Te Tusi a Ioane 11:1-57
11 E isi se tagata masaki e igoa ki a Lasalo; a ia se tino Petania, te fakai o Malia mo tena taina ko Maleta.+
2 Ko Malia tenei ne ‵ligi ne ia te sinu manogi ki luga i te Aliki kae ‵solo ana vae ki ana laulu;+ ko te tuagane o Lasalo telā e masaki.
3 Tenā ne uga atu ei te fekau a ana tuagane ki a Iesu penei: “Te Aliki! A te tino telā e alofa malosi koe ki ei e masaki.”
4 Kae i te lagonaga ne Iesu a te mea tenā, ana muna: “A te masaki tenei e se iku ki te mate, kae e fai penā ke faka‵malu ei te Atua,+ ko te mea ke faka‵malugina te Tama a te Atua e auala i te mea tenei.”
5 Ne alofa malosi a Iesu ki a Maleta mo tena taina, e pelā foki mo Lasalo.
6 Kae i te logoga a Iesu i a Lasalo ko masaki, ne nofo eiloa a ia i te koga tenā i aso e lua.
7 Fakamuli ifo, fai atu ei a ia ki ana soko: “Tatou ka toe ‵foki ki Iuta.”
8 Ne fai atu ana soko ki a ia: “Te Faiakoga,*+ ne fatoa oti fua ne lamalama koe ne tino Iuta ke peipei ki fatu,+ kae ka toe fano foki koe ki ei?”
9 Ne tali atu a Iesu: “E a, e se 12 a itula o te ao?+ Kafai e sasale se tino i te mainaga o te ao, e se siga a ia i se mea, me e lavea ne ia te mainaga o te lalolagi tenei.
10 Kae kafai e sasale se tino i te po, e siga a ia, me e seai se mainaga i loto i a ia.”
11 I te otiga ne fai atu ne ia a pati konei toe fai atu ei a ia: “A Lasalo te ‵tou taugasoa ko tō tena moe,+ kae ka malaga atu au o ‵fagu aka a ia.”
12 Fai atu ei ana soko ki a ia: “Te Aliki, kafai a ia e moe, ka toe ‵lei a ia.”
13 Ne faipati a Iesu e uiga ki tena mate. Kae ne leake latou me ne faipati a ia e uiga ki te moe o fakamalōlō.
14 Tenā ne fai ‵tonu atu ei a Iesu ki a latou i te taimi tenā: “A Lasalo ko mate,+
15 kae ona ko koutou, ko fiafia ei au me seki nofo atu au i konā, ko te mea ke tali‵tonu koutou. Kae ko tatou ka olo atu ki a ia.”
16 Kae ko Toma telā ne fakaigoa ki te Masaga, ne fai atu penei ki nisi soko: “Tatou ka olo foki, ko te mea ke ‵mate fakatasi tatou mo ia.”+
17 I te okoatuga a Iesu, ne iloa aka ne ia me ko fa aso ne tuku ei a Lasalo i loto i te tanuga.
18 A Petania e tu pili ki Ielusalema kāti e lua maila* te ‵mao.
19 E tokouke a tino Iutaia ne olo atu o fakamafanafana a Maleta mo Malia ona ko te lā tuagane.
20 I te logoga a Maleta i a Iesu ko vau, fanatu ei tou fafine o fakafetaui ki a ia; kae ko Malia+ ne sagasaga eiloa i te fale.
21 Ne fai atu a Maleta ki a Iesu: “Te Aliki, moi ne nofo koe i konei penei e se mate toku tuagane.
22 Kae ko iloa nei ne au me i so se mea e fakamolemole atu ei koe ki te Atua, ka tuku atu eiloa ne te Atua ki a koe.”
23 Ne fai atu a Iesu ki a ia: “Ka toetu mai tou tuagane.”
24 Ne fai atu a Maleta ki a ia: “E iloa ne au me ka toetu mai a ia i te toe‵tuga+ i te aso fakaoti.”
25 Ne fai atu a Iesu ki a ia: “Au ko te toetu mo te ola.+ Ko te tino telā e fakaasi mai faeloa ne ia te fakatuanaki ki a au, e tiga eiloa e mate, ka toe ola mai;
26 kae ko tino katoa kolā e ola kae e fakaasi mai faeloa ne latou te fakatuanaki ki a au ka se ‵mate eiloa.+ E a, e talitonu koe ki te mea tenei?”
27 Ne fai atu tou fafine ki a ia: “Ao, e te Aliki, au e talitonu i a koe ko te Keliso te Tama a te Atua, te tino telā ne vau ki te lalolagi.”
28 I te otiga o ana pati konei, fano ei a ia o kalaga ki tena taina ko Malia, kae faipati malie atu ki ei: “Ko oko mai te Faiakoga+ kae e ‵sala ki a koe.”
29 I te lagonaga ne Malia te mea tenei, ne tu fakavave a ia ki luga kae fanatu ki a ia.
30 Ne seki oko eiloa a Iesu ki te fakai me koi nofo atu a ia i te koga telā ne fetaui ei lāua mo Maleta.
31 I te laveaga ne tino Iutaia, kolā ne ‵nofo fakatasi mo Malia i te fale o fakamafanafana a ia, a te ‵tuakaga fakavave a tou fafine kae fanatu ki tua, ne tau‵tali atu latou i a ia, me ne ma‵natu aka latou me ko fano o tagi i te tanuga.+
32 I te okoatuga a Malia ki te koga tenā kae lavea atu ne ia a Iesu, ne fakasiga ifo tou fafine ki ana vae, kae fai atu ki a ia: “Te Aliki, moi ne nofo koe i konei, penei e se mate toku tuagane.”
