Ki te Kau i Kalatia 3:1-29

  • Galuega o te Tulafono mo te fakatuanaki (1-14)

    • A tino amio‵tonu ka ola i te fakatuanaki (11)

  • Te folafolaga ki a Apelaamo ne seki fai e auala i te Tulafono (15-18)

    • Te tama a Apelaamo, ko Keliso (16)

  • Te pogai mo te aoga o te Tulafono (19-25)

  • Ne tama a te Atua e auala i te fakatuanaki (26-29)

    • Tama a Apelaamo, ko tino o Keliso (29)

3  Tino Kalatia va‵lea! Ko oi ne aumai ne ia koutou mai lalo i te fakamalosiga masei tenei,+ koutou kolā ne fakaasi faka‵lei atu ki a koutou i a Iesu Keliso ne ‵tuki ki te pou?+  Tenei te mea e tasi e manako au o fesili atu* ki a koutou: E mata, ne maua ne koutou te agaga e auala i galuega o te tulafono io me ko te fakatuanaki ki mea kolā ne lagona ne koutou?+  E penā katoa koutou i te va‵lea? Kafai koutou ne kamata ki mea faka-te-agaga,* kaia la ko fakaoti ei koutou ki mea faka-te-foitino?*+  E a, e seai se aoga ne logo‵fio ei koutou i logo‵maega e uke? E iloa ne au me ne aoga eiloa.  Tela la, a te tino telā ne tuku atu ne ia ki a koutou a te agaga kae fai a galuega ‵mana+ i a koutou, e mata, ne fai ne ia a mea konā ona ko otou galuega i te tulafono io me ona ko te otou fakatuanaki ki mea kolā ne lagona ne koutou?  E pelā eiloa mo Apelaamo “ne fakatuanaki ki a Ieova,* kae ne fai a te mea tenā ki a ia e pelā me se faifaiga amiotonu.”+  E iloa ‵lei ne koutou i tino kolā e ola i te fakatuanaki ko latou konā ko fanau a Apelaamo.+  Nei la, ko leva ne lavea atu i tusitusiga tapu me ka taku amiotonugina ne te Atua a tino o fenua fakaa‵tea e auala i te fakatuanaki, kae ko te tala ‵lei ne mua o folafola atu ki a Apelaamo penei: “E auala i a koe ka fakamanuiagina a atufenua katoa.”+  Tela la, a tino kolā e ola i te fakatuanaki ka fakamanuiagina fakatasi mo Apelaamo, telā e fakatuanaki.+ 10  A tino katoa kolā e fakalago‵lago ki galuega o te tulafono ka malaia, me ne tusi mai penei: “Ke malaia a tino katoa kolā e se faka‵logo ki mea katoa kolā e tusi i te peluga tusi o te Tulafono kae e se fai ne latou.”+ 11  E se gata i ei, e manino ‵lei me e seai se tino e taku amiotonugina i mua o te Atua e auala i te tulafono,+ me i “te tino amiotonu ka ola e auala i te fakatuanaki.”+ 12  A te tulafono e se fakavae ki luga i te fakatuanaki. I lō te fai penā, “so se tino e fai ne ia a mea konei ka ola e ‵tusa mo mea konā.”+ 13  Ne ‵togi tatou ne Keliso,+ kae fakasaoloto tatou+ mai te fakasalaga o te Tulafono ko te mea ke maua ne ia te fakasalaga i lō tatou, me ne tusi mai penei: “E maua ne tino katoa kolā e fakatau‵tau i te pou a te malaia.”+ 14  Ne fai penei ko te mea ke oko atu a fakamanuiaga a Apelaamo ki atufenua e auala i a Keliso Iesu,+ ko te mea ke maua ne tatou a te agaga telā ne folafola mai+ e auala i te ‵tou fakatuanaki. 