Kenese 16:1-16

  • Hakala mo Isamaeli (1-16)

16  I te taimi tenei, e seki ai eiloa se tamaliki a Apelamo kai fai i a Salai, tena avaga,+ kae e isi se tavini Aikupito a Salai e igoa ki a Hakala.+  Ne fai atu a Salai ki a Apelamo: “Fakamolemole, fakalogo mai ki a au! Ko oti ne taofi ne Ieova ke mo a ma fai ne aku tama‵liki. Fakamolemole, ‵moe mo taku tavini. Kāti ka mafai o maua ne aku tama‵liki e auala i a ia.”+ Ne fakalogo eiloa a Apelamo ki te mea ne fai atu ne Salai.  Mai tua o te sefulu tausaga ne nofo ei a Apelamo i te fenua o Kanana, ne puke ne Salai, te avaga a Apelamo, a tena tavini Aikupito ko Hakala, kae tuku atu ki tena avaga ko Apelamo mo fai tena avaga.  Tenā ne ‵moe ei tou tagata mo Hakala, kae ne faitama tou fafine. I te taimi ne iloa ei ne Hakala i a ia ko faitama, ne kamata o manatu fatauva a ia ki tena matai fafine ko Salai.  Ona ko te mea tenei ne fai atu ei a Salai ki a Apelamo: “A te logo‵mae ko oko mai ki a au ne pogai mai i a koe. Ko au ne tuku ne au taku tavini ki ou lima* kae i te taimi ne iloa ei ne tou fafine i a ia ko faitama, ne kamata o manatu fatauva a ia ki a au. Ke fakamasino eiloa ne Ieova a tāua.”  Ne fai atu a Apelamo ki a Salai: “Kiloke! E pule eiloa koe i tau tavini. Faitalia koe i au mea e fai ki a ia.” Tenā ne fakamasiasi ei ne Salai a ia, kae ne tele kea‵tea tou fafine mai i a ia.  Fakamuli ifo, ne maua ne te agelu a Ieova a tou fafine i se vaipuna i te koga lavaki, ko te vaipuna telā e tu i te auala ki Sula.+  Kae ne fai atu a ia: “Hakala, te tavini a Salai, a koe ne vau mai fea kae fano foki koe ki fea?” Ne tali atu tou fafine: “Au ne tele kea‵tea mai toku matai fafine ko Salai.”  Muna a te agelu a Ieova ki tou fafine: “Toe foki ki tou matai kae ke loto maulalo koe i ana mua.” 10  Tenā ne fai atu ei te agelu a Ieova: “Ka fakatokouke ne au au tama,* ko te mea ke se mafai o lau.”+ 11  Ne toe fai atu te agelu a Ieova: “A koe nei ko faitama, kae ka fanau mai ne koe se tamaliki tagata, kae e ‵tau mo koe o fakaigoa a ia ki a Isamaeli,* me ko oti ne lagona ne Ieova tou logo‵mae. 12  Ka fai a ia e pelā me se asini vao a se tagata. Ka ‵teke atu a ia ki tino katoa, kae ka ‵teke atu a tino katoa ki a ia, kae ka nofo a ia o fakafesagai ki ana taina katoa.”* 13  Tenā ne kalaga atu tou fafine ki te igoa o Ieova, telā ne faipati atu ki a ia: “A koe ko te Atua telā e lavea+ ne koe au,” me ne toe fai atu a ia: “E mata, ko oti eiloa ne kilo atu au ki te tino telā e lavea ne ia au?” 14  Tenā te pogai ne fakaigoa ei te vaikeli tenei ki a Pia-laloi.* (E tu i te va o Katesa mo Peleti.) 15  Ne fanau mai te tamaliki tagata a Apelamo ne fai i a Hakala, kae ne fakaigoa ne Apelamo a tena tamaliki tagata i a Hakala ki a Isamaeli.+ 16  A Apelamo ko 86 ana tausaga i te taimi ne fanau a Hakala i a Isamaeli.

Fakamatalaga mai lalo

Epelu, “ki ou fatafata.”
Epelu, “fanau.”
Tena uiga “E lagona ne te Atua.”
Io me kāti, “kae ka ola a ia o ‵teke atu ki ana taina katoa.”
Tena uiga “Te Vaikeli o te Tino Ola Telā e Lavea ne ia Au.”