Te Tusi a Ioane 2:1-25

  • Te avaga telā ne fai i Kana; vai ne ‵fuli ki uaina (1-12)

  • Ko ‵fulu faka‵ma ne Iesu te faletapu (13-22)

  • E iloa ne Iesu a mea i te loto o te tino (23-25)

2  I te tolu o aso, ne fai te ‵kaiga o te avaga i Kana i Kalilaia, kae ne nofo atu i konā te mātua o Iesu.  Ne ‵kami foki a Iesu mo ana soko ki te ‵kaiga o te avaga.  I te taimi ne oti ei te uaina, fai atu ei te mātua o Iesu ki a ia: “Ko seai ne olotou uaina.”  Kae ne fai atu a Iesu ki a ia: “Te fafine, kaia e ‵tau ei o manavase au ki ei e pelā foki mo koe?* E seki oko mai toku taimi.”  Ne fai atu tena mātua ki tavini: “Fai so se mea e fai atu ne ia.”  E isi ne tiā fatu vai ‵lasi e ono e ‵tu i konā e ‵tusa mo tulafono a tino Iutaia e uiga ki te faka‵māga,+ kae kāti e ‵tusa mo te 44 ki te 66 lita i te tiā e tasi.*  Ne fai atu a Iesu ki a latou: “Faka‵fonu a tiā konā ki vai.” Tenā ne faka‵fonu ei ne latou ke oko eiloa ki kaugutu.  Ne fai atu a ia ki a latou: “Asu ne vai mai i ei kae tuku atu ki te pule o te ‵kaiga.” Ne fai eiloa ne latou te mea tenā.  I te taimi ne tami ei te pule o te ‵kaiga ki te vai telā ko oti ne ‵fuli ki te uaina kae seki iloa ne ia me ne aumai mai fea, (e tiga eiloa ne iloa ne tavini kolā ne asu mai ne latou te vai), ne kalaga atu te pule o te ‵kaiga ki te tagata ka fakaipoipo 10  kae fai atu ki a ia: “A nisi tino katoa e fakasoa atu muamua ne latou te uaina ‵lei, kae kafai ko ko‵nā a tino, ko fakasoa atu ei te uaina masei. Kae ne tausi ne koe te uaina ‵lei ki te taimi tenei.” 11  Ne fai ne Iesu a te mea tenei i Kana i Kalilaia e pelā me ko te kamataga o ana galuega ‵mana, kae ne fakaasi atu i ei tena ‵malu,+ kae ne fakatuanaki ana soko ki a ia. 12  I te otiga o te mea tenei, olo atu ei latou mo tena mātua mo ana taina+ mo ana soko ki Kapanaumi,+ kae ne seki ‵nofo leva latou i konā. 13  Ko pili o oko ki te Paseka+ a te kau Iutaia, fanatu ei a Iesu ki Ielusalema. 14  Ne maua atu ne ia i te faletapu a tino e fakatau olotou pulumakau mo mamoe mo lupe+ mo tino ‵fuli tupe e ‵nofo mai i olotou nofoga. 15  I te otiga ne faite ne ia se ‵kini ki lōpu, afuli ei ne ia a tino katoa mo olotou pulumakau mo mamoe ki tua mo te faletapu, kae ‵ligi ne ia ki lalo a tupe siliva a tino ‵fuli tupe kae ‵tule olotou taipola ki lalo.+ 16  Kae ne fai atu a ia ki tino kolā e fakatau olotou lupe: “Ave kea‵tea a mea katoa mai konei! Sa fai ne koutou a te fale o toku Tamana mo fai se fale e fakatau ei a koloa!”*+ 17  Ne masaua ne ana soko a pati kolā ne tusi: “A te loto finafinau ki tou fale ko fai masei i loto i a au.”+ 18  Ne tali atu a tino Iutaia ki a ia: “Se a te fakailoga e mafai o fakaasi mai ne koe ki a matou,+ ona ko mea konei e fai ne koe?” 19  Ne tali atu a Iesu ki a latou: “Lepe ki lalo te faletapu tenei, kae ka toe fakatu aka ne au i aso e tolu.”+ 20  Tenā ne fai atu ei a tino Iutaia ki a ia: “A te faletapu tenei ne fakatu i tausaga e 46, kae e mafai ne koe o fakatu aka i aso e tolu?” 21  Kae ne faipati eiloa a ia ki te faletapu telā ko tena foitino.+ 22  I te taimi ne fakatu aka ei a ia mai te mate, ne masaua ne ana soko me ne faipati sāle a ia ki te mea tenei,+ kae ne tali‵tonu latou ki tusitusiga tapu mo pati kolā ne fai atu ne Iesu. 23  Kae i tena nofoatuga i Ielusalema i te ‵kaiga fiafia o te Paseka, ne fakatuanaki a tino e tokouke ki tena igoa, i te laveaga ne latou a galuega ‵mana kolā ne fai ne ia. 24  Ne seki talitonu katoatoa a Iesu ki a latou ona ko te mea ko iloa ne ia a latou katoa 25  kae e se manako foki a ia ke fai atu ne se tino se molimau e uiga ki se isi tino, me ko leva ne iloa ne ia a mea i te loto o te tino.+

Fakamatalaga mai lalo

Eleni, “Se a taku fekau mo tau fekau i ei, e te fafine?” A te mea tenei se tugapati fakauiga ke fakaasi atu ei te sē fiafia. A te fakaaogaga o te pati “fafine” e se fakaasi atu i ei te sē āva.
Kāti ko te 12 ki te 17 kalone.
Io me “se maketi; se pisinisi.”