Ki te Kau i Kalatia 1:1-24

  • Alofaaga (1-5)

  • Seai aka foki se isi tala ‵lei (6-9)

  • Te tala ‵lei ne talai ne Paulo ne aumai mai te Atua (10-12)

  • Te ‵fuliga o Paulo mo te kamataga o tena galuega (13-24)

1  Au ko Paulo, se apositolo, e se mai i tāgata io me e auala i se tagata, kae e auala i a Iesu Keliso+ mo te Atua te Tamana,+ telā ne toe fakatu aka ne ia a Iesu mai te mate.  Ko tusi atu au fakatasi mo te kautaina katoa i konei, ki fakapotopotoga katoa i Kalatia:  Ke i luga i a koutou a te alofa tauanoa mo te filemu mai te Atua te ‵tou Tamana mo te Aliki ko Iesu Keliso.  Ne tuku atu ne ia a ia eiloa mō ‵tou agasala+ ko te mea ke faka‵sao ne ia tatou mai te olaga masei tenei+ e ‵tusa mo te loto o te ‵tou Atua mo te ‵tou Tamana,+  telā i o ia te vikiga ki te se-gata-mai, se-gata-mai eiloa. Amene.  Au e ofo i te vave o ‵fuli koutou kea‵tea mai te Atua telā ne kalagagina ne ia koutou i te alofa tauanoa o Keliso ki se isi tala ‵lei.+  E se ko tena uiga me isi se suā tala ‵lei; kae e isi ne tino e faka‵tupu ne latou a fakalavelave mō koutou+ kae e ma‵nako o faka‵numi a te tala ‵lei e uiga ki te Keliso.  E tiga te feitu tenā, kafai foki loa e folafola atu ne matou io me se agelu mai te lagi se isi tala ‵lei i tafa o te tala ‵lei telā ne folafola atu ne matou ki a koutou, ke malaia eiloa a ia.  E pelā eiloa mo omotou pati ne fai atu muamua, ko toe fai atu au penei, So se tino e folafola atu ne ia ki a koutou se isi tala ‵lei i tafa o te mea telā ko oti ne talia ne koutou, ke malaia eiloa a ia. 10  E mata, ko te taliaga a tāgata e ‵sala au ki ei io me ko te taliaga a te Atua? Io me e a, e taumafai au o fakafiafia a tāgata? Kafai koi fakafiafia eiloa ne au a tāgata, au e sē se pologa a Keliso. 11  Me e manako au ke iloa ne koutou, e oku taina, i te tala ‵lei ne folafola atu ne au ki a koutou e seki māfua mai i tāgata;+ 12  me ne seki maua ne au te mea tenā mai i tāgata, io me ne akoako mai ki a au, kae ne maua ne au e auala i se fakaasiga mai i a Iesu Keliso. 13  Ne ‵logo eiloa koutou i aku amioga mua kae koi kau au ki te lotu Iutaia,+ me ne tumau au i te fakasaua malosi atu ki te fakapotopotoga a te Atua kae fakamasei ne au;+ 14  kae ne sili atu toku gasolo ki mua i te lotu Iutaia i lō oku kautama e tokouke i toku fenua, me ne silia atu foki toku loto finafinau ki tuu mo aganuu a oku tupuga.+ 15  Kae i te taimi ne mafaufau ei te Atua, telā ne ‵vae ne ia au kea‵tea mai te moegatama o toku mātua kae kalagagina ne ia a au e auala i tena alofa tauanoa,+ me se mea ‵lei 16  ke fakaasi mai tena Tama e auala i a au ko te mea ke folafola atu ne au te tala ‵lei e uiga ki a ia ki fenua fakaa‵tea,+ ne seki ‵sala fakavave atu au ki manatu o se isi tino; 17  io me ne fano au ki Ielusalema ki a latou kolā ne mua atu i a au o fai mo apositolo, kae ko au ne fano ki Alapi, kae toe foki atu fakamuli ki Tamaseko.+ 18  I te tolu o tausaga mai tua ifo i ei kae fano au o āsi ki a Kefa*+ i Ielusalema,+ kae ne ‵nofo māua i konā i aso e 15. 19  Kae ne seki fetaui au mo nisi apositolo kae na ko Iakopo+ te taina o te Aliki. 20  Kae e pelā mo mea konei e tusi atu ne au ki a koutou, e fakatalitonu atu ne au ki a koutou i mua o te Atua i a au e se loi. 21  Mai tua i konā, fano ei au ki kogā koga o Sulia mo Kilikia.+ 22  Kae ne seki iloa au ne fakapotopotoga i Iuta kolā e ‵kau fakatasi mo Keliso. 23  Ne lagona sāle fua ne latou a te mea tenei: “A te tagata telā ne fakasaua muamua ne ia tatou+ tenei ko folafola atu ne ia te tala ‵lei e uiga ki te fakatuanaki telā ne fakamasei muamua ne ia.”+ 24  Tenā ne kamata ei o ‵viki atu latou ki te Atua ona ko au.

Fakamatalaga mai lalo

E fakaigoa foki ki a Petelu.