Ki te Kau i Kalatia 4:1-31

  • Ko se toe fai mo pologa, kae se tama (1-7)

  • Manavase a Paulo ki te kau Kalatia (8-20)

  • Hakala mo Sala: ko feagaiga e lua (21-31)

    • Ielusalema i luga, telā ko ‵tou mātua, e saoloto (26)

4  Nei la, ko fai atu au me i te taimi koi fai ei te sui e pelā me se tamaliki, e seai eiloa se ‵kese o ia mo se pologa, e tiga eiloa a ia ko te aliki o mea katoa.  E nofo a ia mai lalo i tāgata fakatonutonu mo situati ke oko ki te aso telā ko leva ne fuafuagina ne tena tamana.  E penā foki tatou i te taimi koi tama‵liki ei tatou, ne pologa faeloa tatou ki mea fakavae o te lalolagi.+  Kae i te okoga ki te taimi tonu, ne uga mai ei ne te Atua a tena Tama, telā ne fanau mai i se fafine+ kae ne nofo foki mai lalo i te tulafono,+  ko te mea ke mafai o fakasaoloto ne ia e auala i se ‵togi a latou kolā e ‵nofo mai lalo i te tulafono,+ ke mafai ei o fai tatou e pelā me ne tama puke.+  Ona ko koutou ko fai nei mo fai ne tama a te Atua, ne tuku mai ei ne ia te agaga+ o tena Tama ki loto i ‵tou loto+ kae kalaga atu penei: “Apa,* te Tamana!”+  Tela la, ko se toe fai ei koe mo fai se pologa kae se tama; kae kafai koe se tama, a koe foki se sui e auala i te Atua.+  E tiga te feitu tenā, i te taimi ne seki iloa ei ne koutou a te Atua, ne pologa eiloa koutou ki mea kolā e se ne atua ‵tonu.  Kae nei la, ona ko te mea ko iloa ne koutou a te Atua io me ko oti ne iloa ne te Atua a koutou, kaia la ko fia ‵foki ei koutou ki mea kolā e vāi‵vai+ kae e se aoga ko te mea ke toe pologa foki koutou ki ei?+ 10  E ma‵nako malosi koutou o fakamanatu a aso mo masina+ mo tau o aso mo tausaga. 11  E manavase au i te mea ma seai ei se aoga o aku galuega ‵mafa ne fai mō koutou. 12  Au e fakatagi atu, e oku taina, ke fai koutou e pelā mo au, me i a au ne fai foki penā mo koutou.+ E seai se otou mea ‵se ne fai mai ki a au. 13  Kae e iloa ne koutou me e auala i se masaki o te foitino ne maua ei ne au a te avanoaga muamua ke folafola atu ne au te tala ‵lei ki a koutou. 14  Kae e tiga eiloa ne fai toku masaki mo fai se tofotofoga ki a koutou, ne seki fai fakamasei au ne koutou io me takalia‵lia* mai ki a au; kae ne talimalo ne koutou au e pelā me se agelu a te Atua, e pelā eiloa mo Keliso Iesu. 15  Tefea la te fiafia telā ne maua ne koutou? Me i a au e molimau atu ki a koutou me moi ne mafai o fai, penei ko oti ne ‵kape kea‵tea ne koutou otou mata kae tuku mai ki a au.+ 16  Tela la, e mata, ko oti au ne fai mo otou fili ona ko te mea ne fakaasi atu ne au a te mea tonu ki a koutou? 17  E taumafai latou mo te loto finafinau ke maua ne latou a koutou, e se mō se pogai ‵lei; e ma‵nako latou ke ‵vae koutou kea‵tea mai i a au, ko te mea ke fia‵fia koutou o tau‵tali atu i a latou. 18  E ui i ei, se mea ‵lei ke ‵sala atu mo te loto finafinau se tino ki a koutou mō se pogai ‵lei kae e se i te taimi fua e ‵nofo fakatasi ei tatou, 19  e aku tama‵liki,+ kolā ko toe logo‵mae ei au e pelā me se fafine ka fai o fanau ke oko ki te taimi e tupu aka ei a Keliso i loto i a koutou. 20  Aku muna eiloa ke ‵nofo fakatasi tatou i te taimi tenei, kae ke faipati atu au i se isi auala, me ko ‵numi valevale au i a koutou. 21  Fai mai aka la ki a au, a koutou kolā e fia ‵nofo mai lalo i te tulafono, E a, e se lagona ne koutou a mea kolā e fai mai i te Tulafono? 22  E pelā mo te mea ne tusi mai penei, me ne maua ne Apelaamo a tama tāgata e tokolua, e tokotasi mai te tavini fafine+ kae e tokotasi mai te fafine saoloto;+ 23  kae ko te tama mai i te tavini fafine ne fanau mai eiloa e pelā mo te masani,+ kae ko te suā tama mai te fafine saoloto ne fanau mai e auala i se folafolaga.+ 24  E mafai o fai a mea konei mo fai se ata fakatusa; me i fāfine konei e tokolua e fakauiga ki feagaiga e lua, e tasi mai te mauga o Sinai,+ telā e fa‵nau mai i ei a tama‵liki ke fai mo pologa, telā ko Hakala. 25  A Hakala e fakauiga ki Sinai,+ se mauga i Alapi, telā e ‵pau mo Ielusalema i aso nei, me i a ia mo ana tama‵liki e ‵nofo e pelā me ne pologa. 26  Kae ko te Ielusalema i luga e saoloto, kae ko ia ko te ‵tou mātua. 27  Me ne tusi mai penei: “Ke fiafia koe, e te fafine sē afu telā e se fanau; pakalaga mo te fiafia, a koe e te fafine telā e seki lagona ne koe a te logo‵mae o te fafine ka fai o fanau; me i tama‵liki a te fafine mafatia ka tokouke atu i lō te fafine telā e isi sena avaga.”+ 28  A tatou, e oku taina, ko tama‵liki o te folafolaga e pelā eiloa mo Isaako.+ 29  Kae e pelā mo te fakasaua atu o ia telā ne fanau mai i te auala masani ki a ia telā ne fanau mai e auala i te agaga,+ e penā foki eiloa i te taimi tenei.+ 30  E tiga te feitu tenā, ne a muna e fai mai i tusitusiga tapu? “Afuli kea‵tea te tavini fafine mo tena tamaliki, me i te tamaliki a te tavini fafine ka se mafai o fai mo sui fakatasi mo te tama a te fafine saoloto.”+ 31  Tela la, e oku taina, a tatou e se ne tama a se tavini fafine, kae ko tama a te fafine saoloto.

Fakamatalaga mai lalo

Se pati i te ‵gana Epelu mo te ‵gana Alamaika telā e fakauiga ki “Te Tamana!”
Io me “puapuaki mai ki a au.”