Kenese 11:1-32

  • Te taoa o Papelu (1-4)

  • Ko faka‵numi ne Ieova a te ‵gana (5-9)

  • Mai i a Semu ki a Apelamo (10-32)

    • Te kāiga o Tala (27)

    • Ko tiaki ne Apelamo a Ulo (31)

11  I taimi nei, a tino katoa i te lalolagi e fai‵pati eiloa ki te ‵gana e tasi kae ‵pau foki a pati e fakaaoga i ei.  I te taimi ne faima‵laga atu ei latou ki te feitu ki saegala, ne maua ne latou se vanu laugatasi i te kogā fenua ko Sina,+ kae ne kamata o ‵nofo latou i ei.  Tenā ne fai aka ei latou te suā tino ki te suā tino: “O‵mai! Ke faite ne tatou a puliki kae tao ki te afi.” Tenā ne fakaaoga ei ne latou a puliki i lō fatu, mo kolotā mo fai te mouta ke fakapikipiki ki ei a puliki.  Ne toe fai aka latou: “O‵mai! Ke faite ne tatou se fakai mō tatou mo se taoa ke tu tena mata ki te lagi, ko te mea ke takutakua tatou kae ke se salalau valevale atu tatou i luga i te lalolagi.”+  Tenā ne fanaifo ei a Ieova o onoono i te fakai mo te taoa telā ne faite ne tama a tāgata.  Kae ne fai aka a Ieova: “Kiloke! A latou ne tino e ‵kau tasi kae fai‵pati ki te ‵gana e tasi,+ kae tenei te mea ko kamata o fai ne latou. Nei la, so se mea e mafau‵fau latou o fai e fai eiloa ne latou.  Vau! A tāua*+ ka olo ki lalo o faka‵numi te lotou ‵gana ko te mea ke se malamalama te suā tino i te ‵gana a te suā tino.”  Tenā ne fai ei ne Ieova ke salalau valevale atu latou i luga i te lalolagi kātoa,+ kae ne fakagata ei i konā te faitega o te lotou fakai.  Tenā te pogai ne fakaigoa ei ki Papelu,*+ me tenā te koga ne faka‵numi ei ne Ieova te ‵gana a tino i te lalolagi kātoa, kae ne fai ne Ieova ke salalau valevale atu latou mai konā ki te lalolagi kātoa. 10  Tenei te tala fakasolopito o Semu.+ Ko ‵tusa mo te 100 tausaga o Semu i te taimi ne fai ei tena tama ko Afasata+ i te lua tausaga mai tua o te Lolo. 11  I te otiga ne fanau a Afasata, ne toe ola a Semu i tausaga e 500. Kae ne isi aka foki ne ana tama tāgata mo tama fāfine.+ 12  Ne ola a Afasata i tausaga e 35, kae fai tena tama ko Sela.+ 13  I te otiga ne fanau a Sela, ne toe ola a Afasata i tausaga e 403. Kae ne isi aka foki ne ana tama tāgata mo tama fāfine. 14  Ne ola a Sela i tausaga e 30, kae fai tena tama ko Epela.+ 15  I te otiga ne fanau a Epela, ne toe ola a Sela i tausaga e 403. Kae ne isi aka foki ne ana tama tāgata mo tama fāfine. 16  Ne ola a Epela i tausaga e 34, kae fai tena tama ko Peleko.+ 17  I te otiga ne fanau a Peleko, ne toe ola a Epela i tausaga e 430. Kae ne isi aka foki ne ana tama tāgata mo tama fāfine. 18  Ne ola a Peleko i tausaga e 30, kae fai tena tama ko Leu.+ 19  I te otiga ne fanau a Leu, ne toe ola a Peleko i tausaga e 209. Kae ne isi aka foki ne ana tama tāgata mo tama fāfine. 20  Ne ola a Leu i tausaga e 32, kae fai tena tama ko Seluka. 21  I te otiga ne fanau a Seluka, ne toe ola a Leu i tausaga e 207. Kae ne isi aka foki ne ana tama tāgata mo tama fāfine. 22  Ne ola a Seluka i tausaga e 30, kae fai tena tama ko Nakoli. 23  I te otiga ne fanau a Nakoli, ne toe ola a Seluka i tausaga e 200. Kae ne isi aka foki ne ana tama tāgata mo tama fāfine. 24  Ne ola a Nakoli i tausaga e 29, kae fai tena tama ko Tala.+ 25  I te otiga ne fanau a Tala, ne toe ola a Nakoli i tausaga e 119. Kae ne isi aka foki ne ana tama tāgata mo tama fāfine. 26  Ne ola a Tala i tausaga e 70, kae fai ana tama ko Apelamo,+ Nakoli+ mo Halana. 27  Tenei te tala fakasolopito o Tala. A Tala ko te tamana o Apelamo, Nakoli mo Halana. Kae ko Halana ko te tamana o Lota.+ 28  I te taimi koi ola ei a tena tamana ko Tala, ne mate a Halana i te fenua ne fanau ei a ia, i Ulo+ i Kaletaia.+ 29  Ne fai a avaga a Apelamo mo Nakoli. A te igoa o te avaga a Apelamo ko Salai,+ kae ko te igoa o te avaga a Nakoli ko Milika,+ te tama fafine a Halana. A Halana ko te tamana o Milika mo Isika. 30  Kae ko Salai e se fanafanau;+ e seai eiloa sena tamaliki. 31  Tenā ne puke ei ne Tala a tena tama ko Apelamo mo tena mokopuna ko Lota,+ te tama tagata a Halana, mo Salai te avaga a tena tama ko Apelamo, kae ne olo latou fakatasi mo ia ki tua mo Ulo i Kaletaia o olo atu ki te fenua o Kanana.+ Fakamuli ifo, ne oko atu latou ki Halana+ kae ‵nofo i ei. 32  Ne ola a Tala i tausaga e 205. Tenā ne mate ei a Tala i Halana.

Fakamatalaga mai lalo

I te ‵gana Epelu e mafai o fakasino atu a te pati telā ne ‵fuli i konei ki se “tokolua” io me ne “tino e tokouke.”
Tena uiga “‵Numi valevale.”