Te Tusi a Ioane 13:1-38
13 Kae koi tuai o oko ki te ‵kaiga fiafia o te Paseka ko leva ne iloa ne Iesu me ko oko mai te itula+ ka tiaki ei ne ia te lalolagi tenei kae fanatu ki te Tamana,+ ne alofa malosi a Iesu ki ana soko kolā e ‵nofo i te lalolagi, kae ne alofa eiloa a ia ki a latou ke oko ki te fakaotiga.+
2 I te taimi koi fai ei te ‵kaiga i te afiafi, kae ko leva ne tuku ne te Tiapolo ki te loto o Iuta te Isikaliota,+ te tama a Simona, a te manakoga ke fakatogafiti ne ia a Iesu.+
3 Ona ko te mea e iloa ne Iesu me ko oti ne tuku atu ne te Tamana ki ana lima a mea katoa, kae ko ia ne vau mai te Atua kae ka fano foki ki te Atua,+
4 ne tu aka a ia mai te ‵kaiga kae tapale tena gatu tafa ki tua. Ne puke ne ia se solo kae ‵sai ki tena taugasulu.+
5 Mai tua ifo i ei, ne ‵ligi ne ia a vai ki loto i se pesini kae kamata o mulumulu ne ia a vae o ana soko kae fakamalō ki te solo telā e ‵sai ki tena taugasulu.
6 Tenā ne fanatu ei a ia ki a Simona Petelu. Ne fai atu a Simona ki a ia: “Te Aliki, e a, e mulumulu ne koe oku vae?”
7 Ne tali atu a Iesu ki a ia: “A te mea telā e fai ne au e se malamalama nei koe i ei, kae fakamuli ka malamalama koe i mea konei.”
8 Ne fai atu a Petelu ki a ia: “Ka se mulumulu eiloa ne koe oku vae.” Ne tali atu a Iesu ki a ia: “Kafai e se mulumulu ne au a koe,+ e seai sou vaega e maua mai i a au.”
9 Ne fai atu a Simona Petelu ki a ia: “Te Aliki, sa mulumulu fua oku vae kae ko oku lima foki mo toku ulu.”
10 Ne fai atu a Iesu ki a ia: “So se tino ko oti ne koukou e manakogina fua ke mulumulu ana vae, me e ‵ma katoatoa a ia. A koutou e ‵ma, kae e se ko koutou katoa.”
11 Me ne iloa ‵lei ne ia te tagata telā ka fakatogafiti ne ia a ia.+ Tenā te pogai ne fai atu ei a ia: “E se ko koutou katoa e ‵ma.”
12 I te otiga ne mulumulu ne ia olotou vae kae toe pei tena gatu, ne sagasaga ifo a ia ki te taipola kae fai atu ki a latou: “E malamalama koutou i te mea telā ne fai ne au ki a koutou?
13 E taku ne koutou au ki te ‘Faiakoga,’ mo te ‘Aliki’ kae e tonu eiloa koutou, me ko au eiloa tenā.+
14 Tela la, kafai au ko te Aliki mo te Faiakoga kae ne mulumulu ne au otou vae,+ e ‵tau* foki mo koutou o fakatau mulumulu otou vae.+
15 Me ne tuku atu ne au se fakaakoakoga mō koutou, tela la, e pelā mo te mea ko oti ne fai ne au ki a koutou, e ‵tau foki o fai koutou penā.+
16 Au e fai ‵tonu atu ki a koutou, a te pologa e se sili atu i tena matai, a te tino telā ne uga mai e se sili atu i te tino telā ne uga mai ne ia a ia.
