Ki te Kau i Kalatia 2:1-21

  • Ko fai‵pati a Paulo mo apositolo i Ielusalema (1-10)

  • Ko fakatonu ne Paulo a Petelu (Kefa) (11-14)

  • Taku amiotonugina fua e auala i te fakatuanaki (15-21)

2  Mai tua o tausaga e 14 ne toe foki au ki Ielusalema fakatasi mo Panapa,+ kae ne ave foki ne au a Tito.+  Au ne fano ona ko te fakaasiga mai te lagi kae ne fakaasi atu ne au ki a latou a te tala ‵lei telā e folafola atu ne au ki fenua fakaa‵tea. Ne fai atu fua a te mea tenei ki tāgata kolā e āva malosi ki ei a tino, ko te mea ke fakamautinoa aka me i te galuega telā e fai ne au io me ko oti ne fai ne au e aoga.  E tiga te feitu tenā, ne seki faimālō atu ki a Tito+ telā ne olo māua ke pilitome,+ e ui eiloa a ia se tino Eleni.  Kae ne sae aka te mataupu tenā ona ko taina ‵loi kolā ne o‵mai lēmū ki loto+ o lamalama te saolotoga+ telā ko maua ne matou i te motou ‵kau fakatasi mo Keliso Iesu, ko te mea ke fakapologa katoatoa ne latou a matou;+  ne seki faka‵logo eiloa matou ki a latou,+ ikai, e seki fai eiloa penā mō se taimi toetoe,* ko te mea ke tumau i a koutou a te munatonu e uiga ki te tala ‵lei.  Kae e pelā mo latou kolā e foliga mai me e tāua+​—faitalia me ne vaegā tino pefea, e seai se ‵kese ki a au, me i te Atua e se saga ki foliga o te tino i tua​—e seai ne manatu ‵fou ne maua ne au mai i tāgata ma‵luga konā.  Kae i te laveaga ne latou me ko oti ne tuku mai ki a au a te tala ‵lei ke folafola atu ki tino seki pilitome,+ e pelā eiloa mo Petelu ne tuku atu ki a ia te galuega ke folafola atu te tala ‵lei ki tino pilitome​—  me i te tino telā ne tuku atu ne ia te ‵mana ki a Petelu ke fai mo fai se apositolo ki tino pilitome ne tuku mai foki ne ia te ‵mana ki a au e uiga mō tino o fenua fakaa‵tea+​—  kae i te mateaga ne latou a te alofa tauanoa telā ne tuku mai ki a au,+ ne tuku mai ei ne Iakopo+ mo Kefa* mo Ioane, kolā ko pou ma‵losi o te munatonu, olotou lima fakaatamai o fakatalofa ki a māua mo Panapa+ e fakaasi ei te lotoma‵lie fakatasi o matou* ke olo māua ki fenua fakaa‵tea kae ko latou ki tino pilitome. 10  Ne fakamolemole mai fua latou ke masaua faeloa ne māua a tino ma‵tiva kae tenā eiloa te mea ne taumafai malosi au o fai.+ 11  Kae i te vauga a Kefa*+ ki Anitioka,+ ne ‵teke* atu au ki a ia, me e manino ‵lei me ne fai ne ia se mea ‵se. 12  Me koi tuai o oko mai a nisi tāgata mai i a Iakopo,+ ne ‵kai sāle a ia mo tino o fenua fakaa‵tea;+ kae i te lotou okomaiga, ne fakagata ne ia te mea tenei kae ‵vae a ia kea‵tea mai i a latou ona ko tena mataku i tino pilitome.+ 13  Ne ‵kau atu foki a te ‵toega o tino Iutaia i te uiga fakaloiloi tenei, ke oko ki a Panapa, ne tautali atu foki i te lotou uiga fakaloiloi tenā. 14  Kae i te laveaga ne au me ko se sa‵sale latou i te mea tonu e uiga ki te tala ‵lei,+ ne fai atu ei au ki a Kefa* i mua o latou katoa: “Kafai koe se tino Iutaia kae ko ola koe e pelā mo tino o fenua fakaa‵tea kae e se pelā mo tino Iutaia, e mafai la pefea ne koe o faimālō a tino o fenua fakaa‵tea ke ola e ‵tusa mo faifaiga faka-Iutaia?”+ 15  A tatou kolā ne fa‵nau mai e pelā me ne tino Iutaia, kae e se ne tino agasala mai fenua fakaa‵tea, 16  e matea ne tatou me e taku amiotonugina se tino, e se auala i galuega o te tulafono, kae e auala fua i te fakatuanaki+ ki a Iesu Keliso.+ Tela la, ko fakatuanaki tatou ki a Keliso Iesu, ko te mea ke taku amiotonugina tatou e auala i te fakatuanaki ki a Keliso kae e se ona ko galuega o te tulafono, me ka seai se tino e taku amiotonugina e auala i galuega o te tulafono.+ 17  Kafai ko oti ne fai tatou mo fai ne tino agasala kae ‵sala atu ke taku amiotonugina tatou e auala i a Keliso, e mata, a Keliso ko te tavini a te agasala? E se mafai lele eiloa o fai penā! 18  Kafai ko toe ati aka ne au a mea eiloa kolā ne lepe ne au ki lalo, e fakaasi atu i ei i a au se tino solitulafono. 19  Me e auala i te tulafono ne mate au mō te tulafono,*+ ko te mea ke mafai au o ola mō te Atua. 20  Au ne ‵tuki ki te pou fakatasi mo Keliso.+ E se ko au tenei e ola,+ kae ko Keliso telā e ola nei i te ‵kau fakatasi o māua. E tonu, a te olaga telā e ola ei au i te foitino tenei e ola eiloa au i te fakatuanaki ki te Tama a te Atua,+ telā ne alofa mai ki a au kae tuku mai foki tena ola mō au.+ 21  E se ‵teke ne au a te alofa tauanoa o te Atua,+ me kafai e maua te amiotonu e auala i te tulafono, ko tena uiga e seai se aoga ne mate ei a Keliso.+

Fakamatalaga mai lalo

Eleni, “se itula.”
E fakaigoa foki ki a Petelu.
Io me “ga‵lue fakatasi.”
E fakaigoa foki ki a Petelu.
Io me “faipati ‵tonu.”
E fakaigoa foki ki a Petelu.
Io me “ne fakasaoloto au mai te tulafono.”