Te Tusi a Ioane 7:1-52
7 I te otiga o te mea tenei ne faimalaga* sāle a Iesu i Kalilaia, me ne seki manako a ia o fai penā i Iuta, i te mea ne salasala a tino Iutaia ke tamate a ia.+
2 Kae ko pili eiloa ki te ‵Kaiga Fiafia o Faleie Tapu*+ a te kau Iutaia.
3 Ne fai atu ana taina+ ki a ia: “Tiaki te koga tenei kae fano ki Iuta, ko te mea ke lavea foki ne ou soko a galuega e fai ne koe.
4 Me seai se tino e fai ‵funa ana mea māfai e manako ke lauiloa a ia i mua o tino. Kafai e fai ne koe a mea konei, fakaasi atu la koe ki te lalolagi.”
5 A te ‵tonuga loa, ne seki fakaasi atu faeloa ne ana taina te fakatuanaki ki a ia.+
6 Ne fai atu a Iesu ki a latou: “E seki oko ki toku taimi tonu,+ kae ko koutou e ‵pau faeloa ki a koutou a so se taimi.
7 E seai se pogai e takalia‵lia ei te lalolagi ki a koutou, kae e takalia‵lia mai ki a au, me e molimau atu au i olotou galuega e matagā.+
8 Olo koutou ki te fakamanatuga; au e se fano ki te fakamanatuga tenei, me e seki oko ki toku taimi.”+
9 I te otiga o ana pati konā ki a latou, nofo ei a ia i Kalilaia.
10 Kae i te otiga ne olo ana taina ki te fakamanatuga, ne fanatu foki a ia. Ne seki fano fakaasiasi kae ne fano ‵muni.
11 Ne kamata o salasala a tino Iutaia ki a ia i te fakamanatuga kae fai aka, penei: “Tefea te tagata tenā?”
12 Ne lasi eiloa te musu‵musu o te vaitino e uiga ki a ia. E fai mai a nisi tino: “A ia se tagata ‵lei.” Kae ko nisi tino e fai mai: “Ikai, e takitaki ‵se ne ia a te vaitino.”+
13 E seai se tino e mafai o faipati e uiga ki a ia i mua o tino katoa me ne ma‵taku latou i tino Iutaia.+
14 Kāti ko te fa o aso o te fakamanatuga kae fanatu a Iesu ki loto i te faletapu kae kamata o akoako atu i ei.
15 Ne ofo a tino Iutaia, olotou muna: “Ne poto pefea a te tagata tenei i Tusitusiga+ konei, me ne seki akoga a ia i se akoga?”*+
16 Ne tali atu a Iesu ki a latou kae fai atu: “A mea kolā e akoako atu ne au e se i a aku, kae i a te tino telā ne uga mai ne ia au.+
17 Kafai e manako se tino ke fai ne ia te loto o te Atua, ka iloa ei ne ia me i akoakoga konei e aumai mai te Atua+ io me e fai atu fua ne au i aku pati eiloa.
18 So se tino e faipati ki ana manatu eiloa e ‵sala ki ana tavaega; kae ko so se tino e ‵sala ki tavaega o te tino telā ne uga mai ne ia a ia,+ a te tino tenei e fakamaoni kae amiotonu.
19 E a, e seki tuku atu ne Mose ki a koutou te Tulafono?+ Kae e seai se tino i a koutou e fakalogo ki te Tulafono. Kaia la e lamalama ei koutou o tamate au?”+
20 Ne tali atu te vaitino: “E isi se temoni i a koe. Ko oi e lamalama o tamate koe?”
21 Ne tali atu a Iesu ki a latou: “E tasi te mea ne fai ne au, kae ne ofo katoa koutou i ei.
22 Tenei te pogai ne tuku atu ei ne Mose te pilitome+ ki a koutou—e se fai pelā me ne māfua mai i a Mose, kae mai i otou tupuga+—kae e pilitome ne koutou te tagata i te sapati.
23 Kafai e pilitome se tagata i te sapati ko te mea ke se soli i ei te tulafono a Mose, e a, e kaitāua malosi koutou ki a au me ne faka‵lei katoatoa ne au se tino i te sapati?+
24 Sa fakamasino ne koutou a mea i olotou foliga i tua, kae fai ke tonu te otou fakamasinoga.”+
25 Tenā ne kamata ei o fai aka penei a nisi tino i Ielusalema: “E a, e se tenei te tagata e lamalama ne latou ke tamate?+
26 Kae kiloke! tenā eiloa e faipati mai a ia ki tino e tokouke, kae e seai ne olotou pati e fai atu ki a ia. E a, e seki fakamautinoa aka eiloa ne tino pule me tenei te Keliso?
27 E iloa ne matou te koga ne vau ei te tagata tenei;+ kae kafai e vau te Keliso e seai eiloa se tino e ‵tau o iloa ne ia me ne vau a ia mai fea.”
