Kenese 1:1-31

  • Te faitega o te lagi mo te lalolagi (1, 2)

  • Aso e ono ne fakatoka ei te lalolagi (3-31)

    • Aso 1: te mainaga; te ao mo te po (3-5)

    • Aso i te 2: te vanimonimo (6-8)

    • Aso i te 3: te laukele malō mo lakau (9-13)

    • Aso i te 4: mea fakamaina i te lagi (14-19)

    • Aso i te 5: ika mo manu eva (20-23)

    • Aso i te 6: manu o te laukele mo tino (24-31)

1  I te kamataga ne faite ne te Atua a te lagi* mo te lalolagi.+  A te lalolagi e seki foliga faka‵lei kae lavaki,* kae e isi se pouliga i luga i te vai ‵poko,+ kae ko te malosi galue*+ o te Atua e gasuesue mai i luga o te vai.+  Kae ne fai aka te Atua: “Ke isi se mainaga.” Tenā ko te mea eiloa ko maina.+  Mai tua ifo i konā, ne lavea ne te Atua me e ‵lei te mainaga, kae ne kamata o ‵vae ne te Atua a te mainaga mai te pouliga.  Ne fakaigoa ne te Atua a te mainaga ki te Ao, kae ko te pouliga ki te Po.+ Ne oko atu ki te afiafi kae oko atu foki ki te taeao, ko te aso muamua tenā.  Tenā ne fai aka ei te Atua: “Ke isi se vanimonimo+ i te va o vai, kae ke ‵vae i ei a vai mai nisi vai.”+  Tenā ne fai ei ne te Atua te vanimonimo kae ‵vae ne ia te vai mai lalo o te vanimonimo mo te vai mai luga i ei.+ Kae ne fai eiloa penā.  Kae ne fakaigoa ne te Atua a te vanimonimo ki te Lagi. Ne oko atu ki te afiafi kae oko atu foki ki te taeao, ko te lua o aso tenā.  Tenā ne fai aka ei te Atua: “Ke ‵luku fakatasi mai a vai katoa i lalo o te lagi ki se koga e tasi, kae ke sae aka te laukele malō.”+ Kae ne fai eiloa penā. 10  Ne fakaigoa ne te Atua a te koga malō ki te Laukele,+ kae ko vai kolā ne ‵luku mai ne fakaigoa ne ia ki te Tai.*+ Kae ne lavea ne te Atua me e ‵lei.+ 11  Tenā ne fai atu ei te Atua: “Ke ‵somo mai i te laukele a mouku, mo lakau e ‵fua ki fuaga, mo lakau e ‵fua ki fuagalakau e ‵tusa mo olotou vaega kese‵kese, kae ke ‵fua mai i ei a fuagalakau mo fuaga i te laukele.” Kae ne fai eiloa penā. 12  Kae ne kamata o ola aka mai i te laukele a mouku, lakau e ‵fua ki fuaga+ mo lakau e ‵fua ki fuagalakau e ‵tusa mo olotou vaega kese‵kese. Tenā ne lavea ei ne te Atua me e ‵lei. 13  Ne oko atu ki te afiafi kae oko atu foki ki te taeao, ko te tolu o aso tenā. 14  Tenā ne fai aka ei te Atua: “Ke isi ne mea fakamaina+ i te vanimonimo o te lagi, ke ‵vae ei a te ao mo te po,+ kae ka fai a mea konā e pelā me ne fakailoga mō tau o aso mo aso mo tausaga.+ 15  Ka fai a mea konā mo fai ne mea fakamaina i te vanimonimo o te lagi ke maina atu ki luga i te lalolagi.” Kae ne fai eiloa penā. 16  Kae ko te Atua ne fakatoka o fai a mea fakamaina ‵lasi e lua, ko te mea fakamaina tai lasi atu ke pule ki te ao,+ kae ko te mea fakamaina tai foliki ifo ke pule ki te po, e penā foki mo fetū.+ 17  Tenā ne tuku ei ne te Atua a mea konā i te vanimonimo o te lagi ke maina atu ki luga i te lalolagi 18  kae ke pule i te ao mo te po kae ke ‵vae i ei a te mainaga mai te pouliga.