Kenese 13:1-18

  • Ko foki a Apelamo ki Kanana (1-4)

  • Ko ma‵vae a Apelamo mo Lota (5-13)

  • Ko toe fai te tautoga a te Atua ki a Apelamo (14-18)

13  Tenā ne fano ei a Apelamo ki tua mo Aikupito o fanatu ki te Nekepi,*+ ko ia mo tena avaga mo ana mea katoa, fakatasi mo Lota.  Ne maumea ‵ki eiloa a Apelamo i te uke o ana manu, siliva mo aulo.+  Ne nofo a ia i koga kese‵kese i tena malaga mai te Nekepi o fano ki Peteli, ke oko ki te taimi ne taunu ei a ia ki te koga ne fakatu muamua ei tena faleie i te va o Peteli mo Ai,+  ki te koga ne faite muamua ne ia i ei se fatafaitaulaga. I konā, ne kalaga atu ei a Apelamo ki te igoa o Ieova.  Kae ko Lota telā ne faima‵laga fakatasi mo Apelamo, e isi foki ne ana mamoe, pulumakau mo faleie.  Tela la, ko se lava te laukele mō latou katoa ke ‵nofo i te koga tenā; ko tō uke olotou kope telā ko se mafai ei o ‵nofo fakatasi latou.  Ona ko te mea tenā, ne sae aka se kinauga i te va o tino tausi manu a Apelamo mo tino tausi manu a Lota. (I te taimi tenā a tino Kanana mo tino Pelise e ‵nofo i te fenua tenā.)+  Muna a Apelamo ki a Lota:+ “Fakamolemole, e se ‵tau o isi se kinauga i te va o tāua mo te va o tā tino tausi manu, me i a tāua e kāiga.  E a, e se lava koe i te laukele kātoa tenei? Fakamolemole, kāti e ‵lei atu ke ma‵vae tāua. Kafai e fano koe ki te feitu fakamaui, kae ka fano au ki te feitu fakaatamai; kae kafai e fano koe ki te feitu fakaatamai kae ka fano au ki te feitu fakamaui.” 10  Ne kilo aka a Lota kae lavea ne ia me i te kogā koga kātoa o te Iolitana+ e uke a vai i ei (kae koi tuai o fakamasei ne Ieova a Sotoma mo Komolo), e pelā eiloa mo te fatoaga o Ieova,+ e pelā mo te fenua o Aikupito, ke oko atu eiloa ki Soala.+ 11  Tenā ne fili ei ne Lota a te kogā fenua kātoa o te Iolitana, kae ne gasue a Lota o nofo i te feitu ki saegala. Tenā ne ma‵vae ei lāua. 12  Ne nofo a Apelamo i te fenua ko Kanana, kae ko Lota ne nofo atu i loto i fakai o te kogā fenua tenā.+ Fakamuli ifo, ne fakatu ne Lota tena faleie i tafa o Sotoma. 13  A tāgata Sotoma ne tino ma‵sei ‵ki, ne tino fai agasala matagā i mua o Ieova.+ 14  Ne fai atu a Ieova ki a Apelamo i te otiga ne ma‵vae lāua mo Lota: “Fakamolemole, kilo aka ki luga mai te koga e tu i ei koe, kae kilo atu ki te feitu ki mātū mo te feitu ki saute mo te feitu ki saegala mo te feitu ki togala, 15  me i fenua katoa konā e lavea ne koe ka tuku atu ne au ki a koe mo au tama* e pelā me se kope tumau.+ 16  Kae ka fai ne au au tama* ke pelā mo ‵pefu i luga i te lalolagi me kafai e isi se tino e mafai o lau ne ia a ‵pefu i luga i te lalolagi, tenā ko mafai ei o lau au tama.*+ 17  Tu ki luga, fano i loto i te loa mo te lauefa o te fenua tenā, me ka tuku atu ne au ki a koe.” 18  Ne nofo faeloa a Apelamo i faleie. Fakamuli ifo, ne fanatu a ia o nofo i tafa o lakau ‵lasi o Mamele,+ i Hepelona,+ kae ne faite ne ia i konā se fatafaitaulaga ki a Ieova.+

Fakamatalaga mai lalo

Io me “ko saute,” telā ko te feitu ki saute o te Fenua o te Folafolaga.
Epelu, “fanau.”
Epelu, “fanau.”
Epelu, “fanau.”