Kenese 19:1-38

  • Ko asi atu a agelu ki a Lota (1-11)

  • Ko fakailoa atu ki a Lota mo tena kāiga ke olo kea‵tea (12-22)

  • Ko fakaseai a Sotoma mo Komolo (23-29)

    • Te avaga a Lota ko liu pou masima (26)

  • Lota mo ana tama fāfine (30-38)

    • Te māfuaga o Moapi mo Amoni (37, 38)

19  Ne oko atu a agelu e tokolua konā ki Sotoma i te afiafi, kae ko Lota e sagasaga i te mataloa o te ‵pui o Sotoma. I te laveaga ne Lota a lāua, ne tu aka a ia o fakafetaui atu ki a lāua kae punou ifo mo ana mata e ‵fuli ki te laukele.+  Ana muna: “Te lua ‵malu, fakamolemole, o‵mai ki te fale o tau lua tavini ke ‵moe koulua i ei i te po nei kae ke ‵fulu oulua vae. Tenā ko ala aka ei koulua i te tafataeao ko faima‵laga ei koulua i te lua auala.” Ne fai atu lāua: “Ikai, a māua e olo o ‵moe i te malae o te fakai i te po nei.”  Kae ne finau atu faeloa a ia ki a lāua, tenā ne olo atu ei lāua ki loto i tena fale. Ne fakatoka ne ia se ‵kaiga mō lāua, ne tao ne ia a falaoa sē faka‵fete, kae ne ‵kai ei lāua.  Kae koi tuai o ta‵kato ifo lāua o ‵moe—ne o‵mai a tāgata o Sotoma mai te tamaliki tagata ke oko ki te toeaina, ko latou katoa—o nikoi te fale e pelā me se potukau.  Kae ne ka‵laga atu faeloa latou ki a Lota kae fai atu ki a ia: “Kofea a tāgata kolā ne o‵mai ki tou fale i te po nei? Aumai ki tua ko te mea ke ‵moe fakatauavaga matou mo lāua.”+  Tenā ne fanatu ei a Lota ki tua i a latou i te mataloa, kae ‵pono ne ia te mataloa i ana tua.  Ana muna: “Oku taina, fakamolemole, ke se fai ne koutou se mea matagā penā.  Fakamolemole, e isi ne aku tama fāfine e tokolua kolā e seki ‵moe fakatauavaga eiloa mo se tagata. Ke aumai ne au lāua ki a koutou ko fai ei ne koutou ki a lāua so se mea e ‵lei ki a koutou. Kae ke mo a eiloa ma fai ne koutou se mea ki tāgata konei, me ne o‵mai lāua o faka‵lafi* i toku fale.”+  Olotou muna: “Fakatafa kea‵tea!” Kae ne toe fai atu latou: “A te tino fakaa‵tea tenei ne vau o nofo i konei, kae nei ko fakamasino mai ne ia tatou! E sili atu te matagā o te mea ka fai ne matou ki a koe i lō tāgata konā.” Ne mumu atu latou o ‵teke a Lota ke ofa ne latou te mataloa. 10  Tenā ne ‵kapa atu ei a lima o tāgata konā ki tua kae ‵futi mai a Lota ki loto i te fale, kae ‵pono ne lāua te mataloa. 11  Ne faka‵kivi ne lāua a mata o tāgata kolā e ‵tu i tua o te mataloa o te fale, mai te ‵toe tino malalo ke oko eiloa ki te ‵toe tino maluga, ko te mea ke fi‵ta valevale latou i te ‵salaga o te mataloa. 12  Tenā ne fai atu ei a tāgata konā ki a Lota: “E isi aka foki ne ou kāiga i konei? Ave kea‵tea a avaga o au tama fāfine, au tama tāgata, au tama fāfine mo ou kāiga katoa i te fakai mai te koga tenei! 13  Me ka fakaseai ne māua a te fakai tenei, ona ko te mea ko gasolo aka eiloa o lasi* te ‵tagi a tino ki a Ieova+ e uiga ki a latou, tenā ne uga mai ei māua ne Ieova ke fakaseai te fakai.” 14  Ne fanatu a Lota ki tua kae kamata o faipati atu ki tāgata kolā ka a‵vaga mo ana tama fāfine: “‵Tu ki luga! Olo kea‵tea mai te koga tenei, me ka fakaseai ne Ieova a te fakai!” Kae ne mafau‵fau a tāgata konā i a Lota e fai fa‵kata fua.+ 15  Kae i te vaveao ‵malu ne fakava‵vave ne agelu a Lota, kae fai atu: “Tu ki luga! Puke tau avaga mo au tama fāfine e tokolua kolā e ‵nofo nei mo koe, ko te mea ke mo a ma fakaseai koutou i te taimi e fakasala ei te fakai tenei ona ko ana agasala!”+ 16  Ne fakatalave a Lota, kae ona ko te alofa o Ieova,+ ne puke atu a tāgata konei ki tena lima mo te lima o tena avaga mo lima o ana tama fāfine e tokolua kae ‵taki atu ne lāua o tuku i tua o te fakai.+ 17  I te taimi eiloa ne ‵to atu ei latou ki tua mo te fakai, ne fai atu se agelu: “‵Tele ke ‵sao koutou! Sa ‵kilo ki otou tua+ kae ke mo a ma ‵tu koutou i se koga i te kogā fenua tenei!