Kenese 17:1-27

  • Apelaamo ka fai mo tamana o atufenua (1-8)

    • Apelamo ko fakaigoa ki a Apelaamo (5)

  • Te feagaiga o te pilitome (9-14)

  • Salai ko fakaigoa ki a Sala (15-17)

  • Te folafolaga ki te tamaliki ko Isaako (18-27)

17  I te taimi ko 99 ei tausaga o Apelamo, ne fakasae atu a Ieova ki a ia kae fai atu: “Au ko te Atua Malosi Katoatoa. Sasale i oku mua kae fai faeloa te mea tonu.*  Ka fakatumau ne au taku feagaiga i te va o tāua,+ kae ka fakatokouke ne au tou gafa ke tokouke ‵ki.”+  Tenā ne totuli ifo ei a Apelamo mo ana mata e ‵fuli ki lalo, kae ne tumau te Atua i te faipati atu ki a ia, ana muna:  “Kae e penei mo au, kiloke! a taku feagaiga e fai ki a koe,+ kae ka fai eiloa koe mo tamana o atufenua e uke.+  Ka se toe fakaigoa koe ki a Apelamo;* a tou igoa ko Apelaamo,* me ka fai ne au a koe mo fai se tamana o atufenua e uke.  Ka fai ne au a tino i tou gafa ke tokouke ‵ki, kae ka fai foki ne au ke ‵tupu mai i a koe a atufenua e uke, kae ka o‵mai a tupu mai i a koe.+  “Kae ka tausi ne au taku feagaiga i toku va mo koe+ mo au tama* mai ou tua i olotou kautama katoa mō se feagaiga ki te se gata-mai, ko te mea ke fai au mo Atua o koe mo au tama* mai ou tua.  Kae ka tuku atu ne au ki a koe mo au tama* mai ou tua a te fenua telā ne nofo koe i ei e pelā me se tino fakaa‵tea+​—ko te fenua kātoa o Kanana​—e pelā me se kope tumau, kae ka fai au mo olotou Atua.”+  Ne toe fai atu a te Atua ki a Apelaamo: “Kae pelā mo koe, e ‵tau o tausi ne koe taku feagaiga, ko koe mo au tama* mai ou tua i olotou kautama katoa. 10  Tenei taku feagaiga i toku va mo koutou, telā e ‵tau o tausi ne koe mo au tama* mai ou tua: E ‵tau o pilitome+ a tāgata katoa i a koutou. 11  E ‵tau mo koutou katoa o pilitome kae ka fai a te mea tenā e pelā me se fakailoga o te feagaiga i toku va mo koutou.+ 12  I loto i otou kautama katoa, e ‵tau o pilitome+ a tāgata katoa kolā ko taki valu aso te ma‵tua, so se tino telā ne fanau mai i loto i otou kāiga mo so se tino telā e sē se tama* a koe kae ne ‵togi tupe mai i se tino fakaa‵tea. 13  So se tagata e fanau i loto i tou kāiga mo so se tagata e ‵togi ne koe ki au tupe, e ‵tau eiloa o pilitome, kae ko taku feagaiga e uiga ki te pilitome*+ e ‵tau o fai pelā me se feagaiga tumau. 14  Kafai se tagata seki pilitome e ita ma pilitome, a te tino tenā e ‵tau o ‵kati kea‵tea* mai ana tino. Ko oti ne ofa ne ia taku feagaiga.” 15  Tenā ne fai atu ei a te Atua ki a Apelaamo: “Kae e pelā mo tau avaga ko Salai,*+ e se ‵tau mo koe o fakaigoa a ia ki a Salai, me ko fakaigoa nei a ia ki a Sala.* 16  Ka fakamanuia ne au a ia kae ka fanau mai ne ia se tamaliki tagata ma koe;+ ka fakamanuia ne au a ia kae ka ‵tupu mai i a ia atufenua e uke; ka o‵mai mai i a ia a tupu.” 17  Ne totuli ifo Apelaamo mo ana mata e ‵fuli ki lalo kae kamata o kata kae fai ifo i tena loto:+ “E mata, e mafai ne se tagata ko 100 ana tausaga o fai sena tamaliki, kae e mata, e mafai ne Sala telā ko 90 ana tausaga o fanau mai se tamaliki?”+ 18  Tenā ne fai atu ei a Apelaamo ki te Atua tonu: “Ke fakamanuia aka la ne koe a Isamaeli!”+ 19  Kae ne fai atu a te Atua: “Ka fanau eiloa ne tau avaga ko Sala se tamaliki tagata, kae e ‵tau mo koe o fakaigoa a ia ki a Isaako.*+ Kae ka fakatumau ne au taku feagaiga mo ia, se feagaiga ki te se-gata-mai mo ana tama* mai ana tua.+ 20  Kae ko oti ne lagona ne au au pati e uiga ki a Isamaeli. Kiloke! Ka fakamanuia ne au a ia kae ka fakatokouke ne au a tino i tena gafa. Ka o‵mai i a ia a takitaki o matakāiga e 12, kae ka fai ne au a ia mo fai se atufenua lasi.+ 21  Kae ka fakatumau ne au a taku feagaiga mo Isaako,+ telā ka fanau mai ne Sala ma koe i te taimi penei i te suā tausaga.”+ 22  I te otiga ne faipati atu te Atua ki a Apelaamo, fanaka ei a ia. 23  Tenā ne puke ei ne Apelaamo a tena tama ko Isamaeli mo tāgata katoa kolā ne fa‵nau i loto i tena kāiga mo tāgata katoa kolā ne ‵togi tupe mai ne ia, mo tāgata katoa i loto i te kaukāiga o Apelaamo, kae ne pilitome ne ia i te aso eiloa tenā, e ‵tusa mo pati a te Atua ne fai atu ki a ia.+ 24  Ko 99 tausaga o Apelaamo i te taimi ne pilitome+ ei a ia. 25  Kae ko Isamaeli tena tama tagata, ko 13 ana tausaga i te taimi ne pilitome ei a ia.+ 26  Ko te aso eiloa tenā ne pilitome ei a Apelaamo fakatasi mo tena tama ko Isamaeli. 27  A tāgata katoa i tena kaukāiga, ko so se tino ne fanau i loto i tena kāiga mo so se tino ne ‵togi ‵tupe ne ia mai i se tino fakaa‵tea, ne pilitome foki fakatasi mo ia.

Fakamatalaga mai lalo

Io me “seai sena mea ‵se.”
Tena uiga “Te Tamana e Maluga (Fakamaluga Aka).”
Tena uiga “Te Tamana o te Vaitino (Tokouke); Te Tamana o Tino e Tokouke.”
Epelu, “fanau.”
Epelu, “fanau.”
Epelu, “fanau.”
Epelu, “fanau.”
Epelu, “fanau.”
Epelu, “fanau.”
Epelu, “taku feagaiga faka-te-foitino.”
Io me “tamate.”
Kāti e fakauiga ki te “Finau Valea.”
Tena uiga “Pelenise.”
Tena uiga “Katakata.”
Epelu, “fanau.”