+ Tenā ne lavea ei ne te Atua me e ‵lei. 19  Ne oko atu ki te afiafi kae oko atu foki ki te taeao, ko te fa o aso tenā. 20  Tenā ne fai aka ei te Atua: “Ke ‵fonu* a vai i mea ola, kae ko manu eva ke eva mai luga i te laukele i te vanimonimo o te lagi.”+ 21  Kae ne faite ne te Atua a manu ‵lasi* o te tai mo mea ola katoa kolā e oloolo kae mumu i te tai e ‵tusa mo olotou vaega kese‵kese, mo manu eva katoa e ‵tusa mo olotou vaega kese‵kese. Kae ne lavea ne te Atua me e ‵lei. 22  Ne fakamanuia ne te Atua a mea konā, ana muna: “Ke fanafanau ke gasolo o uke kae faka‵fonu te tai,+ kae ke gasolo o uke a manu eva i te lalolagi.” 23  Ne oko atu ki te afiafi kae oko atu foki ki te taeao, ko te lima o aso tenā. 24  Tenā ne fai aka ei te Atua: “Ke maua i te laukele a mea ola e ‵tusa mo olotou vaega kese‵kese, ko manu ‵lata mo manu ‵tolo mo manu o te vao e ‵tusa mo olotou vaega kese‵kese.”+ Kae ne fai eiloa penā. 25  Kae ne fai ne te Atua a manu o te vao e ‵tusa mo olotou vaega kese‵kese mo manu ‵lata e ‵tusa mo olotou vaega kese‵kese mo manu ‵tolo katoa o te laukele e ‵tusa mo olotou vaega kese‵kese. Kae ne lavea ne te Atua me e ‵lei. 26  Tenā ne fai atu ei te Atua: “Ke faite ne tāua*+ a te tagata ki te tā fakatusa,+ ke pelā eiloa mo tā foliga,+ kae ke pule ki ika o te tai mo manu eva o te lagi mo manu ‵lata mo te lalolagi kātoa mo manu ‵tolo katoa kolā e gasue‵sue i te laukele.”+ 27  Kae ne faite ne te Atua a te tagata ki tena fakatusa, ne faite ne ia a te tagata ki te fakatusa o te Atua; ne faite ne ia lāua, te tagata mo te fafine.+ 28  E se gata i ei, ne fakamanuia lāua ne te Atua kae fai atu: “Ke fanafanau kae ke fakatokouke, faka‵fonu te lalolagi+ kae pule atu ki ei,+ kae ke pule atu+ ki ika o te tai mo manu eva o te lagi mo mea ola katoa kolā e gasue‵sue i te laukele.” 29  Tenā ne fai atu ei te Atua: “Ko tuku atu nei ne au ki a koulua a lakau katoa kolā e ‵fua ki fuaga i luga i te laukele kātoa mo lakau katoa kolā e ‵fua ki fuagalakau. Ke fai a mea konā mo meakai a koulua.+ 30  Kae ko tuku atu ne au a lakau kaina katoa e pelā me ne meakai+ ki manu katoa o te vao i te laukele mo manu eva katoa o te lagi mo mea katoa kolā e gasue‵sue i te laukele kae isi se ola i ei.” Kae ne fai eiloa penā. 31  I te otiga o mea konā, lavea ei ne te Atua ana mea katoa ne faite, kae kiloke! ko oko eiloa i te ‵lei.+ Ne oko atu ki te afiafi kae oko atu foki ki te taeao, ko te ono o aso tenā.

Fakamatalaga mai lalo

E fakasino atu ki “te iunivesi telā e aofia i ei a fetū, paneta, fakaputuga fetū mo nisi mea aka.”
Io me “seai ne mea i ei.”
Io me “agaga o te Atua.”
E fakauiga foki a te pati Tai ki te tai mo te vai i vaituloto.
E fakasino a te pati Epelu i konei ki manu fo‵liki e se mafai o lau kolā e mafai o maua i te ea, i te tai, io me i luga i te laukele.
Io me “fakama‵taku.”
E mafai o fakasino atu a te pati Epelu telā ne ‵fuli i konei ki se “tokolua” io me ne “tino e tokouke.”