+ ‵Tele ki te koga maugā ko te mea ke mo a ma fakaseai koutou!” 18  Tenā ne fai atu ei a Lota ki a lāua: “Ikai e Ieova, fakamolemole, sa uga atu au ki te koga tenā! 19  Fakamolemole, kafai e fiafia mai koe ki tau tavini kae e fakaasi mai foki tou atafai* ke fakasao au,+ kae ko au e se mafai o tele atu ki te koga maugā i a au e mataku i te mea ma ‵poa au ne te fakalavelave, ko mate ei au.+ 20  Fakamolemole, e isi se fakai tenei e pili mai ke tele au ki ei; se tamā fakai fua. Fakamolemole, e mafai o tele au ki ei? Se tamā fakai fua, ko sao ei au.”* 21  Ne fai atu te agelu ki a ia: “Ko ‵lei la, ka amanaia foki au ki a koe+ kae ka se fakaseai ne au te fakai tenā e fai mai koe ki ei.+ 22  Ke vave! Tele ki ei, me e se mafai ne au o fai se mea seiloga ke oko koe ki ei!”+ Tenā te pogai ne fakaigoa ei ne ia te fakai tenā ko Soala.*+ 23  Ne fatoa sae aka te mata o te la i te taimi ne oko atu ei a Lota ki Soala. 24  Tenā ne fai ei ne Ieova ke ‵to ifo se vaiua o pauta ‵ka mo te afi ki luga i Sotoma mo Komolo​—ne faka‵to ifo ne Ieova a mea konā mai te lagi.+ 25  Tenā ne fakaseai ei ne ia a fakai konei, ao, ko te kogā fenua kātoa eiloa, e aofia i ei a tino katoa i fakai konā mo lakau o te laukele.+ 26  Kae ko te avaga a Lota, telā ne vau mai i ana tua, ne kamata o kilo ki tua, kae ne liu pou masima+ a tou fafine. 27  Ne tu aka a Apelaamo i te tafataeao ‵malu kae fano ki te koga telā ne tu ei a ia i mua o Ieova.+ 28  I te taimi ne kilo ifo ei a ia ki Sotoma mo Komolo mo fenua katoa i te kogā fenua tenā ne matea ne ia se mea fakaofoofogia. Ne matea atu ne ia se au matolu e fanaka mai te fenua e pelā eiloa mo te matolu o te au o se ogaumu!+ 29  I te taimi ne fakaseai ei ne te Atua a fakai o te kogā fenua tenā, ne masaua faeloa ne te Atua a Apelaamo mai te ugaatuga o Lota ke fano kea‵tea mai fakai kolā ne fakaseai ne ia, ko fakai kolā ne nofo i ei a Lota.+ 30  Fakamuli ifo, ne olo aka a Lota mo ana tama fāfine e tokolua mai Soala o ‵nofo i te koga maugā,+ me ne mataku a ia ma nofo i Soala.+ Tenā ne kamata ei a ia o nofo i se ana fakatasi mo ana tama fāfine e tokolua. 31  Kae ne fai atu te toekimua ki tena taina foliki: “A te tamana o tāua ko matua kae e seai eiloa se tagata i te fenua tenei ke ‵moe fakatasi mo tāua e ‵tusa mo tuu masani e fai ne tino i te lalolagi kātoa. 32  Vau, ke fainu ne tāua a te tamana o tāua ki uaina, ko ‵moe ei tāua mo ia ko te mea ke maua ne tā tama‵liki mai te tamana o tāua.” 33  I te po tenā ne fainu faeloa ne lāua te lā tamana ki uaina; tenā ne fanatu ei te toekimua ki loto o ‵moe mo tena tamana, kae ne seki iloa eiloa ne tou tagata te taimi ne ‵moe ei lāua mo te taimi ne fano ei tou fafine. 34  I te suā aso, ne fai atu a te toekimua ki tena taina foliki: “Ko oti au ne ‵moe mo toku tamana i te po. Ke toe fainu foki ne tāua a ia ki uaina ma po nei. Tenā ko fano ei koe ke ‵moe koulua, ko maua ei ne tā tama‵liki mai te tamana o tāua.” 35  I te po tenā, ne avatu faeloa ne lāua a uaina ke inu ki ei te lā tamana, tenā ne fanatu ei te tamaliki foliki o ‵moe mo tena tamana, kae ne seki iloa eiloa ne tou tagata te taimi ne ‵moe ei lāua mo te taimi ne fano ei tou fafine. 36  Tenā ne fai‵tama ei a tama fāfine a Lota konā i te lā tamana. 37  Ne fanau ne te toekimua se tamaliki tagata kae fakaigoa ne ia ki a Moapi.+ A ia ko te tamana o tino Moapi i aso nei.+ 38  Ne fanau foki ne tena taina foliki se tamaliki tagata kae fakaigoa ne ia ki a Penami. A ia ko te tamana o tino Amoni+ i aso nei.

Fakamatalaga mai lalo

Io me “ke maua se puipuiga.”
Io me “maluga.”
Io me “alofa fakamaoni.”
Io me “ke tumau au i te ola.”
Tena uiga “Se Tamā Mea.”