28 Kae koi akoako atu a ia i te faletapu, ne kalaga atu a Iesu: “E iloa ne koutou au kae e iloa foki ne koutou te koga ne vau ei au. Kae ko au ne seki vau i a au eiloa,+ a te Atua telā ne uga mai ne ia au se tino tonu eiloa, kae e se iloa ne koutou a ia.+
29 E iloa ne au a ia,+ me i a au ko tena sui, kae ko te Atua telā ne uga mai ne ia au.”
30 Tenā ne kamata ei latou o lamalama ke puke a ia,+ kae e seai se tino ne oko atu ana lima ki a ia, me ne seki oko ki tena taimi tonu.+
31 E ui i ei, e tokouke a tino mai te vaitino ne fakatuanaki ki a ia,+ kae fai aka olotou pati penei: “Kafai e vau te Keliso, e a, ka uke atu ana galuega ‵mana e fai i lō te tagata tenei?”
32 Ne lagona ne te kau Falesaio a te vaitino e musu‵musu ki mea e uiga ki a ia, kae ne uga atu ne faitaulaga pule mo Falesaio a ofisa ke puke a ia.
33 Fai atu ei a Iesu: “Au ka ‵nofo fakatasi eiloa mo koutou i se taimi tai leva kae koi tuai au o fano ki te Atua telā ne uga mai ne ia au.+
34 Ka ‵sala koutou ki a au, kae ka se maua ne koutou au, kae ko te koga e nofo au i ei e se mafai ne koutou o ‵mai ki ei.”+
35 Ne fai‵pati a tino Iutaia i a latou eiloa: “Tefea te koga ka fano ki ei te tagata tenei, ko te mea ke se mafai o maua ne tatou a ia? E a, ka fano a ia ki tino Iutaia kolā e salalau valevale i Eleni kae akoako atu a tino Eleni?
36 Ne a uiga o ana pati konei, ‘Ka ‵sala koutou ki a au, kae ka se maua ne koutou au, kae ko te koga e nofo au i ei, e se mafai ne koutou o ‵mai ki ei’?”
37 I te aso fakaoti, ko te ‵toe aso sili eiloa o te ‵kaiga fiafia,+ ne tu aka a Iesu ki luga kae faipati atu i se leo maluga: “Kafai se tino e fiainu, ke na vau ki a au o inu.+
38 So se tino e fakatuanaki mai ki a au, e pelā eiloa mo muna i tusitusiga tapu, ‘Ka ‵tafe mai i loto i a ia a te vai o te ola.’”+
39 Kae ne faipati ne ia te mea tenei e uiga ki te agaga telā ko pili o maua ne tino kolā e fakatuanaki ki a ia; me ne seki ai se agaga+ i te taimi tenā i te mea ne seki faka‵malugina a Iesu.+
40 A nisi tino mai te vaitino kolā ne lagona ne latou a pati konei, ne kamata o fai aka penei: “Tenei eiloa te Pelofeta.”+
41 Ne fai mai a nisi tino: “Tenei te Keliso.”+ Kae fai mai a nisi tino: “E a, e ‵tau o vau te Keliso mai Kalilaia?+
42 E a, e seki fai mai i tusitusiga tapu me i te Keliso e vau i te gafa o Tavita,+ mai i Peteleema+ te fakai foliki telā ne nofo i ei a Tavita?”+
43 Tenā ne fakatau kinau ei a te vaitino e uiga ki a ia.
44 Kae ne ma‵nako a nisi tino ke puke ne latou a ia, kae seai eiloa se tino ne oko atu ana lima ki a ia.
45 Ne ‵foki atu a ofisa ki faitaulaga pule mo te kau Falesaio, kae fai atu a te kau Falesaio ki a latou: “Kaia ne seki aumai ei ne koutou a ia?”
46 Ne tali atu a ofisa: “Ne seki ai eiloa se tagata kai faipati penei mo te tagata tenei.”+
47 Ne fai atu a te kau Falesaio: “E a, ko takitaki‵segina foki koutou?
48 E a, ko oti ne fakatuanaki se tino pule io me se Falesaio e tokotasi ki a ia?+
49 Kae ko te vaitino kolā e se iloa ne latou te Tulafono ne tino malaia.”
50 A Nikotemo telā ne fanatu muamua ki a Iesu, kae se tino e tokotasi o latou, ne fai atu ki a latou:
51 “E a, e se fakamasino ne te ‵tou Tulafono se tagata seiloga ke faka‵logo muamua tatou ki a ia ke iloa ne tatou ana mea ne fai?”+
52 Ne tali atu latou ki a ia: “E a, a koe foki se tino mai Kalilaia? Sukesuke kae ka lavea ne koe me e seai se pelofeta e ‵tau o sae mai i Kalilaia.”*
Fakamatalaga mai lalo
^ Io me “sasale.”
^ Io me “Fale Fakamalumalu.”
^ Telā ko akoga a te kau lapi.
^ E se aofia i nisi lomiga mua mo nisi lomiga lauiloa a te fuaiupu e 53 ke oko ki te mataupu e 8 fuaiupu e 11.