33 I te laveaga ne Iesu a tou fafine mo tino Iutaia kolā ne olo atu mo ia e ‵tagi mautuutu, ne mafatia kae otia malosi tena loto.
34 Ana muna: “Ne tuku i fea ne koutou a ia?” Ne fai atu latou ki a ia: “Te Aliki, vau o onoono.”
35 Tagi ei a Iesu.+
36 Ne fai atu a tino Iutaia: “Kiloke ki te lasi o tena alofa ki a Lasalo!”
37 Kae ne fai atu a nisi tino: “E se mafai ne te tagata telā ne faka‵pula ne ia a mata o te tagata ‵kivi+ o fai a te tino tenei ke se mate?”
38 Ne toe mafatia foki a Iesu, kae oti aka fano ei ki te tanuga. A te tanuga tenā se ana kae isi se fatu e fakapale ki luga i ei.
39 Ne fai atu a Iesu: “Ave kea‵tea te fatu.” Ne fai atu a Maleta, te tuagane o te tino mate: “Te Aliki, ko ‵tau o manogi masei a ia me ko ‵tusa nei mo te fa o aso.”
40 Ne fai atu a Iesu ki a ia: “E a, e seki fai atu au ki a koe me kafai e talitonu mai koe, ka lavea eiloa ne koe a te ‵malu o te Atua?”+
41 Tenā ne ave ei ne latou a te fatu kea‵tea. Ne kilo aka a mata o Iesu ki te lagi+ kae fai atu: “Toku Tamana, au e fakafetai atu ki a koe me ne lagona ne koe au.
42 E tonu, e iloa ne au me e lagona faeloa ne koe au; kae ko faipati au ona ko te vaitino konei e ‵tu i oku tafa, ko te mea ke tali‵tonu latou i a au ne uga mai ne koe.”+
43 I te otiga o ana pati konei, ne pakalaga atu ei a ia i se leo lasi: “Lasalo, vau ki tua!”+
44 Ne vau ki tua te tagata telā ne mate mo ana vae mo ana lima e saisai ki laugatu, kae ko ana mata e saisai foki ki se laugatu. Ne fai atu a Iesu ki a latou: “Talatala ana saisaiga kae tuku atu ke fano.”
45 Tela la, ne fakatuanaki a tino Iutaia e tokouke kolā ne olo atu ki a Malia kae lavea ne latou a te mea ne fai ne Iesu,+
46 ne olo atu a nisi tino o latou ki te kau Falesaio kae fakailoa atu a mea kolā ne fai ne Iesu.
47 Tenā ne fakamaopoopo ei ne faitaulaga pule mo Falesaio a te Sanetulini kae fai atu: “Ne a ‵tou mea ka fai, me ko fai ne te tagata tenei a galuega ‵mana e uke?+
48 Kafai e tuku ne tatou ke fai ana mea konei, ka fakatuanaki eiloa a tino katoa ki a ia, kae ka o‵mai te kau Loma o puke te ‵tou fale* mo te ‵tou fenua.
49 Ne fai atu se tokotasi o latou, ko Kaiafa,+ telā ko te faitaulaga sili i te tausaga tenā, ki a latou: “E seai eiloa se otou mea e iloa,
50 kae e se iloa foki ne koutou me ka aoga eiloa ki a koutou ke mate se tino e tokotasi mō tino katoa i lō te fakaseai atu o te fenua kātoa.”
51 Ne seki fai atu ne ia a pati konei i a ia eiloa, kae ona ko ia ko te faitaulaga sili i te tausaga tenā, ne ‵valo mai ei ne ia i a Iesu e ‵tau eiloa o mate mō te fenua kātoa,
52 kae e se mō te fenua fua, kae ke fakamaopoopo fakatasi mai foki ne ia a tama‵liki a te Atua kolā e salalau valevale.
53 Mai te aso tenā o fano ki mua, ne fai olotou aofaga ke tamate a ia.
54 Tela la, ne seki toe mafai ei ne Iesu o fanofano sāle i tafa o tino Iutaia, kae ne fanatu a ia mai konā ki te fenua i tafa o te koga lavaki, ki te fakai e igoa ki a Efalaima,+ kae ne ‵nofo a ia i konā fakatasi mo ana soko.
55 Ko pili ki te Paseka+ a te kau Iutaia, kae e tokouke a tino ne olo atu ki Ielusalema mai mua o te Paseka ko te mea ke faka‵ma latou e ‵tusa mo te tulafono.
56 Ne salasala ne latou a Iesu kae fai aka olotou pati i a latou eiloa i tafa o te faletapu: “Se a te otou faka‵tau? E mata, ka se vau eiloa a ia ki te fakamanatuga?”
57 Kae ko oti ne fakatonu atu a faitaulaga pule mo Falesaio ki so se tino e iloa ne ia te koga e nofo ei a Iesu, ke fakailoa atu ki a latou, ko te mea ke puke ne latou a ia.
Fakamatalaga mai lalo
^ Telā ko te faletapu.
