Iopu 38:1-41

  • E tuku mai ne Ieova se akoakoga e uiga ki te foliki o te tagata (1-41)

    • ‘Ne nofo koe i fea i te faitega o te lalolagi?’ (4-6)

    • Ko paka‵laga a tama a te Atua i te fia‵fia (7)

    • Fesili e uiga ki mea fakaofoofogia o te natula (8-32)

    • “Tulafono kolā e pule ne latou te lagi” (33)

38  Tenā ne tali atu ei a Ieova ki a Iopu mai loto i se afā:+   “Ko oi te tino tenei e faka‵numi ne ia aku pati fakatonutonuKae faipati e aunoa mo te iloa?+   Fakatoka mai koe, fakamolemole, e pelā me se tagata;Ka fesili atu au ki a koe, kae fakamatala mai ne koe ki a au.   Ne nofo koe i fea i te taimi ne fakavae ei ne au a te lalolagi?+ Fai mai ki a au, māfai e mafaufau koe i a koe e malamalama.   Ko oi ne fua ne ia te lalolagi, māfai e iloa ne koe,Io me ko oi ne ‵futi ne ia a te uka e fua i ei ki te suā feitu?   Se a te mea ne tuku ki ei ana fakavae,Io me ko oi ne fakatakato ne ia ana fatu tulimanu,+   I te taimi ne ‵tagi fia‵fia fakatasi ei a fetū o te vaveao,+Kae ko tama tāgata katoa a te Atua+ ne kamata o paka‵laga ki luga?   Ko oi ne ‵pono ne ia a mataloa o te tai+I te taimi ne mapā ei ki tua mai te moegatama,   I te taimi ne fakapei ei ne au ki kaumanaKae pelupelu* ne au i loto i te kaumana matolu, 10  I te taimi ne fakatoka ei ne au tena tapulaKae tuku ana lakau faka‵lava mo ana mataloa i te koga tonu,+ 11  Kae ne fai atu au, ‘E mafai ne koe o vau ki te ‵mao tenei, kae e se silia atu;Tenei te koga ka gata i ei ou galu ‵lasi’?+ 12  Kai fakatonu aka eiloa ne koe a te tafataeaoIo me fai ke iloa ne te vaveao a tena tulaga,+ 13  Ke puke ‵mau ki koga ‵mao o te lalolagiKae lūlū a tino ma‵sei ki tua mai i ei?+ 14  E ‵fuli a te mea tenā e pelā me se kele mai lalo o se fakamailoga,Kae ko ana foliga e tu ‵kese e pelā eiloa me se gatu. 15  Kae ko te mainaga o tino ma‵sei e taofi mai i a latou,Kae ko te lotou lima telā ne sisi i luga ko fati. 16  Kai fano eiloa koe ki lalo ki punāvai o te taiIo me iloilo a koga ‵poko o te tai?+ 17  E a, ko oti ne fakaasi atu ki a koe a mataloa o te mate,+Io me kai lavea eiloa ne koe a mataloa o te pouliga?*+ 18  Kai malamalama eiloa koe i te lasi o te vanimonimo o te lalolagi?+ Fai mai ki a au, māfai e iloa ne koe a mea katoa konei. 19  Ko te feitu fea e nofo i ei a te mainaga?+ Kae tefea te koga o te pouliga, 20  E ‵tau o ave ne koe te mea tenā ki te koga e nofo i eiKae ke malamalama i te auala ki tena fale? 21  E a, e iloa ne koe a te mea tenei me i a koe ko oti ne fanauKae ko uke a aofaki o ou tausaga?* 22  Kai ulu eiloa koe ki fale ‵teu koloa o te kiona,+Io me kai lavea ne koe a fale ‵teu koloa o te vaiua fatu,+ 23  Kolā ne tausi ne au mō taimi o fakalavelave,Mō te aso e fai ei te taua?+ 24  Ko te feitu fea e salalau atu ki ei a te mainaga,*Kae tefea te koga e agi mai ei a te matagi mai saegala ki te lalolagi?+ 25  Ko oi ne ‵kati ne ia a te alavai mō te lofiagaKae faite ne ia se auala mō te kaumana o te matagi mo fa‵tili,+ 26  Ko te mea ke ‵to te vaiua i te koga telā e seai se tagata e nofo i ei,I te koga lavaki telā e seai ne tino e ‵nofo i ei,+ 27  Ke lotoma‵lie a koga sē aoga kolā ko oti ne fakamaseiginaKae fai ei ke ola aka a mouku?+ 28  E a, e isi se tamana o te vaiua,+Io me ko oi te tamana o motiga vai?+ 29  I o oi te moegatama ne sae mai i ei te kati aisa,Kae ko oi ne fanau mai ne ia a te kiona o te lagi+ 30  I te taimi ne ‵fonu ei a vai e pelā me ‵fonu i fatu,Kae ko koga i luga o te tai ‵poko ko ma‵keke i te poloka?+ 31  E mafai o ‵sai ne koe a lōpu o te fakaputuga fetū ko te Kima*Io me ‵tala a uka o te fakaputuga fetū ko te Kesila?*+ 32  E mafai ne koe o ‵taki se fakaputuga fetū* i tena taimi tonuIo me takitaki a te fakaputuga fetū ko te Asi* fakatasi mo ana tama tāgata? 33  E iloa ne koe a tulafono kolā e pule ne latou te lagi,+Io me e mafai ne koe o fakagalue te lotou* pulega i te lalolagi? 34  E mafai o faipati atu koe i se leo maluga ki kaumanaKe fai ke lofia a vai ke ufi ei koe?+ 35  E mafai o uga atu ne koe a uila? E a, ka o‵mai latou o fai atu ki a koe, ‘Konei matou!’ 36  Ko oi ne tuku atu ne ia te poto ki loto i kaumana*+Io me tuku atu te malamalama ki mea fakaofoofogia i te lagi?*+ 37  Ko oi e lava tena poto ke lau aka ne ia a kaumana,Io me ko oi e mafai o ‵ligi ne ia a tiā vai o te lagi+ 38  I te taimi e ‵ligi ei a ‵pefu ke fai e pelā me se fakaputuga lasi ‵kiKae ko kele o te laukele ko ‵piki fakatasi? 39  E a, e mafai ne koe o ‵sala ne meakai ma se leonaIo me fakama‵lie a te fia‵kai o tamā leona+ 40  I te taimi e ‵muni ei latou i olotou koga ‵muniIo me ta‵kato o fakatalitali ke taua atu mai i olotou ana? 41  Ko oi e fakatoka ne ia meakai a te leveni+I te taimi e ‵tagi ei ana tama ki te Atua mō se fesoasoaniKae olo valevale fua me ko seai ne meakai?

Fakamatalaga mai lalo

Io me “fakapulupulu.”
Io me “ata o te mate.”
Epelu, “aso.”
Io me kāti, “uila.”
Kāti ko te fetū ko Mataliki i te fakaputuga fetū ko te Taulusi.
Kāti ko te fakaputuga fetū ko te Melemele.
Epelu, “Masalota.”
Kāti ko te fakaputuga fetū ko te Pea Lasi.
Io me kāti, “Tena.”
Io me kāti, “ki loto i te tagata.”
Io me kāti, “ki te mafaufau.”