko, te tupu o Kelaa, ke avatu a Sala ki a ia kae ne puke ne ia tou fafine.+  Fakamuli ifo, ne fakasae atu te Atua i te po ki a Apimeleko i se moemiti kae fai atu ki a ia: “A koe ko ‵pau eiloa mo se tino ko mate ona ko te fafine ne puke mai ne koe,+ me i a ia se fafine avaga kae ko te avaga loa a te suā tagata.”+  Kae ko Apimeleko ne seki fakapilipili atu eiloa ki ana tafa.* Kae ne fai atu a ia: “Ieova, e mata, ka tamate ne koe se fenua telā e seai sena mea ‵se?*  E a, ne seki fai mai tou tagata ki a au, ‘A ia ko toku tuagane,’ kae e a, e seki fai mai foki tou fafine, ‘A ia ko toku tuagane’? Ne fai ne au te mea tenei mo te loto ‵ma mo te sē iloa.”  Tenā ne fai atu ei te Atua tonu ki a ia i te moemiti: “E iloa ne au me ne fai ne koe te mea tenei mo te loto ‵ma, kae ne taofi ne au a koe ke mo a ma agasala mai ki a au. Tenā te pogai ne seki talia ei ne au ke patele koe ki tou fafine.  Nei la, fakafoki te avaga a te tagata tenā me i a ia se pelofeta,+ kae ka ‵talo a ia mō koe+ kae ka ola eiloa koe. Kae kafai e se fakafoki ne koe a ia, ke iloa ne koe i a koe ka mate eiloa, e pelā foki mo tino o tou kaukāiga kātoa.”  Ne tu aka a Apimeleko i te tafataeao ‵malu kae kalaga atu ki ana tavini katoa kae fakailoa atu ki a latou a mea katoa konei, kae ne ma‵taku ‵ki eiloa latou.  Tenā ne ‵kami mai ei ne Apimeleko a Apelaamo kae fai atu ki a ia: “Se a te mea ko fai ne koe ki a matou? Se a te agasala ne fai ne au ki a koe ko aumai ei ne koe ki a au mo toku malo se agasala matagā penei? A te mea ne fai ne koe ki a au e sē se mea tonu.” 10  Ne toe fai atu a Apimeleko ki a Apelaamo: “Ne a ou mafaufauga i te faiga ne koe a te mea tenei?”+ 11  Muna a Apelaamo: “Au ne fai penā ona ko au ne manatu aka penei, ‘E seai eiloa se tino e mataku ki te Atua i te koga tenei, kae ka tamate ne latou au ona ko taku avaga.’+ 12  E se gata i ei, a ia foki ko toku tuagane eiloa, me ko te tama fafine a toku tamana, kae e ‵kese mā mātua, kae ne fai a ia mo fai taku avaga.+ 13  Tela la, i te taimi ne fai mai ei te Atua ke tiakina ne au te fale o toku tamana,+ ne fai atu au ki tou fafine, ‘Ke fai te mea tenei mo auala e fakaasi mai ei tou alofa fakamaoni ki a au: I so se koga e olo tāua ki ei, ke fai atu faeloa koe: “A ia ko toku tuagane.”’”+ 14  Tenā ne puke ei ne Apimeleko a mamoe mo pulumakau mo tavini tāgata mo tavini fāfine kae tuku atu ki a Apelaamo, kae fakafoki atu ne ia a Sala ki tena avaga. 15  Ne fai atu foki Apimeleko: “E avanoa toku laukele ki a koe. Nofo i so se koga e manako koe ki ei.” 16  Kae ne fai atu a ia ki a Sala: “Ko tuku atu ne au e 1,000 tupe siliva ki tou tuagane.+ E fai pelā me se fakailoga ki tino katoa konā e ‵nofo koutou, i a koe e ‵ma* kae seai se mea ‵se ne fai ne koe.” 17  Kae ne kamata a Apelaamo o ‵talo atu ki te Atua tonu, kae ne faka‵lei ne te Atua a Apimeleko mo tena avaga mo ana pologa fāfine, kae ne kamata o maua olotou tama‵liki; 18  me ne fai ne Ieova ke se fanafanau* a fāfine katoa i te kaufale o Apimeleko ona ko Sala, te avaga a Apelaamo.+

Fakamatalaga mai lalo

Io me “ko saute,” telā ko te feitu ki saute o te Fenua o te Folafolaga.
Ko tena uiga, e seki ‵moe fakatauavaga eiloa a ia mo tou fafine.
Io me “amiotonu.”
Epelu, “Kiloke, e ‵tau o ufi ne koe ou mata.”
Io me “ne ‵pono katoatoa a moegatama katoa o te kaufale o Apimeleko.”