15  Oku taina, e fakaaoga ne au se tala fakatusa telā e masani ki ei a tino: Kafai ko oti ne fakamau‵tu se feagaiga, faitalia me ne fai fua ne se tagata, e se mafai ne se tino o fakaseai io me e fakaopoopo atu se mea ki ei. 16  Ne fai atu a folafolaga konei ki a Apelaamo mo tena tama.*+ E se fai mai penei: “ki tino e ‵tupu mai i a koe,”* e pelā me e tokouke latou. Kae ne fai mai penei, “ki tau tama,”* e pelā me e tokotasi fua, telā ko Keliso.+ 17  E se gata i ei, e fai atu ne au te mea tenei: A te Tulafono telā ne kamata i te 430 tausaga mai tua ifo i ei,+ e seki fakaseaoga ne ia te feagaiga telā ne fai muamua ne te Atua, ko te mea ke fakaseai ei te folafolaga tenā. 18  Me kafai ne fakavae a te mauaga o te tofi ki luga i te tulafono, ko se fakavae ei te mea tenā ki luga i se folafolaga, kae ne tuku atu ne te Atua a te mea tenā mo te kaimalie ki a Apelaamo e auala i se folafolaga.+ 19  Se a la te aoga o te Tulafono? Ne fakaopoopo atu fua ke fakaasi mai i ei a agasala,+ ke oko ki te taimi e oko mai ei te tama*+ telā ne folafola mai; kae ne tuku mai ne agelu+ e auala i se sokoga.+ 20  E se ‵tau o isi se sokoga māfai e tokotasi fua te tino e aofia i ei, kae ko te Atua fua ne fai ne ia te folafolaga. 21  Tela la, e mata, e ‵teke atu te Tulafono ki folafolaga a te Atua? Ikai! Me kafai ne tuku mai se tulafono telā e mafai o tuku mai i ei te ola, ka maua foki se tulaga amiotonu e auala i te tulafono. 22  Kae ne tuku atu ne te Muna a te Atua a tino katoa ke ‵nofo mai lalo i te pule a te agasala, ko te mea ko te folafolaga telā e maua mai i te fakatuanaki ki a Iesu Keliso ke mafai o tuku atu ki a latou kolā e fakaasi atu te fakatuanaki. 23  Kae koi tuai o oko mai te fakatuanaki, a tatou ne puipuigina mai lalo i te tulafono e pelā me ne pagota, kae olioli eiloa tatou ke oko mai te fakatuanaki telā ko pili o fakaasi mai.+ 24  Tela la, ne fai te Tulafono mo fai te ‵tou tino tausi* o takitaki atu tatou ki a Keliso,+ ko te mea ke taku amiotonugina tatou e auala i te fakatuanaki.+ 25  Kae ona ko te mea ko oti ne oko mai te fakatuanaki,+ ko se toe ‵nofo ei tatou mai lalo i se tino tausi.*+ 26  Se mea tonu, i a koutou ko tama katoa a te Atua+ e auala i te otou fakatuanaki ki a Keliso Iesu.+ 27  Me i a koutou katoa kolā ne papatiso i a Keliso ko oti ne fakapei ki luga i a koutou a Keliso.+ 28  E se toe ai se tino Iutaia io me se tino Eleni,+ e se toe ai se pologa io me se tino saoloto,+ e seai foki se tagata io me se fafine,+ me i a koutou ko tasi katoa i te ‵kau fakatasi mo Keliso Iesu.+ 29  E se gata i ei, kafai koutou ko tino o Keliso, ko aofia eiloa koutou i tama* a Apelaamo,+ ko sui+ e uiga ki te folafolaga.+

Fakamatalaga mai lalo

Eleni, “iloa mai.”
Eleni, “kamata i te agaga.”
Eleni, “fakaoti i te foitino.”
Onoono ki te MF A5.
Eleni, “fanau.”
Eleni, “fanau.”
Eleni, “fanau.”
Eleni, “fanau.”
Io me “faiakoga.”
Io me “faiakoga.”
Eleni, “fanau.”