17 Kafai e iloa ne koutou a mea konei, ka fia‵fia eiloa koutou māfai e fai ne koutou.+
18 Au e se faipati e uiga ki a koutou katoa; e iloa ne au a tino kolā ko oti ne filifili ne au. Kae e ‵tau o tupu te mea tenei ke fakataunu a pati i tusitusiga tapu:+ ‘A te tino telā ne kai sāle ki aku meakai ko oti ne ‵teke* mai ki a au.’+
19 Mai te taimi tenei o fano ki mua ka fakaasi atu ne au ki a koutou kae koi tuai o ‵tupu a mea konei, ko te mea kafai ko ‵tupu, ko tali‵tonu ei koutou me ko au tenā.+
20 Au e fai ‵tonu atu ki a koutou, so se tino e talia ne ia so se tino e uga atu ne au e talia foki ne ia au,+ kae ko so se tino e talia ne ia au e talia foki ne ia a te Atua telā ne uga mai ne ia au.”+
21 I te otiga o ana pati konei, ne mafatia te loto* o Iesu, kae molimau mai, ana muna: “Au e fai ‵tonu atu ki a koutou, au ka fakatogafiti ne se tokotasi o koutou.”+
22 Ne fakatau kilo‵kilo a soko i a latou eiloa, me e se iloa ne latou a te tino e fakauiga a ia ki ei.+
23 E tokotasi te soko, te tino telā ne alofa a Iesu ki ei,+ ne sagasaga pili atu ki tafa o Iesu.
24 Ne kalo atu te ulu o Simona Petelu ki te soko tenā kae fai atu: “Fai mai ki a matou me ko oi te tino e fakauiga a ia ki ei.”
25 Ne fakapale atu a ia tenā ki te fatafata o Iesu kae fai atu ki a ia: “Te Aliki, ko oi a te tino tenā?”+
26 Ne tali atu a Iesu: “Ko ia telā ka tuku ne au ki ei ne mu falaoa ko oti ne ufi ki vai.”+ Tela la, i te otiga ne ufi a mu falaoa, tuku ei ne ia ki a Iuta, te tama a Simona te Isikaliota.
27 I te otiga ne puke ne Iuta a mu falaoa, ulu atu ei a Satani ki loto i a ia.+ Tenā ne fai atu ei a Iesu ki a ia: “A te mea telā e mafaufau koe o fai ke na fai fakavave nei.”
28 Kae e seai ne tino i a latou kolā e saga‵saga i te taipola ne iloa ne latou a te pogai ne fai ei ne ia a pati konā ki a Iuta.
29 Ona ko Iuta e nofo mo te pokisi tupe+ ne mafau‵fau a nisi tino i a latou me ne fai atu a Iesu, “‵Togi a mea kolā e manakogina ne tatou mō te ‵kaiga,” io me e ‵tau o tuku atu ne ia ne mea ki tino ma‵tiva.
30 Tela la, i te otiga ne maua ne ia a mu falaoa, fano fakavave ei ki tua, kae ko po.+
31 I tena fanoga ki tua, fai atu ei a Iesu: “Ko faka‵malugina nei te Tama a te tagata,+ ko faka‵malugina foki te Atua ona ko ia.
32 Ka faka‵malugina a ia ne te Atua,+ kae ka faka‵malu ne ia a ia nei eiloa.
33 Aku tama‵liki, ko toetoe fua te taimi e ‵nofo fakatasi ei tatou. Ka ‵sala koutou ki a au; kae e pelā mo aku pati ne fai ki tino Iutaia, ko fai atu foki nei ne au ki a koutou ‘A te koga e fano au ki ei e se mafai ne koutou o ‵mai ki ei.’+
34 Ko tuku atu ne au ki a koutou se fakatonuga fou, ke fakatau a‵lofa koutou; e pelā eiloa mo au ne alofa ki a koutou,+ ke fakatau a‵lofa foki koutou.+
35 Ona ko te mea tenei ka iloa ei ne tino katoa i a koutou ko oku soko, māfai e fakatau a‵lofa koutou.”+
36 Ne fai atu a Simona Petelu ki a ia: “Te Aliki, e fano koe ki fea?” Ne tali atu a Iesu: “A te koga e fano au ki ei e se mafai ne koe o tautali mai i a au i te taimi nei, kae ka tautali fakamuli mai koe i a au.”+
37 Ne fai atu a Petelu ki a ia: “Te Aliki, kaia e se mafai ei ne au o tautali atu nei i a koe? Ka tuku atu ne au toku ola mō koe.”+
38 Ne tali atu a Iesu ki a ia: “E a, ka tuku atu eiloa ne koe tou ola ona ko au? Au e fai ‵tonu atu ki a koe, koi tuai o tagi te moa kae ko oti ne fakafiti fakatolu ne koe au.”+
Fakamatalaga mai lalo
^ Io me “e isi foki se tiute o koutou o.”
^ Eleni, “ne sau aka tena mulivae o aka ne ia au.”
^ Eleni, “ne mafatia te agaga.”
