Kenese 15:1-21

  • Te feagaiga a te Atua mo Apelamo (1-21)

    • Ko folafola mai a tausaga e 400 o te puapuaga (13)

    • Ko toe fakafoki mai te tautoga a te Atua ki a Apelamo (18-21)

15  Mai tua o te mea tenei ne oko mai te fekau a Ieova ki a Apelamo i se fakaasiga, ana muna: “Apelamo, sa mataku.+ Au se talita ki a koe.+ Ka lasi ‵ki te taui ka maua ne koe.”+  Ne tali atu Apelamo: “Te Aliki Sili ko Ieova, se a te mea ka tuku mai ne koe ki a au, me e lavea mai ne koe me e seki ai eiloa saku tamaliki kae ko te tino telā ka maua ne ia aku mea katoa se tagata Tamaseko, telā ko Eliesa?”+  Ne toe fai atu a Apelamo: “E seki ai eiloa saku tama*+ ne tuku mai ne koe, kae se tino* loa e tokotasi i toku kaukāiga ko fai mo fai toku sui.”  Kae kiloke! ne tali atu a Ieova ki a ia: “A te tagata tenei ka se fai mo fai tou sui, kae ko tau tama tonu* eiloa ka sui ne ia koe.”+  Ne aumai ne ia a Apelamo ki tua kae fai atu: “Fakamolemole, kilo aka ki te lagi kae lau mai ne koe te aofaki o fetū i ei, māfai e mafai ne koe o lau.” Tenā ne fai atu ei a ia: “Ka penā eiloa te tokouke o au tama.”*+  Kae ne fakatuanaki a ia ki a Ieova,+ kae ne fai a te mea tenā ki a ia e pelā me se faifaiga amiotonu.+  Tenā ne toe fai atu te Atua: “Au ko Ieova, telā ne aumai ne au koe ki tua mo Ulo i Kaletaia ke tuku atu ki a koe a te fenua tenei ke fai mo ou tofi.”+  Ne fai atu a ia: “Te Aliki Sili ko Ieova, e iloa pefea ne au me ka maua ne au a te fenua tenei?”  Ne tali atu a ia ki tou tagata: “Aumai ki a au se tamā pulumakau fafine ko tolu ana tausaga, se kouti fafine ko tolu ana tausaga, se mamoe tagata ko tolu ana tausaga, se lupe mo se tamā lupe.” 10  Ne puke ne ia a manu katoa konei kae ‵kati vaelua ne ia kae fakata‵kato fakafesagai* a vaega taki lua konā, kae ne seki ‵kati ne ia a manu eva. 11  Tenā ne kamata ei o eva ifo a manu eva fe‵kai ki luga i foitino o manu ‵mate konā, kae ne afuli faeloa ne Apelamo kea‵tea. 12  I te taimi ko pili ei o tō te la, ne moe palapala a Apelamo kae ne oko atu ki luga i a ia se pouliga lasi kae fakamataku. 13  Tenā ne fai atu ei a Ia ki a Apelamo: “Ke iloa tonu ne koe me ka fai au tama* e pelā me ne tino fakaa‵tea i se fenua telā e se i o latou kae ka fai latou ne tino i konā e pelā me ne pologa kae fakapuapuagatia latou i tausaga e 400.+ 14  Kae ka fakamasino ne au a te fenua telā ka tavini latou ki ei,+ kae oti ko olo ei kea‵tea latou mo koloa e uke.+ 15  Kae e pelā mo koe, ka mate eiloa koe mo te filemu i te taimi ko toeaina ei koe;+ kae ka tanu koe e pelā mo ou tupuga. 16  Kae ka ‵foki mai latou ki konei+ i te fa o kautama, me e seki oko a te agasala a tino Amoli ki tena toe tulaga matagā.”+ 17  I te taimi ne tō ei te la kae ko pouli tagataga, ne sae aka se au mai se ogaumu mo se afi e ‵ka i te va o manu kolā ne ‵kati vaelua. 18  I te aso tenā, ne fai ne Ieova se feagaiga mo Apelamo,+ ana muna: “Ka tuku atu ne au ki au tama* a te fenua tenei,+ mai te vaitafe o Aikupito ke oko ki te vaitafe lasi, ko te Eufilate:+ 19  te fenua o tino Keni,+ tino Kinasa, tino Katemoni, 20  tino Heti,+ tino Pelise,+ tino Lefaima,+ 21  tino Amoli, tino Kanana, tino Kilikase mo tino Iepuse.”+

Fakamatalaga mai lalo

Epelu, “fanau.”
Epelu, “tama tagata.”
Epelu, “ko te tino telā e vau mai i loto i a koe.”
Epelu, “fanau.”
Io me “tuku te vaega e tasi ke ‵pau mo te suā vaega.”
Epelu, “fanau.”
Epelu, “fanau.”